Blog Vrbanj

Did Ivon i inekcija

Ka moli bi san dosta boležljiv, svaku malo zimi fibra, prihlođen, garlo bi bolilo i kašja bi. Ajde ni to bila velika šćeta jer bi imo vrimena doma čitat u teplon posteji. Meštrovica Nina je stola odma uz našu kuću u kući koja je danas likora Bratanića i mat bi joj somo kroz ponistricu od kuhinje rekla da mi je fibra i da mi donese koji libar iz školske biblioteke za čitat. Tako san, baren je teta Nina tako govorila, pročita i svu školsku biblioteku. Bi san i jo digod malo dičinjski lukav kad mi se ni čekalo do popodne kad naučin i napišen domaći vidit ča se je novega dogodilo u libru. Zno san kad bi se probudi furminon pasat ispod provina da skupi malo fibre, avizo mater, ona meštrovicu i ti don se čitalo. I tako, ma ni to bilo baš učesto, sve dok jednega jutra, a bi san u šesti razred, nison malo veće doržo hurmin upoljen i puka provin ali materi san reka da mi je po na kleh i da ni bilo fibre. E ali kako za kaznu baš to popodne počelo mene garlo bolit, fibra odma po noći, ujutro pun provin. Je teta Nina poslala libar ma cili san bi slomjen i ni mi se čitalo. Mat je provala ča je mogla, omotovala mi garlo pečon namočenon u vodnu rakiju, teplila na šteriki uje i sa teplin ujen mi masirala parsi, omotovala me u vunenu robu i gledala da san pokriven ma nikako fibra past, kuhala mliko sa kadujon i zapraženin cukron ali fibra i kašaj nisu pominivali i išla ona u likora Bride a Brida joj iz škafeta izvadi bočicu Penicilina i reka neka mi did Ivon Budrovića do nekciju. On je poznava dida Ivana jer je did u parvemu ratu bi u austrijskoj vojski u sanitetu i nauči nike osnove a u drugemu kad su Njemci napustili škoj i na Vis došli Inglezi bi je bolničar za Varbonj. Hodi je učesto iz Fora na Vis po medikamente i sanitetski materijol, dovo nekcije, liči i privijo rane koliko je zno a kad ni zno ča će bi bi iša na svit u Bride i zato je Brida i napovidi didu da mi ide dat nekciju. I odma večer doša je did. Pontin ti don ka danas. Ka dite kruto san se straši nekcije i kad bi bilo pelcovanje u skuli uvik san čeka bit zodnji nodajuć se da će niko pozvat likora i da se jo neću pelcovat. Cilo popodne san bi u strohu od te nekcije ča je vajo primit. Gorila je u kamari somo na kantunolu mola sijalica od 25 svić, did je na rešu prokuha špric i joglu a jo se cili tresa. Kad je did napuni špric jo san poče plakat, klečo san isprid dida i moli ga da mi ne do nekciju. Onako u škurici još vidin didov zamišljen pogled, žol mu je da unuk plače a stroh ga je da bolest ne napreduje bez nekcije. I onda kako da se je nikako čudno nježno nasmijo, isprozni je špric u prazno i somo reka bit će sve dobro. Zvo je mater i reka joj da je do nekciju. Meni su bile suze po obrazu od sriće ča san priskoči nekciju a mat je mislila da su to suze od boli ma did joj je reka da nison plaka. Kad je izoša iz kamare nasmijo se je nikako nježno sa jubavju, namiga mi i opet reka da će bit sve dobro. I za čudo i je. Po noći san se spoti i ujutro ni bilo fibre a ni cili don. Još san osto jedon don doma za bit sigur a mat je bila sritna da je Penicilin pomoga. Nikad jo i did već o temu nismo govorili i to je ostala naša tajna koju evo sad nakon 56 godišć parvi put provjen. Ni did Ivon Budrovića još puno živi, umar je malo nakon ča san fini osmi, puno san sa njin lipega paso ali slika njega u škurici kamare sa špricon koji se prozni u prazno i bložen pogled posli ostala je duboko, duboko urizana. Ni gomice koja je more izbrisat iz vište.

Did Ivon Fredotović Budrovića