Blog Vrbanj

16 godišć, dite ili zril mladić....nikad i sad!

Mate Čubretov koji mi je učere pokosi je navorši 16 i penso san se jel on još moli za mu dat da kosi pok san mu pito i dida jel smi a onda san se sponti da san i jo, a i sva moja generacija, sa 15 u osmemu već som goni i mast i gnjoj. Did me je nauči kako priko kolina nojlašnje hitit na rame vriću masta ili mokrega gnjoja, kako dignut na sedlo i kako zapartit i ni bilo jes još dite ili ne.15 g su bila godišća di se je kontalo da si ravan sa drugima u lavuru. Nikor me ni pito čo ako se živo iskrene puten nego je vajalo som, a doduše tad su poja bila puna svita i uvik bi se kogod trefi za dat ruku, raspartit i opet napartit i doma vriću od 100 kil dignut na rame i uz skale iznit navar badnjenice za je iskrenut. Ili kad se je goni mokri gnjoj a did bi nabi punu vriću baž i 120 kil ko je pito koliko godišć iman. Napart s jedne bonde a on sa druge i u poje. U poju raspart, vriće na rame i rasut kroz rede i tako po pet šest putih na dan na dvoje živega. 16g  . Ma ko te je pito za godišća. E zato danas patidu škina. Lopiš je piso sve to i sve te vriće gnjoja i masta, sve vriće cimenta za kuću, svi mašuri jarine i sarbuna, sve blokete a i sve one skaline ča san kroz 25 godišć lavura sa antenima čini i po mijor na dan su zapisane, i list korte od života se je ispuni pok sad ploćan račune jer već ni mista za zapisivat. Ma sa 16 nikor ni misli na starost. Vajalo je...ili tako ili nikako. Did već stor, otac vonka a niko je vajalo da goni - 26.06.2020

Donja slika je skinuta sa stranice boljani.info

Mate Čubre koji je u ožujku napunio 16g., sin Perota a unuk Duška Čubre, brat od mlađeg Lovre Čubre