Blog Vrbanj

Ona Ivanu Meštrovemu

Učesto mi dojde napamet jedna štrofa ča se tiče Ivana Meštrovega i mojega tad molega, niti sedan godišć ni imo, zermona Ivota Budrovića. Ivon je bi poznat u mladosti ka žestoki vozoč. Ustvari on ni nikad vozi žvelto ali je imo Moskvića koji je šuška som od sebe, i motor i karoserija, a bavi se je takin poslon, minovo je i kompresoron špjanovo terene, da je unutra uvik bilo svakega alota, mašurih, motikih, maškinih, polugih, macih i kad bi malo žešće zakoči to alota i karoserije bi zašuškalo kako da vozi sto na uru. A kako je radi lavura puno vozi po grubin putima bi bi se ti Moskvić i zadera, digod karoserija i ugnječila i za neupućene je stvarno izgledalo da Ivon divjo sa auton po cesti. E šoma to da je Ivon žestoki šofer je nikako došlo do dičinskih ušijuh našega Ivota. I jedonput došli on i otac mu a ujedno i moj barba po materi Morko na razgovor i pita Ivo "tata, kad gre sprovod i izojde auto ko vajo da fremo" ?. A bome auto, objašnjije mu otac. E tata ma kad izojde sa auton Ivon Meštrov ko onda vajo da fremo? A barba se nasmijo, ne znan kako mu je objasni da isto Ivon vajo da fremo ma puno putih mi je tu štrofu provjo

Na fotografijama su Ivo Fredotović Marka Budrovića kad je imo 8 godišć (1980) i Ivan  Matković Benedikta Meštrov 1970-ih (sada živi u Njemačkoj).