Blog Vrbanj

Il se ličmina oteže, il se Marduja poteže!

Drogi moji Bročani koji ovo budete štit unaprid van se skužojen. Ova gončica koja je nastala u Splitu još za vrime Forske komune ne odražava moje mišljenje o Bročanima niti je uopće istinita a jo san je parvi put i ču od Bročanih koji su mi je onako u taroku i uz smih isprovjali. Ali Splićani ka Splićani.....uvik su se tarokali na račun Bročanih. Baš je ovo digod i notono u kojima fojima ili libru, ma ako ni evo gončice.

---------------------------------------------------------------------------------------------------------------------------------

Donkve u ono storo vrime Forske komune For i Vis su bili puno bogatiji od Broča jer su imali dosta plodne zemje a i porte u koje je Venecija dosta ulogala. Broč ni imo ništa od tega nego grižu od zemje i kamenjar sa buškon i trovon. Ostajalo in je somo bavit se ovcima, konjima i tovarima a sa tin se ni uz nojveći lavur ni moglo lako priživit ni doseć kvalitod živjenja Foranih i Višanih. To je Bročane mučilo i mučilo i zakjučili su da oni nisu pametni ka drugi i da bi vajalo poć u Veneciju kupit pameti. Odabrali su dvo onako nojpametnija i nojpoštenija, skupili ono sirotinje od bloga ča su imali i sa to bokun bloga i jednon tikvicon poslali ovu dvojicu u Mletke kupit pameti. Kad su duždu špjegali zoč su došli on je odma kapi s kin ima posla i reka in je: dobro, prodat ću van pameti ali nemojte tikvicu otvorat pri nego dojdete na Broč. A znajuć Bročane zno je da tako neće bit. Vaze je blogo i do in tikvicu u koju je zatvori miša. I tako su ova dvojica portili pud Broča ma šempre in je cilin puten tuklo po možjanima da bi bi red na račun truda i muke po ovo velikega mora vazest čogod pameti za sebe pri nego dojdedu na Broč. I tako kad su došli blizu iskarcali su se na Marduju, otvorili tikvicu a miš.....uteka. Veselo su doveslali do Broča i rekli judima ča se je nehoteć dogodilo a Bročani su skupili svu ličminu ča su mogli noć na škoju, opasali Marduju, skupili nojjače jude i počeli je potezat da bi je privukli do škoja da pamet paso na škoj. Ma uz svu forcu Marduja se ni micala nego somo ličmina otezala. I otad je ostala ona......il se ličmina oteže il se Marduja poteže. A Splićani ka Splićani su dodali......i tako je Bročanima pamet ostala na Marduji.