Blog Vrbanj

Motičica

Tako nike slike, niki doni ostanu čoviku u ponćenju i prate ga cili život. Jedna od tih sličicih koja mene prati je kako sa motičicon priko ramena kako veli gren s didon iz poja pridnoć. 

Bi san sedmi a baš i osmi razred, bi je som kroj zimskih praznicih sunčano i bura kako danas. Jo i did Perko smo išli u Česminicu koju smo zvoli Donja ili Nonina Česminica jer je bila odma ispod puta di smo imali od starine poje u Česminici a ovu donju je nona Mila bila dobila od Markovih za dotu. Potok iz Vira prisikiva je nojgornju meju naše Česminice, teka je uz cili istočni mejoš te koju smo zvoli Gornja, pasovo ispod puta i nastavija ka zapadni mejoš od Donje Česminice a onda ispod našega zida pada ka slap u dubinu od dva metra i gubi se između stinja u zemji. Voda u njemu je bila uvik čista a kako je teka cilu zimu ni bilo potriba od doma nosit za pit nego bi se zapulo vode iz potoka. Kad se je lavurala nova cesta puten iznad naše Gornje Česminice ni se ostavila ispod ceste gurla za potok ka ča je pri bila ispod storega puta, potok je fremo teć nimo naše i razlivo se je iznad ceste. Ka moli san se igro na temu potoku dok bi stori lavurali i pušćo brode od korke da plovidu po njemu. E tako je i na ovi don koji mi je upamet teka potok i kanto svoju pismicu priskakujuć priko stinja. Meni je did bi vaze jednu manju motičicu da jo mogu sa njin kopat lihe za sodit kapulu i kapulicu za u kvasinu. Did je kopo a jo kad i kad isto malo mu "pomoga" i did bi sritan ali onji tanto san hodi na potok pušćat brodić i bi ašpert da ne pode niz slap nego kad dojde za past ćapat ga i opet odnit navar našega neka opet plovi. I tako dok je did iskopo lihe taman zazvonilo podne i mi se parićali za obidvat. Seli smo u repor iza gomile ispod umendula, did je naloži ogonj i svak na svojemu ražnjiću smo ispekli po komad prajčevine. Onako razigran i na friškon ariji san to od gušta izi a onda je did izvadi naronču, prisika je napol britvicon i svakome svoja polovica. Did je ji i koru od naronče i tako je i mene nauči i to mi je do don danas ostalo. Osika bi komad naronče sa koron i tako izi. A i jo isto jer i jo san imo svoju molu britvicu koju mi je bi do did Ivon iz Stranice. Posli obida iša san zaput vode na potok i doni didu da učini bevondu i onda smo skupa utaknivali mole kapulice u lihe i to zaprećivali tako da je i moja motičica bila šporka od zemje. Oko treće ure već su bori počeli zaklonjat sunce, počelo je bit zima i mi smo očistili sa ogribima motike, jer i jo san imo i svoj ogrib a i mole zavojke, stavili ih na rame i pomalo nanoge pud doma. Slika kako pasojemo kroz Povatovo, judi pomalo na živemu pud doma a jo uz dida sa motičicon priko ramena kako i veli dikmon je ostala i nikad neće izblidit. Kako mi se je činilo da san tad veli........eeee, ni šola ne jer somo provi momci su hodili doma sa motikon priko ramena a na motiku vezane zavojke. Dovna već ni dida, dovna već potok ne kanto kroz Česminicu, dovna je Česminica sva zaresla, dovna već ni ni onih kojima san se usput kako veli javija ali uspomene ostale i sad me u starosti činidu sritnin.