Blog Vrbanj

Litnja nevera

Ne spominjen se baš godišća kad je ovo bilo ma bi san poče u sridnju skulu, donkve lita 68, 69 ili 70. Bilo je lipo, sunčano i vruće litnje jutro, nikud krajen sedmega. Non se je ništo Sigali bi pokvori i čekali smo da Miko Gutin paso kroz valu pok da sa njegovon penton idemo dignut mriže. Tako oko desete ure doša je Miko, prihitili smo njegovu pentu na naš kaić i jo i on portili pod Bujolovu Gospicu na puntu od Čaratuše dignut dvo pora poponicih. Miko nikako portit, ništo je preća oko pente a mene sve ćapinjala nika nervožitod makor ni bilo rozloga za nju jer ni to Miko puno vrimena preća ali tilo mi kako da je ništo ćutilo i bilo uznemireno. Došli smo pod Gospicu (niki rečedu i Gospojicu), odmolali konop od sike (nismo taj još stavijali sinjole na kavec mriže nego bi somo na konop vezali koju stinu i hitili to meju sike na kroj i onda počeli otle hitat mriže) i počeli dizat mriže koje su bile hitjene prima Murvici. Bićemo dignuli pol parve mriže a meni se dolo pogledat prima Givniku i Murvici priko konola. Ćapo me je niki stroh jer od tamo, od zapada, u moru je bi visoki sivi zid koji je izgledo kako da je do neba a njemu u dnu soma pina od velikih botih i koji je velikon brivon se približiva, nevera je noglo dohodila. Ma ni pasalo dvo minuta ujedonput smo se nošli u magli od darža, u škurici i velikemu vitru, velikin botima koje su nas hitale na kroj. Naš kaić je bi moli, tako malo veći od četiri metra i somo je skoko na botima. Miko je provo upolit pentu da se maknemo ali ni moga od velikih botih i ginganja kaića. Provovali smo na vesla se maknut od kraja ali nismo mogli kontra force vitra i nosilo nas je pod some sike i visoke stine. Mi smo se veslima opirali o stine ali jedno veslo nan je palo u more. Nismo se spontili oni stog dignutih mriž hitit u more da se baž lašnje odmaknemo jer nas je on doržo i daje od kraja nismo mogli. A ko zno, baž nas je on i škapulo jer tote je bila dubina i pedeset metrih a velika težina mriž u moru nas je baž i fremovala da nas bote ne hitidu skroz na kroj od kojega se somo s jednin veslon nismo mogli odprit. Ništa oko sebe prima konolu nismo vidili, sve je bila magla i veliki šušur vitra i botih i izgubi san osjećaj vrimena koliko je ta borba sa moren za živote trajala jer da smo udrili u kroj bilo bi nas oba more istuklo oba stine i pomoći ne bi bilo. Ali bit će trajalo dosta jer san kroz maglu vidi na pločima malo daje u vali oca koji je priko sikih doša vidit ča je sa nami ali pomoć nan ni moga jer daje ni bilo puta uz velike visoke stine. Čudo ali u toj borbi za život nison imo kad pensat na stroh i uopće se ne spominjen nikakvega stroha ni panike. Dok se je Miko ka jači sa tin jednin veslon koje je ostalo odbijo od kraja dolo mi se pogledat prima punti i u magli od darža i kapjih mora kroz koju se ništa ni vidilo kako duh prikozo mi se je obris nikega broda. Ti brod je doša blizu nos i kroz megafon su nan vikali da ćapomo konop koji ćedu nan hitit ali Miko je moho da ne. Nisu se makli nego su ostali tote 20-ak metrih od nos  i čekali a jo san ih kroz koltrinu od darža jedva vidi. Kad su vidili, a i Miko je vidi da od umora se već ne moremo opirat moru došli su blizu, hitili nan konop, Miko ga je sad ćapo i vezo za sidiju a jo hiti stog mriž iz kaića u more i brod nas je dovuka doma u Molu Oskorušicu. Tad smo vidili da je to legendarni "Smjeli", blizanac od broda "Hrabri", patrolnih brodih pomorske milicije. Nikad nison dozno jesul pasali slučajno ili nas vidili na radaru. Otac je još bi na sikima hodajuć nanoge nose a did je njih iz posade zvo da ih počasti ali imali su oni svojega posla, somo su nas odvezali, skupili konop, pozdravili sirenon i portili daje sposit još koji život kojega ribara koji je upo u litnju neveru. Posli koji don in je otac na vezu u Jesi odni ništo za zahvalu, biće čogod ribe i vina, ne znan. Za niti kvarat od ure nevera je pasala prima gornjen dilu otoka, izošlo je sunce, osušilo stine i meni se je sve to posli činilo ka jedon son, kako da se ni niti dogodilo. Išli smo sa Mikota brodon po veslo koje je more bilo hitilo na kroj, sa grančikon zadili mriže i izvukli ih. A i don danas da posli nison od oca ču kakov je stroh pritarpi gledajuć nas kako nas more tuče u kroj a on pomoć ne more bi mi se činilo kako da san to sve sni. I čudo, ni danas me ne ćapo stroh kad na to pomislin, stroh da smo mogli u neveri koju nikor ni moga pridvidit izgubit živote a onda koji put promislin da Bujolovi, Morko i Dinko, nisu koje godišće pri tega za ništa tote u jednu rapu u stini nikoliko metrih višje od mora stavili kipić Gospice po čemu smo tu puntu Oskorušice i mole vale Čaratuše na punti Pelegrina i prozvali "Pod Gospicu". Bit će i pri u njihove mlode done, ili oni čuli od starijih, na temu misto di se lomidu bote mortvega mora iz konola bilo sličnih dežgracijih.

(Prema pričama  mlađih Bujolovih to da se tu postavi kipić Gospe je bila želja pok. Dujka Čubre koji je poginuo na Sutjesci, muža Olice sestre Marka i Dinka, pa su njih dvoje tu Dujkovu želju ispunili. Dujko je bio dao zavjet, ili po domaću "zavitova se", da će tu postaviti kipić Gospe a koji je razlog za zavjet to Bujolovi ne znaju ali kako je on išao u rat i poginuo oni su kao braća njegove udovice ispunili njegov zavjet što je bila želja i sestre Olice.)

Misto ti se je to dogodilo je sinjono čarnjenon točkon.