Blog Vrbanj

Moja zodnja serenada!

Bila je lipa primalićna noć krajen maja 1983. Već san se bi poče ženit....ono bi san u "njih" ma to ni još bilo svukud znono pa ni u Varbanju. I tako.... petak večer oko 11 urih a mi sidimo u bufetu: Jakov Alelujin, Dinko Cvitića, Ivo Drožica, Vinko Marinčev, Nade Vidošev, Miko Vodanovića.... I onako u taroku niko govori...a mogli bi poć Perotu mlodon u serenadu. A jo, ne bud lin rec.....homo!! Iša san doma, a tad san još sto blizu na Pjaci, vaze gitaru i ukarcali se mi u dvo auta i pravac Dol. sv. One. Kad smo došli vidimo u kuhinji svitlo, znači brat je još budan i nima smisla, rano je. I onda se okrenmo i u Pajiz u Ploču di smo malo i provali potiho zakantat onu starinsku ča nas je tu večer nauči Cvitić-

"Oprostite susidi ča vas moj glas budi,

ovde mi je draga koju žejno jubin"....

Oko ure popolnoći kad smo se tornali e već ni svitla u kući. Potiho, bez riči, smo došli u ovi dvor na slici, stali ispod ove ponistre na učelku di je u kamari "ona" spola i uz gitaru zakantali dvi krotke pismice. I nakon te dvi štrofe opet smo potiho i bez glosa i šušura išli do sv. One di smo bili ostavili auta i svi sritni nose u Varbonj.

Sutradon mi je mloda provjala da se je probudila na početku druge pismice i da ni odma kapila ča se dogođa ma kad je kapila da ju je ćapo niki bloženi osjećaj sriće pok joj se učinilo da je to sve somo snila. A Marinko, moj budući punac, je odma čin je ču glose prijatejih Cvitića i Aleluje izleti vonka na prišu se ubukujuć da nas pozove unutra na piće ma......na njegovu žalost mi smo već bili portili.

I tako su somo nojbliži susidi čuli serenadu i provjali da se tako lipe serenade ne spominju. I to je nojvjerojatnije bila zodnja iskrena serenada u ovin krajima.

Kakovi su to bili kantaduri Varbanjani znodu....ma kad je žeja za pomoć i prijatejsko sarce u pitonju kantali su ko gardelini. Svak kako i koliko je moga, ko je zno malo jače, ko ni zno somo je posegundovo ma serenada je "uspila" i svi su radi tega bili kuntenti. Nisu oni još znali da san bi u "njih" pok su bili sritni da su pomogli. Puno putih se te večeri spontin sa tugon a nojveće radi pokojnih prijatejih i "nje". Fola Cvitiću, Aleluji, Drožici na lipin uspomenima a ovima drugima zafalijen u mislima uvik kad ih vidin.