Blog Vrbanj

Ona o barba Petru Kapitonovemu iliti "Jo ne a svitova bi i von da se tega ostavite"

Posli drugega rata dok se još ni bilo raskarstilo sa Sovjetskim Savezom došla je i kod nos ideja da se po uzoru na Sovjete počnu osnivat seoske radne zadruge po sistemu da zadrugari uložidu svoju zemju, da se sve obrađije kolektivno i da se posli zarada od vina dili opet kolektivno svakomu prima potribi tako da ne budu niki imat puno veće a niki manje. Jer to je bila ka borba protiv kulaka koji su pri rata izrabljivali one sa malo zemje i ča je ustvari i bi jedon od aduta organizatora polazaka u rat da će se nakon rata napravit i socijalna revolucija u kojoj neće niki imat sve a niki ništa i opet bit sluge tima predratnim kulacima. Ta ideja ni ovde u Varbanju pala na plodno tlo. Ne znan da li je uopće bila saživila i u kojem obimu ali i ako je bila saživila malo je trajala. Iz tega razdoblja pokušaja osnivanja seljačke radne zadruge u Varbanju ostala je i anegdota koja se tiče barba Petra Račić Kapitonovega, oca od Molega Moteta a dida od Ankice, Margite i Perice. Kad su agitatori došli u barba Petra koji je već bi stariji pitat ga hoćel on intrat u seljačku radnu zadrugu on in je odgovori onu koja se još i danas spominje i po kojon se ponti barba Petra "DICO JO NE A SVITOVA BI I VON DA SE TEGA OSTAVITE"  Eto barba Petre u kontu ovih za ono doba i mudrih a i hrabrih ričih i jutros smo vas spominjali na balote kad je niko pridloži da se po već žestokemu suncu zaigra. Ču san odgovor "Jo ne a svitova bi i von da se tega ostavite" a to se i inače u Varbanju puno putih koristi onako u taroku i uz smih kad niko pridloži ništo ne baš puno pametno 

Na slici je kuća barba Petra.