Blog Vrbanj

KAKO STE PASALI?

Napis o procesiji Za Križen 2020 prenesen sa facebook stranice Župe Svetoga Duha Vrbanj, autora Josip Vodanović Fakinov.

To je u zodnjih pet don nojčešće pitanje postavjeno nami koji smo imali privilegiju, čast, ali i odgovornost da ovo godišće gremo Za Križen. Odgovor na to pitanje je dug i kompliciran jer za nike stvori ne postojidu riči kojima bi to opisali. Ali provojmo...

Tek dvo dona pri Križa, križonoša je dozno točan broj judih koji smidu poć uokolo. Petnaste svita gre - bila je zodnja odluka državnega stožera. Bome to ni puno, ali sa petnaestoricon se more obavit sve ča je u Varbanju običaj za tu noć. Odluka križonoše bila je da gremo sa kandilirima, po četiri ferola i ceroja, dvojicon u pratnji i dvo redora koji ćedu nosit i aide. Kantaduri i odgovaroči nesmidu hodit nanoge, nego ćedu s autima doć u misto i isprid svake crikve dočekat precesjun. U crikvi je smilo bit nojveće deset svita, ali ni rečeno da to moradu bit svu noć ista desetorica. Mi smo se za vrime funkcijuna u crikvi minjali. Unutra su bili oni od kojih je u temu momentu potriba. Ali nikad veće od deset. Koliko čujemo od drugih, jedino su naši kantaduri otkantali u svakon crikvi po tri štrofe i odgovaroči jednu. Molili smo pet Očenaših i posli tega zakantali O biči preljuti. Virujemo da bi našima storima bilo drogo, da smo obavili sve ča je i inače bi običaj. Ovi ča su bili vonka, stoli su nanoge, posloženi u špaliru i udaljeni jedon od drugega dvo metra. Niko od petnaestorice, od devet urih uvečer do sedan urih ujutro ni se niti momenat.

A sad se vrotmo na početak večeri!

Došli smo isprid crikve u devet urih, a tamo dobotu nikoga. Somo fabriceri i redori oko crikve, i policijoti, njih pet-šest, koji su došli pomoć da se ispoštije sve ča bilo dogovoreno. Bilo je tužno, ali veličanstveno. Niko iz mista ni doša! Judi su poslušali ča se govorilo zodnje done. Niko ne želi ugrozit dostojanstvo precesjuna i Križa na nočin da policija mora reagirat. Policija je bila ugodno iznenođena. Kuntenti ča je tako, makli su se na bondu, i počeli nas slikovat i snimat. Osjećaji su se vidili i na njima, posebno na licu jedinega policijota Varbanjanina, Matkota Tresića. Mi smo mirno stoli u špaliru slušajuć propovid don Milija i Gospin plač kantadurih i odgovaročih. Mislin da smo tek tad postali svjesni naše privilegije, ali pri svega odgovornosti. Odgovornosti prima svima pasonima križonošima, kantadurima i drugima judima koji su hodili Za Križen i ostavili nan u baštinu ovo ča imamo. A imamo Križ ko identitet našega mista, i Križ ko ufanje i potporu u životu. Odgovornost i prima svima koji ovo godišće nesmidu Za Križen, da se molimo misto njih, da na niki nočin ispunimo i njihove zovite. Kantaduri su išali štrofu "Tužna mati tad se uputi", i na "tad" redori su zaškrabatali. Kandiliri i parvi ceroji izahodidu iz crikve, a za njima i Matij (Mateo po varbonjski). Darži Križ onako nespretno, kako i svi mi kad smo ga parvi put ćapali u ruke. Ali i ponosno, jer posto je karika u lancu varbonjskih križonoših, i brojnih križonoših u svojon fameji, kako sa očeve tako i s materine bonde. Nosi Križ za cili svit, jer u svitu vloda bolest koja nosi starije i bolesne. Sviton vloda i druga bolest, bolest pohlepe i sebičnosti. A da ni parva bolest došla radi ove druge? Parvi do Matija je njegov otac Tonči, darži ruku na njegovemu ramenu, bit će mu potpora i ovu noć, kako ča je i cili život. Dinko je uputi "Pomiluj mene Bože", a mi ga pratimo, koliko ko zno i more. Izošli smo iz šematorija, ali ovi put škrabatuše ne gredu sa nami do Gospojice. Jer puten nas smi bit somo petnaste. Stali smo kod Gospojice da bi se pomolili za naše mortve. Dokli molimo jedon Očenaš za pokojnega Teota, oca od Tončija, a jedon za sve mortve, teta Ksenija i Meri Budrovića stojidu de bondu, molidu s nami i jecadu. Portli smo daje. Jo san pove Ruzorij, žalosna otajstva, drugi odgovoradu. Pasojemo kroz naša poja, lozje, masline. U mislima su nan naši težoci, koliko je tih težočkih ruk nosilo Križ. U nevoji u kojon su živili, jel in ti Križ bi jedino ufanje i noda? Pasali smo i nimo osvitljeni Križ na Križice.

