Blog Vrbanj

"Anti državni element" u paržunu

E sad da bi mlaji sve ovo kapili vajalo bi objašnjivat na široko ča je OUR, ča je SSOH, ča je takmičenje "Mladi radnik samoupravljač" a stariji ćedu kapit somi od sebe i onda homo dreto na štoriju. Imena judih neću spominjat.

U jesen 1976 nakon sezone nos deset koji smo po ocjenama šefovih i direktorih hotela hotelskog poduzeća Hvar bili parvi na listi takmičenja "Mladi radnik samoupravljač" smo za nagradu dobili izlet u Poreč u posjetu Plavoj laguni. Sa nami su još hodili predsjednik i sekretar omladinske organizacije poduzeća a vođa puta je bi barba Jakov Domančić. Vozi nas je Stipe Miličić sa mini buson od poduzeća. Jutro je lipo počelo ma ni se baš pokozala istinita ona da se po jutru don poznaje. Donkve ukarcali smo se ujutro u trajekt u Pajizu i bi je plan večer arivat u Poreč. Ali, kako vrog nikad ne spi prid Crikvenicon je bus uskuha i vajalo je fremat u Crikvenici noć meštra da to napravi da moremo portit daje. Već je bi somi sut i dok se je nošlo meštra i napravilo ćapala nas je velika noć i barba Jakov je odluči da noćimo u Riki a onda ujutro rano odmorni pud Poreča. Išli smo u hotel Bonavia, ostavili stvori u kamarima, doli osobne na recepciju da nas upišu i seli za šank. Oni pametni su i ostali za šankon ma non četvorici "pametnijih" je palo napamet da idemo gledat striptiz u obližnji bar Evropa. Nismo mi znali ništa o temu da je Evropa bila na zlu glosu jer se je tamo kupi cili ološ sa brodih, dilala se droga i bile su česte racije milicije. To su nan tek ujutro objasnili u hotelu. Nepametni, misleć da smo u Foru di nas svak poznaje nismo nonci osobne vazeli sa sobon. I tako stojimo mi u baru napožani na zid, pijemo piće i gledamo niku kako se svukuje ma ona šporkuja svukla somo ređipet a to smo mogli vidit i na ploče u Majerovici. Jedon od nos je iša na šank po turu pića za svih i mi vidimo da dvo milicionera dohodidu do njega i ništo mu govoridu a on gestikulira rukami, pokazije pud nos i pokušava in ništo reć ma oni su ga ćapali pod ruke i sa njin u predulaz. Vjerojatno su imali niku opasnu dojavu za tu večer a on in je valjda po opisu bi nojveće sumnjiv jer je liči na nikoga. Nakon malo eto još šest milicionerih ali ovi sa automatima. Vidimo mi ništo čudno se dogođa i išli tamo pitat ča je na stvori sa prijatejen a oni i nos uz zid. Njemu su već bile ruke vezane lisicima na škinima. Pitadu nan osobne a mi njima da su nan bome u hotelu a ovi ča je bi kapo odma "ne lažite". Bit će se oni naslušali svaku večer takih opravdanjih od onih bez dokumentih. Mi se ustresli i umukli nakon čega su još jednemu od nos ča će bit bi veće sumnjiv vezali isto sa lisicima ruke na škina a mene i četvortega vezali skupa sa jednima lisicima, mene za desnu a njega za livu ruku i u kolonu pud stanice. Ova dvo naprid i oko njih tih šest sa automatima a nos dvo zodnji a nos su pratili dvo mloda, bit će bili pripravnici tek. Kad smo pasali isprid hotela naš ča je bi na čelu in govori da idu u hotel provjerit a odma su i on i ovi drugi dobili po dvo bubotka u lebra i učinili kuco. Ova dvo mloda ča su nos dvojicu pratili su nan potiho rekli "samo šutite". Kad smo došli u stanicu počelo je ispitivanje i parvo je bilo "kojoj organizaciji pripadate?" (valjda su mislili na koju emigrantsku organizaciju). Mi smo