Blog Vrbanj

Tamo 1977 do 1980 u Varbanju se je ništo bi pokrenu kulturni život reaktivirala se je dramska sekcija pod vodstvom Slaviček Ignaca i oformila folklorna sekcija koju je vodila Nada Pavičić Kotina. Jo san bi ka niki organizator i kad ni šjor Ignac moga doć na prove dramske sekcije jo sam imo zadatak to vodit umisto njega. Glumac nan ni falilo a apožito glumicih. Svaka divnjica je bila aktivna ili u folkloru ili u dramskoj. Nikad nijedna ni zakasnila na prove koje su se odaržovale u gornjen razredu prima Stipećovima. Jo bi bi s njima dok malo provodu ma ni od tih provih bilo ništa. Isprid skule su dohodila auta sa mladićima i svaka je svaku malo hodila na ponistru vidit jel njejin još doša. Kako se je gornji kat skule vidi iz daleka moja obaveza je bila da daržin svitlo u razredu upoljeno baren jednu uru nakon ča finidu prove. I bome doma svi kuntenti, svitlo gori, ćere su još na provima a ćere već odovna svaka u svojen fićotu sa svojin mladićen. Jo san mučo i čuvo tu veliku "tajnu" za koju su matere siguro znale ma ocima se ni govorilo a evo sad napokon mogu reć da san i jo "kriv" za koji sklopljeni brak. Mia culpa