Blog Vrbanj

Nojlipji son

Diga san se jutros rano jer u sunac istok vajo već bit u poju. Levonda zove a već iza osme ure počet će bit vruće i neće se moć žanjat. Otac je porti s auton da more prignat vriće, mat je na ugotici a jo pomalo nanoge uz nju. Didi i teta Bona su već stariji a sestra još mola i oni su ostali doma. Oni će poć žanjat popodne bližje u Česminicu. Kad smo došli u Duge njive otac je već bi nažanja pol vriće, mat je stavila klobučić, jo beriticu jer je sunce već počelo peć, vinorizac u ruke i ćapa se lavura. Već znomo na kojon levondi užo bit osinac i odma se njega ide obolit da se ose razbižidu ma isto koja ostane i bome kad dojdeš do te levonde ubode. Ali nojde se starinski lik od tri trove, bilo koje ali da su tri, i sa tin natare misto di je ubola da ne oteče i gre se daje. Zno se i di je u zidu zala guja jer uvik je na isto misto i tu levondu otac požanje. Pas Loki pomalo potarkuje okolo nos, malo uteče za svojin poslon ma zno kad se partije i uvik se vroti navrime za poć u auto. Ni ni on lud po kalduri torkat do Varbanja  Žanjemo ne pod cvit nego na snopiće i stavijemo uz levondu a posli ćemo doma na trupiću kosirićen sić somo cvite. Kaldura sve jača, sunce je već dobro izošlo, potimo se i pijemo ma osan urih je i ni već čo. Tri vriće smo nažanjali i za jutros dosta. Napartili smo na ugoticu te vriće i izagnali do ceste, otac ih je ukarco u auto i porti a jo i mat pomalo. Oko desete ure smo doma. Cilo misto vonjo levondon. Did je već ispod Jurondetove kuće. Otac je osto marendat ma meni ni čo, ni kad gubit vrime jer vajo poć isprid Zadruge. Zidić isprid Zadruge je već pun. Niko liže sladoled, niko pije sokove ma većina pivu. Dica koja su došla sa ocima i didima tarčidu a mi druzi počnemo razgovore svak o onemu ča ga muči a to je nojveće koliko je još za požanjat i kad će kuhat levondu jer već je štajun za pud valih i ni čo dangubit po selu a mi mlaji o temu di se, ako nas ne odvedu žanjat, poć okupat popodne i di večer izoć na tonce. Kad  na kampanelu odrebati podne barba Petar i Dinko zatvoradu butige a mi se pomalo kupimo na obid. Poza obida vajo i prileć uru dvi, ma ne puno jer u tri vajo opet partivat žanjat. Kad smo nažanjali desetak vrić vajo to poć i izlambikat dole u Pecaru. Već smo donili i darva za u lambik a to bome smo izabrali lučevinu. Hitamo vriću po vriću u lambik i bosi ili u čizmima gazimo i nabijemo da veće stane, goli do pasa i potni. Svaku malo rečemo Štrambotu ili Molemu Sibetu da pusti malo pare da se levonda slegne i kad tako nabijemo desetak vrić oni poklopidu a mi smo seli vonka  u hlad i čekamo da proteče zlotno uje levonde. Kad već ni uja nego gre soma voda meštri od lambika zatvoridu paru, iskrenemo lambik, stručje smo na kolicima iznili vonka, ulili uje u kantice i doma. Već za večeru kontomo kad ćemo poć u Varbosku po abrum jer ni čo čekat za don, dvo partije se pud Oskorušice. Ma koji ovo kamion ovako klapato u ovu uru po Pjaci? vrog ga odni, ča ovo laje veće pasih a mi nimamo nego jednega ?, jidin se na ti šušur okrenen se i pogledan a ono šest urih, kamion paso ceston a Šćepotovin pasima sunce upeklo i nervozni su. Tad san kapi da mi se sve to snilo, da je to nikad bilo da sad ako izojden na Klepalo neću čut vonj levonde a neću nikoga ni vidit osim ako ko dojde na prišu u butigu. Da, bi je somo son ali lipi son i šćeta da već nikad taki son neće bit i zbilja