Blog Vrbanj

Stipe i jo, nostalgija iz Rozove kole.

Bila je subota popodne, ovako u vrime izmeju Božića i Mlodega lita. Bili smo u peti razred i skula ujutro. Jo i Stipe Rozov smo bili u njihovon molon teplon kuhinjici i gledali kroz ponistricu. Već je bi somi sut, tako još pol ure dneva, a barba Petar, Stipeta did, je bi ništo oko maslinih ispod grebih. Vrime je bilo onako teplo, bez vitra ali oblaci su bili teške sive boje i vorh Gozda prignječen sa njima. Niko od nos je reka..."ovo je vrime od sniga"....jer u naše ditinjstvo snig je pada dosta putih u zimu i ka dica smo već poznavali sinjole od sniga. E, vajalo bi didu odnit lumberu rekla je teta Petra, Stipetu nona, i mi smo vazeli lumbrele i taman došli dole a barba Petar se je već bi uputi. Dok smo se pomalo penjali od Pjace već je počelo paršit. Veselo smo utorkali u kuhinjicu jer smo ćutili vonj friganih kumpirih. I da van otkrijen tajnu, teta Petra je znala nojlišje pofrigat kompire. Nikor kako ona. Mi smo doma frigali bile a oni one čarnjene kompire a teta Petra bi ih isikla ni tonko ni debelo, taman lipe fetice koje nebi skroz zagorile ali bi imale lipu hruskavu koru i ni stavijala soli po njima. Voli san doć u Stipeta a i on bi me i som zvo kad bi mu nona frigala kompire. Najili smo se i gledali kroz ponistricu kroz sinjavinu sijalice na kurota kući kako guste pahulje padadu i pokrijedu Batetov vartal. Tako siti išli smo u mene a Stipe je vaze i sviću od uja. Zoč? E zato ča se bez nje ni moglo jer se kroz našu kolicu ni vidilo popet uz skale a i radi još važnije stvori. Na našemu surolu smo nos dvo bili sagrodili moli kućicu i pokrili je šatorskim krilom. Puno smo oba čitali i to iste libre koje bi posudiva jo njemu ili on meni i imali smo iste književne junoke. Zavukuvali bi se u tu kućicu i provjali dogodovštine junocih iz libor. Te večeri zavukli smo se u našu kućicu svak sa svojon svićon od uja na koje smo grijali ruke a snig je pada i pada. Mi nismo tad bili u Varbanju nego na američkom sjeveru u vigvanu Indijoncih. Tad smo oba čitali Betty Zane i bili smo ili Delaware ili Huroni po Indijoncima iz tega libra. Tako smo se bili uživili provjajuć "po indijonski" kako smo naučili iz libra da nismo ni ćutili da parsti zebu dok od sniga ni poče krov od šatorskog krila rabanjat. A i teta Petra je počela zvat jer je znala da nismo u teplo nego u našemu molemu svitu u kućici. Kad smo se izvukli moj did se je somo smijo kako san uleti i stavi ledene ruke nad špaher a Stipe je sa svićon od uja pomalo kroz kolicu doma i vidi san, ni iša u kuhinju nego u kamaru čitat. Do malo nestalo je letrike pok san i jo sa svojon svićon od uja iša u posteju na miru nastavit čitat. Pogleda san posli kroz ponistru na livo, kroz sinjavinu od sviće od uja iz Stipetove ponistre lelujale su pahuljice. Jer snig je pada i pada a i jo san se zavuka pod koltru nastavit snit o Huronima u vigvanu i o stanovnicima mole tvrđavice Henry na granici koji se dok snig pada griju i uz plamen provjedu dici gončice.