Blog Vrbanj

Štorija o Mlinora sinu!

     Evo iti bi špjegat kako san u lito 1977 i jo isko nepostojećeg Mlinora sina (jer barba Antun je imo somo ćer) i varti se po Pajizu od kuće do kuće u već dogovorenon i uigranon igri sa novenin Pajzanima.

     Donkve, u lito 1977 poče san lavurat u Heliosu a Pajiz i Pajzane san kruto slabo poznava jer ka dite san se varti po Varbanju, posli skula, vojska i pet i po godišć Fora a Pajzane san poznava somo toko koliko san ih upozno lita 1968 kad san bi na praksu u Plastiku i one starije koji su mene poznavali priko oca. I tako meni je tribovala nika stvor, sad već ne pontin čo, a Branko Strašilov mi je u Heliosu reka da to sigurno ima Antuna Mlinora sin i naputi me je "di stoji". Jo san iša tamo i noša barba Antuna u radionici a on kako je već zno o čemu se lavuro mi je reka da mu sina ni doma ali da on misli da mu sin to ča meni tribuje i nima i da neka iden u jednega drugega i naputi me je di. I tako san jo hodi od kuće do kuće po već uigranemu dogovoru i svukud bi me šavali daje, a to daje je po običaju bilo na skroz drugemu kraju Pajiza, dok napokon nison doša u Tonkota Markića. Nison ni njega poznava i siguro bi me i on bi poslo daje da mu se ni doma trefila žena koju san poznava iz Heliosa i u kontu nje on me je uputi u čemu je "štos". Nison se bi sjidi na nikoga iz tega kola nego nasmijo i posli čini kuco kad bi vidi da i niko drugi pita di stoji Mlinora sin. Zno san da ga čeka tramakovonje od kole do kole po litnjon kalduri. E....a ova današnja kaldura me je i podsitila na "Mlinora sina" kad san cili potan nanoge oboša cili stori dil Pajiza.