Blog Vrbanj

PET OSMEGA!
Gospa od sniga u Bolu i uspomene na kućice i život u Oskorušici mog ditinjstva.

E, danas je Gospa od sniga, fešta u Bolu i u moje ditinstvo posli naših varbonskih feštih nojvažnija fešta za varbanjane. Svak ko je imo bokun kućice po valima ili rudinami je liti sto tamo a Varbonj bi opusti do Vele Gospe osim od nedije za na misu. Koji don pri bi se donila iz Varbanja novija roba i ujutro rano bi se za Gospu od sniga iz valih brodima partivalo u Bol da tamo arivomo pri 8. Did Perko bi čin bi skoči na rivu uteka na pazor od živega skontrat se sa prijatejima targovcima sa živin iz Broča jer mu je malatija bila živo. Nos dičurliju bi ko stariji odve na Zlotni rot da se kupamo ali oko 11 bi vajalo bit nose u Bolu. Did bi već čeka sa velikon dinjon, odve bi nas na sladoled i nojkasnije za podne je vajalo partivat nose u vale da se dojde doma pri nego hiti meštrol. Mladići bi večer opet išli u Borak na tonce a non dici i starijima mužiku iz Bola bi priko konola doni burinac. Lipo bi legli isprid kućice, okrenuli sedlo na bondu i stavili glovu na blazinjicu od sedla, podkladu ispod sebe, pokrili se sukoncen i zakujali uz lipe pisme iz Borika, šum gron od bora i botih od mora ča bi ih u valu dovojo burinac priko Bijakove.
Napomena: donja slika je preuzeta sa portala boljani.info

Slike iz kućice u Punti navar Oskorušice u kojoj smo proveli nojlišje doba ditinjstva jo, sestra, rođak NIkica Franičević i sestra mu Ecija od tete Marije i Jureta, rodica Silvana Pivac od tete Mileve i Vinkota i rođak Ivica Savinc i sestra mu Dijana od tete Perke i Alojza. Slike je slika očev parvi rođak Željko Ljubić sin Nevenke, koja je bila sestra moje none Mile Razović rođene Matković (Markovi), i Đovanija Ljubić rodom iz Pajiza. Čest gost u Punti je bila i njegova sestra Jadranka. U ovoj kućici smo boravili liti u doba o kojem san piso gore oba fešti gospe od sniga u Bolu.

Na ovon sliki smo otac Ive, sestra Miljana i jo 1963.

Kućica u Punti navar Oskorušice slikana 2005 dok je još imala krov.

Na donjoj sliki su sestra Miljana i rodica Silvana, teta Bona a dole livo did Perko slikani 1976 i desno otac Ive, Željko Ljubić i did Perko sa

sestron  Miljanon na ruke 1963g. Slikano u Oskorušici.

Jadranka Ljubić 1963 kod store kućice navar Oskorušice

Otac i jo isprid kućice uz more u Oskorušici (sada vlasništvo Leko Željko)

Kućica uz more u Oskorušici sada vlasništvo Leko željko

Miljana i Jo na tovaru

Otac karpi mriže isprid kućice uz more