Blog Vrbanj

Contact email: [email protected]

Blog Vrbanj

Normalno, nikad i danas

Posted on September 16, 2020 at 4:10 AM

Tako, more bit bila 1968. ili 1969. uglavnom još smo svi bili mladoskočići ali isto smo imali 16 godišć i već bi liti išli na tonce u Park u Jesu. Išli smo iz Varbanja na biciklima, niko je imo svitlo niko ni ma svitlili bi jedni drugima a ni još bilo ni asfalta pok smo pomalo i vozili a bicikle bi ostavijali u vinariju kod barba Andrije Šendikovega koji je tote bi noćni čuvor. Tonci su od subote trajali do 11 ipo a od nedije do 11. I tako jedne subote nakon tanoc nos nikoliko Varbanjanih i nikoliko Jelšanih smo sidili kod onega parkića ča je bi prikoputa Bobisa i ča se vidi nas sliki a di su bili i kioski za novine. Nismo ni vikali ni kantali nego onako razgovorali. Polnoći pasalo riva prozna nikud nikoga, jedino još koji zaljubljeni par ruku pod ruku gre priko rive. Ni se tad doržalo za ruke nego ako ženska ćapo mladića pod ruku e to znači da je njejin a u tu uru su mladići ženske obično pratili doma jer neka su već bili i zaručeni znala se je ura do kad je red da ženska stoji vonka. A ako nis bi zaručen ni bilo šanse da ženska mladića ćapo pod ruku da svi vididu. I tako oko pol ure popol noći eto milicionera barba Daneta u monturi. Bit će bi dežuran. I on nami " Djeco nije uredu da ste do ove ure vani. Razlaz i brzo svi kući". Jelšani bez riči pud doma a i mi do Vinarije po bicikle i pud Varbanja. Tamo bi seli Pod ložu i nastavili provjat dok nan se ne prispi. Sutradon je barba Dane vidi mi oca a kako su bili prijateji mu se je požali da san se malo pobarabi jer san do pol ure popol noći bi vonka. A danas ako si izoša vonka pri pol noći nis normalan. Kako se vrimena a i pojam normalnega minjadu. Na boje ili na gore e to je već drugi por postolih.


Categories: None