Blog Vrbanj

 Evo došla su tri dona fešte u Varbanju u župi Svetoga Duha koja mi onako po domoću zovemo "Duhova". Ne bin o vjerskoj bondi ove nojveće fešte u Varbanju jer nison kompetentan za to nego bi malo o svjetovnoj bondi fešte i uspomenima na Duhova iz ditinjstva i mladosti. Nedija na Duhova je bila ka i svaka nedija, išlo se je u crikvu koje je hodi ali ni bilo posebnih događanjih vezanih za nediju. Glovna fešta je bila u torij i ti don se je pozivalo u goste prijateje iz drugih mist, uglavnom na večeru ma u nos i na obid i na večeru. Nojčešći i nojdražji gost nan je uz naše Vrisničane iz barba Jureta Remetinovega bliže fameje bi Spaso iz Pitav. Nikad nison uspi saznat zoč smo toko bili prijatejski vezani za Spasota, oca od Anči. U torij su bili i tonci. Često i pri večere onako za mlaje i dicu a nakon večere provi tonci za velike. U torij popodne je svit bi probučen po Pjaci, dohodi je sladoledar iz Jese sa kolicima sladoleda, dohodi je popodne i barba Duje sa "feron", bi bi prostar svoj stolić, uglavnom u hlad ispod Jurondetove kuće, i nama dici bi se kupilo čogod za uspomenu. Balunčić na laštiku, varćić koji sviri kad ga se napuni vodon, darvenu klapatušu sa dvo kola i krilima, okrugla zarcalića kojima je na drugoj bondi bila zaštićena caklon koja slika na kartunu a u kartunu tri rapice i tri kuglice koje je vajalo pomičuć caklo i naginjuć ga uvolit svaku u svoju rapu, bilo je venjih, imitaciji arelojih, svirkih od plastike, molih arganetih, gujicih od korte za napuhivanje koje bi se bile ispružile kad se puše u njih a onda kad se some ispuhuju bi bile svirile....ma svakakvih ćanćarijih kojima smo se ka dica veselili. I dobit čogod, a uglavnom su to častili didi, sa barba Dujeta stolčića od fere, kuglu sladoleda i posli, kako su stariji zvoli "pasaretu" ili po današnju gaziranu limunadu, narančadu ili Koktu u bufetu je bilo ono zoč se je ka dite živilo i čekalo Duhova. Kad san već bi mladić u parvidon se je igrala utakmica na balun "Stori u mlodi", digod na ledini u poju, često na aerodromu a nojveće u Pajizu. Posli utakmice ispod zadruge se je do kasno u noć jilo pečenje. E a tad je nastupalo  za nos mladoskočiće ono ča se je čekalo cilo godišće. Vajalo je do ujutro okitit šimatorij cvićen. Cviće se je vazimalo, ili kako se je užalo reć "kralo", uglavnom u famejih koje su imale divnjice, onako već od sedmega razreda pok dok još nisu bile zaručene a ne u starijih ženskih. Ni tote bilo jida kad bi se cviće vazelo nego ponos mamih jer ni bila bravura da imaš ćere a da ti nikor ni doša ukrast cviće. To bi značilo da nikomu ni briga za njihove ćere i zato su mame odabrane pitere, a da je tad bilo piterih nego sve store teće i poti, niki važetići, stavijale naparuč da ih je lako "ukrast" a sutra bi onako ka jidno a ustvari sa ponoson i kako da nećedu, kako "usput", se "požalile" da su eto i njoj noćas radi "one njejine" ukrali cviće a ustvari cvale od sriće. To cviće je stolo po šimatoriju do posli mise i onda je svak dohodi po svoje cviće. Moja generacija je hodila i u druga mista u kuće di je bilo ćerih po godišćima prikladnih za nos vazimat cviće. U morkloj noći smo hodili uglavnom u Vrisnik i Dol sv. One jer se je bilo tako trefilo da je u tin mistima bilo nojveće divnjic u naše doba. Ne spominjen se da smo vazimali cviće u Svirče ili u Varbosku. Ni bilo autih jer još nismo imali dozvole pok