Došli smo prid Varbosku. Čekadu nas Leo, Ivica i Magda. Tote su i naša dvo Onđela tu večer, Filka i teta Anka. Učinili smo sliku svi skupa i gremo naprid. Pasali smo Svetega Roka i u koli Dinko išoje "Pomiluj mene Bože". Ni nas puno, ali pisma zvoni, kanto se iz sarca. Oko Svetega Lovrinca je par svita. I naši kantaduri. Deset ih introje u crikvu. Tin i Antonio ostavijedu kandilire i sa Škandejon izahodidu da bi odgovaroči mogli poć unutra. Nakon ča su odgovaroči iskantali, vonka gre jedon od njih i parvi ceroji, Vinko i Mario, da bi Andro, Dinko i Ivan mogli s Marijoton i ostalima u crikvi, zakantat O biči preljuti. Kantaduri Nikola i Marian su uputili treću štrofu. Partijemo pud tvrđave. U tvrđavi Marijo moli pet očenaših, drugi odgovoradu. Mi ča smo ostali vonka gledamo tu ogromnu crikvu. Zaštitila nas je od Turcih. I nisu uspili fermat Križ, ni oni, ni kuga, kolera, španjola, ni Talijoni. Kad su Njemci mislili da su uspili, Bog je iti da se precesjun učini u El Shattu. Neće ga ni Corona fermat…

Došli smo do mora, mirno je. Somo čujemo dvo, tri broda koji se tornojedu iz Jese. Varbovjani koji su bili ispratit svojega križonošu Dinkota, pomorca. Bože čuvaj sve ribare i pomorce! Mi opet molimo Ruzorij, a Matij se pusti, korak mu je nikako lašnji. Dobro je don Branimir govori: "Do Varboske ti nosiš Križ, a od Varboske on nosi tebe." Eto nas u Vitarnjon, ali nema ni V od vitra. Fermat ćemo malo, ni potriba puno, niko ne govori da se umori. S druge bonde se vididu nike sviće, Ješonski grebi. Ivan je uputi "Isuse blaga i ponizna srca", mi odgovoramo. Pensomo da bi nas isto kogod moga dočekat na rivi. Kad ono somo bratimi u tonikima, čuvadu red. Od općine opet "Pomiluj mene". Na pjaci se don Stanko pokloni Križu. Prid crikvon isto bratimi, par svita, i dvo, tri policijota. Nikad nisu imali časniji i pobožniji lavur. Ista procedura u crikvi, nesmi nas bit veće od deset. Filka i teta Anka klečidu na skalima od šematorija. Nemoredu bit bližje svojemu sinu i unuku. Njima je i to dobro, zno Matij da su one uz njega. Ljubljenog Isusa prestante mučit, rante mi dušu...ori se iz crikve. Ovi sa pjacete se navirijedu. Brojidu koliko ih je unutra. Pari se da kanto cili Varbonj, a ne njih šest, sedan. Gremo ća, ma ne puten kako i obično. Vajo poć u Gospe ovo godišće, da nas Bog sačuva od bolesti. Kod nos to ni običaj, ovo je tek treći put ča se ponti da ćemo poć gore. Pripeto je. Mogli smo reć Leotu, Ivici i Magdi da dojdedu do gore, da se baren napijemo. Uspili smo, bez njih. I Škandeja je uspi. Pomolit ćemo se za sve koji su bolesni, za likore, medicinske sestre, sve koji se brinedu o nami. Učinili smo krug oko crikve kako i kad imamo misu gore. Dok ovi unutra molidu, mi vonka gledamo prima zapadu. Vidimo nika svitla. Je ono Varbonj? Je ono naš kampanel?

