Blog Vrbanj

Vela bonda se ne zaboravije.

Dorž je, ovako vrime budi sjetu i nehoteć naviru uspomene. Živen već 32 godišća u Gorici, iman krasno i dobro susidstvo koje mi je uvik pri ruci, iman kuću lipo uređenu i na lipemu mistu, iman vartle, iman i pogled na Stranicu mojega ditinjstva i crikvu, iman igralište za balun, zog od balot, butigu. Ma iman sve ali niman već ditinjstva i mladosti, niman već oko sebe one jude koji su živili u Gorici a i u mojoj kući a to čovika nojveće veže. I zato misli odlutadu onamo di mi je bilo nojlišje, di još nison zno ni za bolesti ni za umiranja, di san prove lipo ditinjstvo, sritnu mladost, okle san hodi na svironje, okle san se zajubiva i hodi u serenade, odlutadu u Velu bondu mojega ditinjstva. Dojdu mi upamet svi. I pisma u Stipećovih, i armoniga Marijota i tamburica Ivota u Bujolovih, i bombardina koju vježba Miko Picolin, i truba iz Briškulinih, i Matkota armoniga iz Tresića dvora. Dojde mi nehoteć u misli i ganga Vlasih navečer nakon teškega lavura kad se skupidu na Pjaci, i šušur dice priko velikega odmora, i vika od igronja na balun na betuniću ili priko Pjace, i pisma iz bufeta, i šušur baloterih iz Ravnice i barba Onte Gutin kad se uzviče " Ala ribeeeeee", I teta Petra, teta Morica i barba Petar, teta Seka i barba Petar Ružini, Antun Kume i mat mu Vica, Vica i Barnaba Kekotovi sa Tomasen, teta Vinka i barba Morko i barba Dinko Bujolovi. Dojde mi napamet cili raseljeni Rozov dvor di Rozovih već ni. Dojde mi napamet i pogled na poja od puta za Ivončeve njive pok do Varboske, i pogled na Broč od Vidovice pok do navar Bola, i pogled na konol i vapor za Jesu kad bi digod radi vitra iša vanije u konol, i osvitljeno Primorje i svićarice, i Remik na zapadu i Gvozd pod oblacima na jugu, dojde mi napamet bura koja je tresla zide store kuhinje koja se nikako ni mogla steplit, dojdu mi napamet i ledi i mosuri u Rozovon koli, dojdu mi napamet otac i mat u još punon snogi, sestra ka dite, naša dobra teta Bona i šušur dida kod lambika ili rano u konobi kad bi jo još slotko spo. Dojde mi napamet i pokojna nona Mila koja je rano umorla kad san imo četiri i po godišća i pontin je po somo nikoliko sličicih a nojveće po temu ča je volila čornu kafu. Još je vidin u storon zadimjenoj kuhinjici di bruštuloje kafu i kad bi bruštulovala dola bi mi teplo bruštulono zarno za grist a zvo san je, ne znan radi čega, "nona Ćića". Dojdu mi napamet judi koji su izjutra sidili ispod Jurondetove kuće a pridnoć uz Stipećov vartal, dojdu mi napamet i oni ča bi u litnja doba ka i moj otac seli prid podne u hlad na zidić ispod oštricih i stavili nogu priko noge. Sve mi to dojde napamet ali tega ničesa već ni. I zato nikad ni ne gren u Rozov dvor ni na Pjacu. Kuću nison otvori od 2006 ali niman brige jer čuva je kip svetega Antonija na didovemu komu. Ne pripadan već današnjoj Pjaci jer ni onih koji me vežiju uz nju. Pason digod ali se ne fremojen. Pitadu me digod bil se opet vroti u Velu bondu di san živi 35 godišć. Bin kad bi tamo bili svi oni od pri ali bi onda vajalo zaboravit ovu kuću i ono lipo ča se je u njoj dogodilo jer grubo se ionako zaboravi somo od sebe. Vajalo bi se rastat od uspomenih i susidih iz Gorice i opet bi bi na istemu. Opet bi mučile uspomene. Zato neka gre kako je zapisano ali nikad u Gorici dorž kad pada po krovima ne sviri tako lipu melodiju, nikad bura ne kanto tako lipu pismu i nikad tarmuntona ne vonjo kako u Velon bondi mojega ditinjstva.