se je cviće nosilo na karijolima u Varbonj i to ni baš bilo lako ma za bravuru i da se sutra more provjat sve je bilo lako. Jednu noć smo bili vazeli žardinjere isprid Bobisa u Jesi. Kome je palo napamet ne znan ali smo u barba Antuna Gašperinovega vazeli čezu (karet na dvo kola), upregli njihovega tovara i po morkloj noći nos nikoliko do Jese. Fremali smo onde kod parka i išli u doba kad cili pametan svit spi naruke donit četiri žardinjere priko rive i pomalo sa čezon nose. Došli smo u som sunac istok i dodatno ukrasili sa njima već ukrašen šimatorij. Ali čin je otvorila pošta zvoli su iz Jese da bi to vajalo vrotit jer su znali di je običaj vazimat cviće i mi smo zamolili jednega starijega, mislin da je bi Pavo Čubretov, da to auton vroti i to je on i učini tako da skondal ni ispo nego smo sutra popodne još bili čašćeni od Pavota u Bobisa. Znalo se je manje pitere odnit navar kampanela i postavit na nojgornji ordin a za to je vajalo i malo ludosti. Od zvonih do ulaza u kujbu kroz koju se more izoć na ordin ima i četiri metra i parvo bi se na konop diglo kod zvonih koje skale od maslinih, onda donilo pitere uz skaline i koji hrabri bi izoša vonka i onako po noći to posloži na onu bondu vidljivu iz Varbanja. To cviće bi posli donima stolo navar jer malo ko je imo već hrabrosti poć ga skalat. Ali kako su se vrimena minjala minjali su se i običaji. Dohodili su lipi piteri i u puno famejih ni baš bilo drogo da se ti piteri i cviće prinišadu pok se je kralo di se je moglo jer su cviće sakrivali tu noć. Nojgore je bilo kad bi se cviće ukralo starijin ženskima koje su ga čuvale ka oči u glovi jer one nisu mogle poć ujutro po njega i onda bi znalo i usahnut a i kogod bi zamini i umisto svojega vaze tuje lišje. Kako se mladost ne more privarit počelo se je krast cviće donima pri i doržat u sakreto,digod i bez zalivonja, i to već ni bilo za pohvalu ali "sila Boga ne moli" :), vajalo je šimatorij okitit. I tako, malo po malo, od lipega običaja sve se je izrodilo u skondale oko uništenega cvića a sve su krive fameje koje nisu ostavile nikoliko manje vridnih piterih da ih se more vazest. Zato molin mame koje imadu ćere da, ako želimo vrotit običaj kićenja šimatorija, odvojidu po koji piter, da ga ne sakriju nego ostavidu da se more u parvidon nanoć doć ono ka "usakreto" vazest cviće i lipo ujutro posli mise da dojdu po svoje cviće da se ne krode cviće starijima koje to ne mogu svaku noć unišat donima pri Duhovih niti imadu čin doć po njega. Ne znan kako je bilo drugima ali jo koji san u doba osnovne skule često spo u Stranici bi uživo u torij ujutro kad san hodi u skulu pasat priko cvićen ukrašenega šimatorija punega vonjih od svakega cvića a nojveće ćokih. Voli bi da se to opet vroti ali da to ima svoju lipotu ka i pri a ne da sve ispode na skondal radi razbijenih piterih i usahlega cvića. Na dobro nan došla Duhova! 31.05.2020

Tradicija se nastavije 

Na Duhovski parvidon popodne 01.06.2020 na novemu igralištu za moli balun opet je tradicionalno se igralo i posli uz spizu i koloče proslavilo. Igralo je osan dičjih ekipih sa veće od 40 dice i osan starijih ekipih a izmeju njih su zaigrale i dvi ekipe ženskih. Igralo se je 4+1 u terenu po ekipi. Puno dice i puno svita se je okupilo i baš se je ovo godišće Duhova lipo proslavilo.

Na Duhovski torij 02.06.2020 nakon veće godišć šimatorij je opet osvanu okićen cvićen