Blog Vrbanj

Moja generacija 52/53/54 je u nos frajala dvo karnovala. Parvi na sedan Vejače 1978 u kući na Pjaci a drugi na tri Morča 1987 u kući u Gorici i oba karnovala pontin po velikoj hladnoći. 1978 didu Perkotu je bi sprovod desetak don pri karnovala ali otac je iti da se frajo u nos baš zbog spomena na dida koji bi da je poduro bi ka veliki veseljok i čovik od kumpanjije sritan da mu je zenso dove kumpanjiju doma. U garaži se je namistilo bonke za jiće a odma rano se je prid peć od kruha naloži komin i za peć meso a i zato ča je odma ujutro bilo hlodno jer je bilo oblačno i puhala bura levantora. Već poza podne je i uz ogonj bilo zima i nonci višak alkohola ni moga nas steplit pok se je izvadilo iz ormarunih sve kapote i zimske jakete ča su ostali iza dvo Petra Rozova, iza mojega i Stipetovega dida i to se je razdililo koga je uspilo dopast. Za obidon nikomu je palo napamet da bi se moga učinit sprovod Juretu Karnovalu i mi ne budmo lini nego se je islo u butigera, ma sad se ne spominjen jel još mješovitu robu prodovo barba Mile ili je već Dinko Remetin bi poče, i kupilo se je dvi osmrtnice i čorne robe za mahrame za tugujuće. Teta Lučica mi je u Zadrugi na makinu ispisala osmrtnice pokojnemu Juretu i jednu smo po običaju stavili na pol od telefona ča je bi na autobusnoj stanici uz zid od šimatorija a drugu na pjacu na istočna vrota od podruma di je sad butiga. U garaži je bila kašeta od Sigalija na koju smo pridili dvo komada mezomurola za ruceje i stavili priko nje čornu peču. Tugujuća fameja su bili Damir i Matko Mihovilovi i oni su stavili mahrame a mi druzi smo se omaškarali sa sajima izmišanin sa ujen da boje darži čarnilo. Kako Jure Karnovol ni bi od crikve vajalo je ormat i mužiku od late. Vinko Marinčev je iz konobe izvuka latu od targanja i sprovod je porti niz Bigvira uz plač i obojkonje kako je tad još bi običaj. Onako svi zakabanoni u kapotima jer je baš bilo hlodno smo priko Vira portili pud crikve a mužika od late je uz Vinkotovo lumbardonje komadon česmine po lati od targanja i moje puhonje u storu trubu od limene glazbe pratila sprovod. U butigi smo bili vazeli i šest proznih  tubih od kartuna na koje je inače bila namotona roba na metre i to su bili ceroji. Kad smo došli kod crikve a već je bi skoro sut poče je paršit snig i mi smo skoro tarčeć priko Poddoca i uz Pločine sa to kašete intrali u solu di su Miko Paršutić, Andrija Balić i Frane Jokić uz već punu solu bili počeli bez mene tonce pri večere i jo san u ono didove kapotine skoči na pozornicu svirit a kumpanjija je klekla nasrid sole oko te kašete i uz Nadeta Vidoševega kako kurota se je učinilo i misu za pokojnega Jureta Karnovala. Snig ni puno pada ali je bilo toko zima da nismo jili kozlića u garaži za bonkima nego svi zbijeni sidili oko komina. Posli večere somo san jo iša na tonce jer mi je vajalo svirit a svi drugi su ostali uz komin. Ni uz lipu miru vina ča se je popilo nikomu se ni prozebivalo.

1987 nediju pri karnovala san ravno zemju isprid kuće u Gorici da se more intrat jer je bilo dogovoreno da fraja bude u mene i stisla su me škina, iša san odma leć i radi škinih nisin ni bi u fraji ali su mi sve isprovjali pok znon. Ploča je nalivena na tri parvega i somo san kad san skalo kašune uspi stavit zatvore ali bez telerih i ništa ni oko okvirih bilo asetono. U parvidon večer je noglo zahlodilo, puhala je donima bura tako da su desetak don ledile cijevi od vode a govoridu da su cili torij unutra u kući ložili ogonj u dvo voža od 200 litar ali kako je od svukud propuhuvalo ni moglo pridobit i smarzli su se unutra. A u nediju san u košuji ravno zemju kako je bilo teplo. I kad već spominjen tu zimu na tri Jenora kad smo nalivali ploču bilo je krasno vrime ali već večer je zahlodilo i velika hladnoća je trajala desetak don uz sledenivene cijevi od vode u Rozovon kući na Pjaci. Bilo je u ta dvo refula hladnoće i puknutih blokovih od motorih na autima ali jo san imo Zaporošca sa zračnin hlađenjen i baren te brige nison imo.