Blog Vrbanj

Murva u Stranici

Moji u Stranici su imali lipu murvu u dvoru ispod kuće koja je bila velika i puno rodila. A i murve su joj bile velike jerbo je dvor bi pun gnjoja od živega. Jo san desetak godišć bi jedini unuk a dok su rodice i sestra naresle mene već i ni bilo u Varbanju pok san sva nojlišja godišća ditinjstva jo bi gospodor Budrovića murve. Počinjale su zrit krajen petega ma nojlišje su bile u ovo doba krajen skule. Tad smo se svi Straničari penjali po murvi i ni falilo beštimih od barba Markota, ne zato ča jimo murve nego ča se penjemo priko kućice koja je bila pokrivena pločima. Ni njemu bilo do tega da se malo raškajo i da koja ploča i poklizne, lako bi je on stavi nose, nego do tega da ako klizne ploča ne kliznemo i mi i ne udremo se. Ma ni bilo koristi, moga je i boje vikat. Ma i to ni nikad viko jidno nego veće onako sa brigon koju san i tad ka dite kapi. Ali barba i teta Lina su cile done bili po poju a nona, stora teta i did bi nos dicu gledali iz ponistre od dida i none kamare. Dinko, Katica, Nada, Mirjana, Marko, Mile, Antica, Dinko Bulin, Ljiljana i jo e to je bila kumpanjija od te murve. Ali za reć pravo dohodili su usrida dneva i dica iz drugih dilih Varbanja. Već od Moškovih bi ih čuli kako govoridu "ne vičte, ne vičte da nas ne čuje barba Ivon" a did bi sto iza škura napožan na ponistru i smijo se u sebi. Bili bi ih čuli do u Goricu kako po murvi vičedu a posli kako usakreto utekli misleć da ih nikor ni vidi ni ču. A dica ka dica, taki san i jo bi kad san hodi "krast" slatke šipke   A meni je bilo nojslaje kad bi osto som na murvi a nona, teta ili dide me gledali iz ponistre. Ni bi gušt jist ako me oni ne gledadu. Parvo bi kupi po klehu one prizrile ča su otpale. Neka je ispod sve bi suhi gnjoj somo bi ih malo otar i bile su slotke kako da su operene. A onda bi se pope i naji se ali obavezno bi sa sobon vaze važetić i nabra noni i teti murav. Nona i teta već nisu mogle doteć do gron i bilo in je drogo kad bi in nabra a meni još dražje vidit ih kuntente. Posli bi se opralo ruke od čarnila u kvasini koliko se je moglo. Na murvu je dohodilo i puno tićih a jo san u niže razrede učesto spo sa didon i nonon a ponistra odma iznad murve i koji je gušt bi ujutro kad bi sunce isticalo skupa sa didon iz posteje gledat sunac istok iza Bijakove i slušat kroz otvorenu ponistru kantonje tićih na murvi. A još veći gušt je bi večer uz otvorenu ponistru zaspat uz pismu kopitih od mula i tovara i kantonje fratrićih na murvi i u borima. Ali sve je to pasalo, ditinjstvo je pasalo, ni već none, ni već dida, ni već tete, ni već ni barba Markota i tete Line i ostale su somo uspomene. Murva je još tote ma ni njoj se ne mili rodit kad nima ko jist murve, i njoj fali dičja skrika i smih, fali i njoj dobrodušno beštimonje barba Markota i smih tete Line kad ga je korila da se tako ne smi govorit dici  Fali i murvi da je gledadu store oči iz ponistre, oči koje su sa jubavju gledale tu dicu na njoj. Bi san pri dosta godišć jedonput da ću jist murav ma izi san ih nikoliko i iša ća tužan. Je murve su još bile velike ma bez onih koji su me gledali iz ponistre nisu imale gušta niti bile onako slotke. Bi tad i nikad već. Neka sve ostane u očima onako kako je bilo kad mi je bilo nojlišje, kad san bi dite.

Murva u Stranici, pogled iz ponistre kamare none i dida

Did Ivon Budrovića

Moja mat Marica, nona Vica, stora teta Morica sestra od dida Ivana i Ivo Budrovića od barba Markota i tete Line sin. Ivo je rojen 09.03.1972 a ovo je slikano u treći misec 1978 ispod kuće u Stranici. Iza njih je murva.

Barba Marko, teta Lina rođena Kuničić, jo i Ivo Budrovića 1998g.