Blog Vrbanj

 Danas svirte a onda sutra provojte!!!

Bila je limena glazba u Foru, Pajizu, Varbanju i Jesi. Pajzonska nikad ni fremovala aktivnost, forska je ma se je na sriću opet aktivirala a varbonska i jelšonska su se nažalost ugosile bez velikih aforih za ponovno aktiviranje. Ostaci ostataka inštrumentih varbonske mužike su sačuvani meni u šufitu a ima još pokoji inštrument sačuvan i po kućima. Lipe su bile budnice ujutro na praznike. Mužika bi zasvirila na Pjaci onda portila pud Vira, zasvirila na Viru, kod Crikve, na Pod dolac i opet na Pjaci. Ali ne somo ujutro nego je mužika svirila po mistu i večer pri, na žežin praznika. Kako je to bilo lipo čut i veliki događaj za nos dicu. Koncerti na betuniću isprid spomenika, na betuniću isprid Doma, prove mužike u sali Doma, u prostoriji na katu di je sad vrtić, u prostoriji iznad bivšega bifea Orao nasuprot Batetovih a na kraju u Tutejinon kući. Svirili su i sprovode i na jednemu sprovodu došlo je do problemih i to je bi zodnji nastup. Naime tad je cila generacija muških hodila u vojsku ujedonput i mužiki se je stvori problem jer ni imo ko svirit sprovod (da ime pokojnika ne spominjen). Starija generacija koja već ni nastupala je tu subotu nalivala ploču i došli su svirit napol pjani posli obida od ploče. Govoridu da je glovni truboč Briškula (Dinko Pavičić Donkić, obiteljski nadimak Briškulin) bi toko pjon da ga je vajalo doržat da ne pode a onda je zaboravijuć di je usrid funkcijuna od sprovoda na grebima zasviri Maškare. Fremali su ga i sa tin se je rekla misa mužiki. A ima i anegdota vezana za ti nastup. Kad je prešident od mužike Remeta (Vidošević Dinko otac Marka po obiteljskom nadimku Remetin poznat kao Remeta) reka ovima starijima da bi danas vajalo svirit na sprovod oni su rekli da odovna nisu svirili i da bi in vajalo provat. A Remeta je tad reka onu čuvenu "danas svirte a onda sutra provojte!!!" i to se još i danas zno u sličnin situacijama u Varbanju u taroku reć!