Blog Vrbanj

Zog od balot je sad bome u Gorici i svi znodu di je. Ali malo nas je još koji se spominjemo i storega zoga od balot, zoga na Ravnici. Zog je bi otprilike od tadašnje carkovne kuće, od zida od vartla pok gore pud Donkićevih do početka uzbardice. Današnji baloteri kojima vajo svaku stinčicu maknut a i polit zog da in balote ne gredu ukrivo ne bidu ni zaigrali na ti stori zog pun stinčic a apožito na donju bondu prima Pjaci. Gore navar je već bilo i malo sarbuna. Nison baš puno hodi od nedije i sveca na ti zog jer ka dite san imo i prišnijega posla poć se digod igrat ali bi iša digod sa didon i pontin store zagadure a apožito Donkićeve, Ivančića i Gargura a bome i Ivana Kišinega. Puno mi je u očima osto i Marijon Puhov ali ne toko radi igre jer nisu me balote nikad interesirale nego zato ča su ga zvoli Marica Puhov i to mi je bilo ka didetu čudno da ima ženskino ime a apena posli san mu ka već veći dozno provo ime. Ni na temu zogu bilo regatonja jer se po savuri ni moglo regatat nego se je igralo na bumbiz i tuklo. A bome bilo je balotih svukud i po vartlima a nojveće bi ih išlo i do Pjace kad bi se iz bonde od Bonskega doca tuklo prima dole. Mi koji smo ka dica stoli blizu Ravnice smo veće onde igrali na balun a balote nas nisu baš interesirale. Još mi je u ušima vika po ravnici i oni šušur kad bi svak od malo starijih ko se je ufa od nedije popodne izahodi probučen na Ravnicu. Stariji su sidili na betunonon skalini uz Donkićev vartal ili na kojongod stini uz zid vartla kako na donjoj sliki sididu Nade Ivejin, Ivon Milošev i did Perko, mlaji na zidiću od vartla a debondu zoga prima istoku ni bilo mista za sest nego se je stolo nanoge Posli obida od nedije did Perko bi se probuka, vaze jednu balotu koja je stola u ponari portuna od kuće i porti ali ne znan zoč je vazima balotu jer nikad ni igro. Bit će tako da ne gre proznih ruk :D. Dok san bi baš molo dite bi bi i mene vaze za kumpanjiju ma posli smo mi već hodili put šetnje Za Gorice. Većina od tih ča su okolo sidili nisu ni gledali igronje nego su se razgovorali jer ta nedija ili svetac su nakon cile šetemone teškega lavura bili in jedino misto di su se mogli noć. Hodili su oni i pridvečer na Pjacu sest ispod Stipećovega vartla ma somo oni stariji koji već nisu bili za upoje a ovi kako moj did ča su se još ufali lavurat bi bili priko šetemone umorni za izoć na Pjacu. Jedino u kasno primaliće i lito kad su veliki doni a kad bi se ranije, još za vidila došlo iz poja bi izošli sest kod spomenika na skaline. 1972 u lito se je napravi zog u Gorici ma još se je niko vrime igralo na dvo zoga ali ne puno i Ravnica se je pomalo zapustila tako da se mlaja generacija Ravnice ni ne spominje i evo somo ovako malo, a ideju mi je do Leo od tete Mare Rozove, da noton uspomene na nju.