Blog Vrbanj

Contact email: [email protected]

Blog Vrbanj

Na autobus prid noc 60-ih u Varbanju

Posted on March 29, 2019 at 6:45 AM

Čekanje autobusa, novina i pošte 60-ih u Varbanju

Za mene ka već malo veće dite u višin razredima, a i za druge malo starije muške, jedini dnevni događaj u mistu je bi poć na autobus vidit ko je bi u Splitu i poć na poštu vidit jel komu čo došlo, pismo, dopisnica ili paket. Bilo bi nas i po 50-ak i bili bi se pridvečer kad je dohodi autobus iz vapora, a to je bilo oko 5 urih a i kašnje i zimi je već bila morkla noć, skupili na stanici, zimi se i tresli i ćakulali čekajuć autobus. E onda se je gledalo ko je izoša iz autobusa, stariji razgovorali ča će reć da je niko bi u Split, jel u likora ili čo kupit i bilo bi se gledalo ča kondukter vadi iz prostora autobusa za bagaje. Na parvima molima autobusima koji su hodili priko rive do vapora isprid općine u Pajizu bagaji su stoli na krovu autobusa u jednon ogrođenon prtljažnici i kondukter bi se pope i skalovo svakomu svoje. Ovi posli malo veći su imali one bunkere ispod. I bome tote se je vidilo jel ko čo kupi i odma bi stariji to komentirali. Non dici ni bilo to toko važno nego nan je nojvažnija bila vrića od pošte koju je poštarica dohodila vazest jer u njoj su bile novine za čitovnicu a i pošta. A bome i paket ako je kojigod doša za Varbonj bi se tad bi iskarco. E a sad smo se odma svi prihitivali u poštu. Ni bilo važno hoćeš čo dobit nego parvo da se ne tresemo vonka, drugo nastavili bi se diškorši početi na stanici a i kurijožitod jel ko čo dobi, paket ili pismo. Meni je otac ta godišća živi u Ljubljani i obično bi jo njemu piso u parvidon komentirajuć utakmicu Hajduka a odgovor bi dobijo drugi parvidon ma san isto svaku večer hodi jer baž je moga pisat čogod napose materi jer inače je pisma za mater i za mene stavija u istu kuvertu. A moglo je doć i za dida niko pismo iz Amerik ili od ćerih iz Splita. U pošti je tad lavurala Ljeposava Brnin Lušić Mihovilova a zvoli smo je teta Ljepa i ona bi raspakirala vriću u onon prostoriji iza bonka, poštu donila na banak i onda bi počela prozivat po imenima i kroz gužvu bi se probijali vazest svoje a za paket bi somo rekla da ti i ti ima paket i on bi čeka dokli se pisma podilidu za ga vazest. U doba od Božića i Nove godine ni se moglo intrat u poštu, a pošta je tad bila di je i sad, koliko svita je čekalo. Ako se je dobilo čo odma se je torkalo doma odnit a ako ni hodilo se je u čitovnicu jer u vrići od pošte su bili po tri primjerka Slobodne Dalmacije, Vjesnika i Borbe. Mlajima je bilo važno odma pročitata novitodi od sporta, malo prodiskutirat o Hajduku a stariji bi došli po večeri i čitali politiku. Jo san sto blizu na Pjaci i obično tad nison moga doć na red za pročitat ma bi zato sutra popodne kad su drugi bili u poju na komodu čita. Čitovnica je sa nikoliko stolih i sa škomlima bila di je sad  velika sola za vjenčanja. Uz zid prima soli su bili isto škomli a  u zidu je bilo i jedno udubljenje sa višalicima za jakete i obišenin onin aluminijskim daržočima za novine da se manje kidadu i da ih je praktičnije čitat jer sve novine su tad imale veliki format. Kad je u tu prostoriju došla televizija čitovnica se je prihitila u onu manju prostoriju iza a cila vela prostorija se je populala škomlima i isto puno putih ni bilo mista ni za sest pok bi, a naročito kad je bila koja utakmica, festivol ili humoristička serija, mi dica sidili isprid parvega reda po klehu. E, uteka san malo od pošte ma da se vrotin nose. Do kad je ti običaj čekanja na autobusu i judih i pošte traja ne znan jer san 1967 iša na skule i kad san se 1977 vroti već je poštarica, a tad je već bila Alma Biličić, pri kraju radnog vrimena poza podne raznosila poštu po mistu. Ne znan kako je bilo pri i jel i tad poštarica nikima starijima nosila poštu doma, ma bit će ako in ni imo ko doć po poštu. Pošta se je prihitila na misto di je sad tamo početkon 60-ih a pri je bila u carkovnoj kući na autobusnoj stanici. Odma na livo vrota kad se uspne uz skaline. Bi san moli i ne spominjen se nikih detaljih ali bi je hodnik di se je čekalo u redu i na hodniku velika zidna korta Jugoslavije a ured je bi na livo. Odma kako se intro u hodnik su sa live bonde bila vrota od ureda a malo daje purtela za lavur pošćera sa judima. Ko je tad bi pošćer ili pošćerica ne znan. E pačenko, jedino iz pošte se je moglo telefonirat pok bi se išlo u kabinu, pošćerica bi nazvala i spojila vezu u kabinu. Varbonj je imo somo jedon broj telefona a još su bili telefoni u Zadrugi i u Mjesnemu uredu ali oni nisu mogli birat nego bi nazvali poštu i pošta bi birala i spojila jin. U mjesnemu uredu i u Zadrugi dok su kancelarije bile u Tutejinoj kući je bi telefon bez brojčajnika sa manicon za poziv pošte. U novon zgradi Zadruge je od početka 70-ih bi telefon sa brojčanikon jer je Zadruga dobila poseban broj ka dvojnik na istoj liniji sa pošton pok istovremeno nisu mogli koristit liniju i pošta i zadruga ali za jutu potribu kad ni pošta lavurala se je moglo zamolit službenika zadruge za upotrebu telefona. Pisma i dopisnice bi obično hitali u škrabijicu isprid pošte jer se je bule, dopisnice i kuverte moglo kupit i u butigi mješovite robe a pakete se je omotone u bili ili plavi pak papir i vežene špogon na koji bi se na grop stavilo otopjenega čanjenega cerodešpanja dovalo na pošti di bi pošćer još na misto na špogu na bondi od adrese nali i dosta cerodešpanja i na još tepli utisnu timbar pošte ka službeni znak. Ti vonj topjenega cerodešpanja koji se je topi plamenon šterike da otopjeno pada na grop a onda bi se nožen smočenin u vodu ga pripleskalo doklec se još ne stvardne mi je još u nosu koliko je ditinjstvo ostavilo te uspomene koje nikako izvitrit. A u nosu mi je i nikad neće izvitrit i vonj otvoronja Božićnih paketih sa Jaffa narončima zamotanin svaka u svoju kortu i kojongod ćikoloticon i škatulicon galetic a i otvoronja paketih iz Amerik sa kojongod za njihove potribe iznošenon ali za nos još kruto sačuvanon robon koja je imala niki vonj ča se je stavijalo u paket da žagrice ne introdu. U višti mi je i otvoronje amerikonskih kuvertih sa po rubima čarnjeno plavin štrikima u kojima je obično bilo nikoliko dolorih u korti po jedon ili dvo dolora i već napisano komu ih dat. Ta pisma su se čuvala i čitala puno, puno putih umisto razgovora sa dicon, tetima, barbima koje već teško da će se vidit u živo. Stariji ovo sve znodu ma eto da se zapiše za mlaje ako koga interesira.


Categories: None