rekli bome da smo svi članovi omladinske organizacije i da neka provjeridu na miliciji u Foru ma bome odma onon dvojici "sumnjivih" po bubotak i "ne lažite". Za reć pravo bit će i oni već vidili s kin imadu posla ali vajalo in je zapisnik napravit a štufi i sebe i posla kojin se bavidu i nisu ti bubotki u stanici bili ništo grubi, veće za nas malo prenut. Kad su dva starija izošla ništo vonka ovi jedon mlodi ča je bi osto nan je olabavi lisice da nas ne stežu i svitova nas potiho da somo mučimo i ništa ne objašnjijemo. Nakon zapisnika, a sadržaj smo mu saznali apena u Foru, opet u kolonu i u pritvor u obližnju tvrđavu. Več je bilo počelo i roskat a hodili smo pod pratnjon dvodesetak minutih dok nas nisu uveli u ćeliju pritvora. U ćeliji ni bilo svitla somo ponarica sa rešetkima za ariju kroz koju je dopiralo svitlo od vanjske, podest od daskih, nikoliko dekih i posuda za obavit potribu. Bilo je već pasalo dvi ure popolnoći, mi u strohu mučimo jer ne znamo jel nas ko sluša, ne kapimo ništa ni zoč smo ovde ni kako će sve finit. Čita san ča su bivši "stanari" pisali po zidima i osto mi je upamet natpis "Ne daju ni vode". Već je bilo počelo pomalo svićat kad doša duh u nos. Čujemo glos barba Jakova, stražor otvora vrota i viče "izlazi". Ni nan bilo potriba dvo puta reć. Prid ulazon nas je čeka i predsjednik omladine. Oni su se u hotelu bili počeli pensat ča nas ni i prijovili miliciji a onda kad je doša milicioner u hotel sve se je razjasnilo i barba Jakov je doša po nos. Nismo od muke niti doručkovali nego vazeli stvori iz kamarih i do obida smo bili u Plavoj laguni. Obošli smo sve hotele poduzeća, spomeničku baštinu Poreča, obošli restorane, obošli i Umag ali tamo nikor ni rič ni o paržunu progovori. Toko smo se lipo proveli i bili dobro prihvaćeni da nismo sa tin tili kvorit raspoloženje. Sritno smo se vrotili u For ali bi je niki nedogovoreni ali spontani zovit šutnje i po Foru nismo ništa provjali o paržunu. Ali bome For je tad 1976 bi molo misto, svak je svakoga zno i kad je zapisnik doša u miliciju doznalo se je "razlog". Zapisnik nison vidi ali rečeno nan je da je u njemu pisalo da je jedon od nos milicioneru ništo reka protiv daržave ča je bilo ka opravdanje za šest puškama naoružanih milicjonerih. To ni mogla bit istina znon ne 100% nego 200% jer oni za koga su to napisali niti je bi take naravi niti je bi tako odgojen ali eto vajalo je noć i njima niki uvjerljivi razlog za ga navest. Nison zato jidan na milicjonere jer kad san posli od drugih ču da je u temu baru znalo bit karvi do kolin mi smo dobro i pasali. Vjerojatno bila nika opasna dojava a dvoje od nos po opisu sličili tima. Ali eto mi smo sritno pasali ma bilo je puno njih ča nisu bili te sriće a somo zato ča su se kako i mi nošli u krivo vrime na krivemu mistu (i još bez dokumentih). Naravno, pročulo se je to posli po Foru i bilo je tarokih na račun paržuna ma sve u miri ka prijatejska zezancija. A eto non četvorici je ostala, ma nakon ovoko godišć kad se grubo zaboravije mogu reć, lipa uspomena i kad se stanemo znomo se nasmijat i pozdravit sa pitonjen......Ča je ono bilo, a ? Mi znomo ča pitamo a drugi neka penso. 

E sad da se malo i jo istarokon. Mogli smo da smo bili lukavi ovu štoriju iskoristit i naplotit penšijunon paržun u kojen smo još 1976 bili ka "antidržavni elementi".