Klanjamo se tebi Isukrste i blagoslivjamo tebe...spušćamo se niz skaline. Nema stajanja do pjace u Donje Pitve. Sveti Jakov je tako daleko. Da ga je čingod privuć. Moremo mi to. Križ i molitva su tote. Pari nan se da čujemo pismu. Jesu ono Varbovjani izošli iz crikve? U Pitve nas čekadu ona tri. Malo veće ćemo se odmorit. Vajo donalit parafin u ferole. Nećemo ih gosit cilu noć.

Nojtežji dil puta je prid nami. Čekadu nas skaline u Gornje Pitve. Pomalo se uspinjemo, ni čo prišit. Ajme koliko proznih kuć. Bože, dones život u ova naša sela! Eto nas kod crikve. Oko ove vajo napravit krug ipo. Fola Bogu, uspili smo. Nikola i Marian su zakantali parvu štrofu. Crikva oldoje. Jesu ovo sini od Androta i Marijota? Imali su od koga naučit ovako lipo kantat. Andro i Marijo ponosno stojidu isprid crikve. Ovo godišće nosidu aidu. Vajalo se prilagodit situaciji. Oni su prikuntenti i sa tin. Oni, koji su nojveće putih kantali u zodnjih trideset godišć i koji su ovu mladost naučili štrofu po varbonjski!

Vrime je za partencu. Gremo pomalo niz skaline, da se ne zapletemo o tonike. Zaboravi san uputit Ruzorij, Marijo mi napominje. Pari mi se da iman manje arije nego pri tri, četiri ure. Okrićen se, kad u dajini vidin dvi sviće. Dvista, trista metar od nos. Pari mi se da san te sviće vidi i između Varbanja i Varboske, i u Vitarnjon, i uz Pitve. Ko bi to moga bit...Ruzorij je gotov, i kroz par minutih smo u Vrisniku.

Stali smo, za ćapat ariju, još tri crikve su isprid nos. Pasojemo kroz Vrisnik, isto je kogod izoša na ponistru i na dvor vidit Križ. Eto nas pod čempriše. Kako lipi prilaz crikvi imadu! Užo ih bit dosta na dočeku Križa, bićedu i sad tamo. Kad ono somo redori. Svaka čast svitu. Svak poštije Križ. Noge su nan sve težje. Ma nećemo sest, stojimo nanoge. Dinko je uputi O biči preljuti...je ovo kanto ili plače? Dira u dušu. Poznoti su nan oni glosi. Siri, Šendik i Ivan doju sve od sebe. I veće od tega. Mora se iskantat kako da je crikva puna. Dvo odgovoroča isto. Kantaduri lagano pratidu, vajo odmorit glose, njima je nojtežje. I Matij kanto. Parvi je tenor naše klape u Vancouveru.

Sveti Onte, gremo ti ća. Doć ćemo opet dogodišća, ako Bog do zdrovja. Križ siguro hoće. Vajo odma uputit Ruzorij jer Svirče ni daleko. Pasali smo kurota kuću i počeli se kalovat. Puno je kolih, lako se zagubit. Jesmo ovo falili put? Došli smo do glovne ceste. Malo pri nos, pasali su kantaduri s auton. Stjepko je bi žveltiji nego mi kroz Vrisnik. Isprid jedne kuće izošlo je par ženskih. Na kući je križ. Križonoše Prošpera kuća. Kandiliri i Jure dobro paletodu. Usporavamo ih. Da daržidu socijalnu distancu. Okrićen se da bi vidi je koga iza nos. Posli Teota i Josipa sa ferolima ni nikoga. Somo nike dvi sviće u dajini. Prid Svirče se već čujedu kokoti. Kotlina dobro vuče. Sakrit ćemo se prid uljaru da ne ćapomo u kosti. Nećemo puno stot. Leo, Ivica i Magda moredu pud doma. Obavili su svoje.

A mi gremo u Svetu Mandalinu. Ima čogod svita po teracima. Još malo i njihovi Svirčani ćedu doć. Nos prid crikvon čeka don Toni. Don Mili je u Varbanju. Dvo policijota i par judih. Umorni smo al ćemo izdurat. Kad moredu Matij i Tonči cilu noć klečat, moremo i mi stot nanoge. Slušamo odgovoroče. Luka Tresić parvi, a Luka Ljubić tek drugi put odgovora. Stjepko je sto u sridu i vodi ih. Marko je nojiskusniji, ma ni moga doć iz Splita. Vražja Korona! Ali dobri su. Sve boji i boji. Kako noć gre kraju pustili su se. Imat će ko kantat i dogodišća.

