Blog Vrbanj

Moj zodnji karnovol i zodnji snig u Brusje

Bilo je to jušto na don kad su letratoni ovi letrati, na 20. vejače 1996. Naša kumpanjija 52/53 skupila se je u Bulina storon kuhinji a sa nami su bili i barba Antun i Mile Gašperinovi a borami i moli Dino. Dobro smo marendali, dobro obidvali, malo i boje popili i grijali se uz komin jer vonka je bila bura, je i sunce ma ohladno  tad zvo po imenu nego uvik Slave, smije se iz daleka i rukami u žepima jakete da ne zebu on meni.....znoš Pero vajalo bi da dojdeš s menon večeras zasvirit u Brusje jer bit će veće svita nego se mislilo, bit će alegrija i neću moć som. A jo mada nison već godišćima onako sa gitaron sviri na tonce prihvat odma (ko će dobričinu Slaveta odbit ), poj doma po pojačalo i gitaru i sa Yugo 45 porti za Mihoton. Došli u Brusje još za vidila, namistili inštrumente, provali malo i išli u Mihota na večeru. Uvik i uvik san voli bit u Mihota doma u njihovon kuhinji sa uvik nasmijanon mu materon i onin dobrin veseljokon od brata Jureton. A koliko san somo noćih prispa u njih na Brusju. Lipo smo se mantenjili i oko osme ure portili u Dom. Bura je već bila pala, vedro lipo vrime a sola karcata Brušanih, Foranih, Grobjanih. Ni mi bilo dosta moje današnje muke po alkoholu u Bulina a sad je počela nova muka. Brušani, Forani, Grobjani, dobri kako ih je već Bog do, svaku malo .....e prijateju nison te već odovna vidi homo čogod popit. I tako junoč se jo, iden na šank i otresen po koji ružulin ili amaro ma vidin vajat će opet u Mihota spat jer neće imat ko vozit u Varbonj. A u soli veselje, alegrija rekli bi Brušani, tonca se i skoče, maškarih karcato, (pontin Vislav Zaninović i Ivo Kolumbić se nisu makli od bine nego gledali u mene i pljeskali), ples srca, bironja nojboje maske, čitanje tastamenta koji se je po običaju sastavi u kuhinji Anteta Kabine a meni mutrija kako san već bi odvika od alkohola i šušura karcata i jo poče svaku pauzu izahodit vonka rasćarat mutriju i možjane. Bi san tako oko polnoći i vonka lipo, vedro. Odtukli mi još jedon tanac i nakon tako 20-25min gren jo opet vonka i osto u čudu. Vonka sve bilo. U tih 20-ak minutih napadalo ma skoro pedaj sniga i još pada gusti gusti snig. Odma san malo prošeto da gušton u snigu ma ni bilo kad vajalo se vrotit svirit. Ali kako snig ni fremovo počeli se judi kupit pud doma sa autima da ih ne zamete, ostali somi Brušani i oko dvi ure tonci finili. Glova je bila bistra, jo nakarco inštrumente i pomalo po snigu pud Varbanja. To mi je bila parva daja vožnja po snigu ma kako je bi još frišak ni bilo leda i lipo se je vozilo. Isprid mene se je vidilo da je pasalo jedno auto, a i on je vozi sridon ceste kako i jo, i ti je iša u Grobje. Kad san zamiti iza zavoja posli Vidikovca, malo pri japjenice kako da san doša u drugi svit. Ujedonput cesta suha, ni sinjola od sniga i do Varbanja san doša učas i siguro i fremo na Pjaci. U Varbanju su tonci, a bit će bilo oko tri, još trajali i svit ča je bi vonka gleda meni na autu nikoliko parstih sniga i čudidu se jer u Varbanju je i bura već bila pala. Eto da nison som provo ne bin virova u rozliku u klimi Brusje navar vorha otoka i Varbonj u nizini. Lipo bilo, da nison tad ne bin sad a ovo posvećijen i svin onin Bruškima, danas nonima, radi kojih san u mlode done falivo note jer bi gleda u njih.:)