Blog Vrbanj

Koliko vos ča ste rojeni u doba desetak godišć posli rata i hodili upoje je pilo vodu iz svoje gustirne osim nakon parvega darža nakon ča se je gustirna očistila? Malo, kruto malo. Uvik se je hodilo na vodu u susida gustirnu. Ni u moje ditinjstvo bilo ni alavija daskih ni alavija lamarina za napravit asetoni pokriv za na bucol i uvik bi upala koja zmaja, koji miš koje smo u svojoj gustirni vidili dok se ne bi raspo i potonu na dno a u susidovoj gustirni to nismo vidili jer se je manje hodilo. Čega je sve bilo u onon kaški ča se je vadila iz dna kad bi se gustirna krajen lita očistila da čista dočeka parvi dorž boje i ne spominjat se. Priko pjovera a i krovića tezice ili kućice je u gustirnu hodila sva prašina i pelud ča je vitar doni. Ali ni se za to bacelalo. Bilo bi se sa važetićen, a puno putih i sa većin savijenin liston tovorskega kupusa malo prohmutalo škrup i onda kako malo iz dubjega koliko se je moglo doseć zapulo vode. I zato bi rekli stori......ma poj u tega i tega susida gustirnu ona ima asetovi pokriv tamo je čista voda i ni krepanih miših a susid bi isto tako reka svojima i svi pili tuju vodu. A i ti važetići su se digod raspadali od ruzine ma čuvaloga se je ka blogo nikud pokriven gronjen malo daje od gustirne da ga ko ne vazme jer ni bilo lako doć do njih. Kad su već počeli traktori koristilo se je vože od 3l od uja za mješavinu a bome dezinfekcija pri nego se je počelo je koristit bi bila prokuhat u njemu vode sa malo šode bikarbone i to je bilo sve. Kad se je u poju hodilo jist bilo je šćeta tratit vodu za oprat ruke pok bi ih se somo bilo otarlo od zemje oba gaće i eto živi ostali, malo zarazih je i bilo a svi su govorili da je zemja zdrava. I bila je tad jer se još otrovi nisu koristili, jopno, vidrijola i sumpor je bilo sve. Danas je drugo doba i svak donese u kantici vode od doma za pit ma tad je bilo ovako. Na slici je gustirna i kamenica u koju se je kad je bila čista ulivalo živemu za lokat a inače u njoj se je mutilo jopno sa vidrijolon za polivat. A u kamenice bi se obično bilo ostavijalo dvo, tri takja da se zmaja  more poć napit i da ako upode unutra ima po čemu izoć vonka jer to nisu bile otrovne zmaje i šćeta da se beštija uduši. I vi koji ste gonili na živemu jel se spominjete da su vas ka dite parvo učili kako se zvižje živemu da slaje loče. To je bila posebna melodija i sad jel to pomogalo ili ne ma kad bi se živo odvelo na sić, kamenicu ili na koju lokvu bi se to zvižjalo.