Blog Vrbanj

JUGO!

Ma kako je lipo kad dojde Južina a apožito kad se beči i šuška oko kuće ka danas. Ma nikad sa njon dosadno. Izojdeš vonka a ona ti lipo napuše i napuni mutriju i dojdeš unutra ka i Gego "smanton i zamanton". A onda se moreš lipo izbeštimat jer imaš i zoč. A unutra ako takoš kalorifer vruće, ako ne takoš ohladno i opet lipo moreš beštimat i izdut se. A kako se je apena lipo danas igrat sa živcima. Ma somo skočedu i bižidu priko mirića od dvorića. Ćapoš jednega i sapneš ga a ono odma dvo druga utečedu. I tako cili don od jutra živci skoču a jo ih ćapinjen, sapinjen i beštimon.

Jo, moja smantona mutrija, svaki mišić na tilu koji igra som za sebe i moje droge beštijice poskakuše, moji uzigrani živci, smo danas štrakuntenti. Somo kad Južina porti ća na koga onda beštimat, na koga se onda izdut i hitit jid i nervožitod iz sebe. Jer bome sve je krivo osim godišć a na njih ni koristi vikat jer te ne slušadu nego somo tarčidu. I one su čudne. Obično kad niko ostari slabije tarči a godišća ča su starija sve žveltije gredu. Ma doć će opet nika promina i opet ću sve hitit na prominu vrimena. Bit će kriva Bura a i Tarmuntona. Ma ni Pulenat ni Levantora nećedu pasat lišo. Njanci govora. Ali isto nojguštozije je beštimat na JUGO !!!