Gremo ća. Storin puten priko barda. Svrotit ćemo u gornju crikvu u Svirče. Izmolit pet očenaših. Lako ćemo se zbit na pjacu. Ne kako pasonih godišć. Pogledaj molimo te Gospodine na ovu obitelj svoju...zodnji uspon i onda je sve lako. Ostali smo na jednon aidi, Marijotu se izgosila. Ma ni nan ni potriba veće, razdanjije se. Navar barda Ivan uputije „Isuse blaga i ponizna srca.“ Tako ćemo do Sarca Isusova. Škrabatodu! Vidili su nas. Dohodimo u selo, a kod malo koje kuće da ni ko izoša. Činimo krug oko crikvice i molimo Očenaše. Don Mili je s nami. Svakomu je suza u oku. Od Sarca Isusova do crikve kantomo "Pomiluj mene Bože". Vajo dat sve od sebe, kako i cilu noć. Nos petnaste je išlo u precesjun za sve vos. Ponizno, pobožno i ponosno!

Kod crikve su redori, fola Bogu nisu imali posla. Još je kogod imo žeju doć. Gremo se na grebe jovit našima mortvima. Andro, Marijo, Dinko i Ivan kantodu in štrofu. "Martve duše ti sahrani..." Krug oko crikve i tamo smo okle smo portili. Kantaduri ćedu otkantat jednu štrofu veće. Od velega petka. Popodne ni precesjuna. Na "zlamen" Matij vazimje Križ i u crikvi doje blagoslov za one koji su tote. Sa dvo ceroja gre stavit Križ na svoje misto, na oltor Svetega Križa. Ali ne! Križonoša izahodi vonka i na šematoriju doje drugi blagoslov. Blagoslov cilemu selu i cilemu svitu. Ovi momenat će se pontit, zauvik! Nikad nismo imali dvo blagoslova ujutro. Napokon Križ dohodi na svoje misto i precesjun je gotov.

Križ je hodi!!! I judi s njin, niki puten, a niki sarcen i molitvon.

Sveti Križu, čuvaj nas!

Svet Križu, moli za nas!

Ufamo se u te!

Za Križen 2020 godišća hodili su križonoša Mateo Bratanić u pratnji oca Tončija Bratanića i Antuna Vidoševića Škandeje. Kandilire su nosili Antonio Škarpa i Tin Lušić Bulić, a ceroje Vinko Petrić i Mario Pavičić Ivelja (parvi), te Dinko Pavičić Donkić i Juraj Račić. Feralisti su bili Ivan Vidošević, Teo Bratanić, Josip Srhoj i Josip Vodanović. Andro Matković i Marijo Lušić Bulić su imali dvostruku ulogu, redori-aide.

Štrofe su kantali Nikola Matković i Marian Lušić Bulić, a odgovorali Stjepko Račić, Luka Ljubić i Luka Tresić.

Za popudbinu su bili zaduženi Leo Matković te Ivica i Magda Račić. Tote nikud bili su i Filka i Anka Bratanić.

Fotografiro nas je Marko Vucković.

U crikvi su ostali don Mili Plenković, snimatelj Pero Razović, te fabriceri Nikša Vidošević i Pero Fredotović, zaduženi za dočekivanje Križih i higijenu crikve.

Redori oko crikve bili su Andrija Čubre, Mario Pavičić, Dinko Pavičić Ivelja, Luki Ljubić, Milivoj Čubre i Marko Buratović.

I za kroj želin reć jednu stvor. Judi koji su se nojveće borili i izborili da precesjuni gredu sa veće od pet svita su gradonačelnik Grada Starog Grada Antonio Škarpa, predsjednik ješonske bratovštine Presvetog Oltarskog Sakramenta Miko Belić i dugogodišnji varbonjski kantadur i križonoša iz 2010, Marijo Lušić Bulić. Mnogi dobri, virni i razumni judi su izošli u susret. One koji su saplitali nogu, a sad se hoćedu pridstavit kako spasiteji, ni vridno imenovat. Fola svima!

Sastavi administrator župske stranice i ponosni feralista Josip Vodanović