Blog Vrbanj

Nona Ćića

Nojdraži moment dona a pogotovo zimi kad se volin rano ustat i ovi parvi gucaj kafe u teplemu popit dok se vonka kroz ponistru apena počne rasvićat a vanjska još gori. Parvi gucaj mi vajo bit vruć, odma iz glogoja i onda ono aaaaa...bez tega ništa, kako da nison pi kafu. A sve drugo posli ni bitno. Mogu sa to malo kafe gucaj po gucaj i dvi ure ali nojvažnije mi je da san u tišini i som. Popodne mi za kafu ni briga pit je somemu. Puno putih jer skuhan i odma prolijen ali voli bi je popit kad bi je popodne drugi skuha. Kad je jo popodne kuhan nima mi ni šušta ni gušta ni vonja ali ujutro kuća zavonjo. Jutarnji vonj kafe mi je jedina uspomena na nonu Milu Rozovu koja je bila iz Markovih, koja je umorla mloda u jenoru 1958 kad san imo četiri i po i jedva se je i spominjen. Pontin somo da je volila kafu, u očima mi je slika kako u storon zadimjenoj kuhinjici sa otvorenin vrotima špahera iz kojih viri komad ogrizine i sa otvorenin kolačićen na ploči u čornemu od dima bruštulinu na ognju koji gre kroz kolačić bruštuloje kafu a vonj se širi cilon kuhinjicon. Posli bi mi dola bruštulono zarno za grist. Radi tega san je zvon nona Ćića a jist bruštulono zarno mi je ostalo i do danas. Pontin je i po još jednon sličici a to je bilo kad je bila kriza oko Trsta 1955 i kad me je doržala naruke na zidiću uz Šebejovo di smo gledali kako avioni hitadu letke, svitlo zelene, žute, plave, čarnjene a ona je bila u strohu jer je otac bi mobiliziran. Još se je tresla od strahotih ča je radi njega proživila u ratu. Nison niti tri godišća imo ali eto tako urižu se nike sličice i vrotidu uspomenu na nonu Ćiću kroz ovi parvi jutarnji vrući gucaj kafe.