Blog Vrbanj

Recept udruge "Forske užonce"

Sirnice i kako su ih cinile naše none i matere.

Na kilo muke 3 cila joja, 3 žumonca, 25 deki cukara, 2 deca mlika, 8 deki masla i 8 deki masti, 1paket friškega kvosa, puno vonji, limunove i naroncine kore, vanilje, ruma.

Stavijale su soma 3 bilonca da ne budu tvorde a pol masti da budu friškije veče don. Kvos bi se stavi dignit u mliko, istuklo bi se bilonce,dodalo žumonce sa cukarom i stalno tuklo. Rastopljena masnoća, dignuti kvos, svi vonji i rum. Dodovalo bi se muke koliko je potriba da ne bude tisto tvordo a da se ne lipi za ruke. Dvo dona bi se parčovali a dvo dona bi ih pravile. Obično se misilo uvecer, ostavilo cilu noć kisnit pa ujutro primisile i još bar dvo puta. Kisnile su pokrivene šćavinom, kad bi uskisle zodnji put nožicima bi se izrizole u križ namazole žumoncem i posule tucenim kockima cukara. Na kraju su se stavijale na dasku a daska na glovu i nosile u pekaru peć, a bila je somo jedna pekara u Zakaštil nasuprot Antoane. E kole su vunjale a bome i cilo misto.