Blog Vrbanj

Zovnoć Na Jurića Nad Basinu.

Na Jurića Nad Basinu di imadu materini je u moje ditinjstvo bi posve drugi ugođaj nego u Rozovon Punti. U Punti ni bilo zemje niti za pomidoru usodit ni vode depju, ni društva jer smo bili na osami ali je bi lipi pogled na more i Broč, bili smo u vali i mogli se kupat i vozit kaićen kad smo itili. Puho je meštrol i burinac. Kućica za beštije je bila jedva visoka da se tovarčić more uvuć ili da stanu dvi koze, kućica za spat je bila mola a kuhinja je bila jedna mola tezica na jednu bondu otvorena jedva da se unutra more naložit ogonj. Bila je u kućici jedna škrinja u kojoj se je doržalo malo uja, kvasine, soli, cukra, divke, maništre, rizih da se ako ne bude ribe radi grubega vrimena ili se ne more doma radi darža ima čo za izist. Na Jurića je bilo posve drugo. Parvo bilo se je puno bližje Varbanju, bilo je dosta susidstva, Budrovići iz Gorice, svi Gašperinovi, Tripetovi, Stipećovi, Gujičini, Turići a i uvik je niko pasovo sa živin. Kućica je bila malo veća a kuhinja je bila opose i u njon mista za komin, za stolić a i velika ponara sa vrotima u kojoj se je doržalo provištu da miši ne introdu. Dvor je bi popločan i na dvoru veliki stol od stine a bili su i dvo vela trima i to jedon za trovu a drugi sa malo dvorića za živo i koze. Od bure su štitili bori a meštrol se ni ćuti nego somo tarmuntona. More se ni vidilo nego je vajalo izoć do Stipećove kućice za ga vidit. Gustirna je bila veća a bila je i još jedna daje od dvora. Oko kućice je bi veliki komp sa obradivon zemjon di je bilo maslinih, lozja, višnjih, umendulih, jabukih, kruških, smokvih, pomidorih i druge frutarije a u dvoru veliki umendul ispod kojega bi se prileglo od popodneva dok malo ne pode sunce kad bi se žanjalo levondu ili brolo višnje. U Basini naši dok san jo bi dite nisu ništa imali nego su ordenje za brod i vorše doržali u Cvitića konobi. Dice okolo je bilo dosta za se igrat i nikad ni falilo kumpanjije. Bilo je i borih za se igrat u hlodu ali sve je to veće ličilo na život u Varbanju u Stranici. Naši iz Stranice nisu imali običaj poć od subote zovnoć i onda ostat ujutro na ribe ili na kuponje nego se je tamo hodilo za lavurat i ostavalo po nikoliko don spat da se ne dangubi hodeć do Varbanja pok bi i mene liti bili vazeli sa sebon. Bilo bi se digod i išlo onako zovnoć ma malo. To je nojveće hodi did Ivon sa barba Ivanon Krovatovin iz Dola, od neviste Line mu ocen. Did Perko je voli more i kajić ma didu Ivanu ni bilo puno briga. On bi iša na lupare, na motu na hubotnice, hiti koju voršu po rivu u Basinu ma nikad ga nison vidi u brodu. Njemu je ka lovcu bilo važnije ubit kojega puha i tote mu je Ivon Krovatov bi kumpanjun. Oni su lovili i pekli puhe i provovali mene nagovorit da ih jin ma nisu uspili. Barba Marko je voli more i ribašćinu na vorše ali ga nikad nison vidi da se je smoči u moru. Kako su tete Lučica i Ružica volile čitat uvik je u ton kućici bi koji libar i meni nikad ni bilo dosadno. U Rozovih je bi i tranzistor ma u Budrovićih ne jer niti did a niti barba nisu baš bacelali za vijesti i za mužiku. Malo prenos utakmice i to je sve. Tad san još uvik bi jedini unuk i kumpanjije od rođaka i rodicih ni bilo a jo san bi mezimac svih u Stranici. U Rozovih je bi običaj kad se ide zovnoć tek poza podne partivat nose a Straničari bi već u deset imali običaj bit u Varbanju. Rozovi bi očistili ribu odma na moru a Budrovići bi je donili doma neočišćenu i onda bi teta Morica i nona čistile i dovale dile maškima. Ako je barba Morko imo čo posla za spravit oko poja na Jurića bi bi iša od popodne i vaze mene za kumpanjiju a ujutro bi sa njin iša dignut vorše jer nikad ni hodi a mene ostavi spat nego ako je baš bilo grubo vrime. E to dizanje vorših mi se je nojveće i urizalo u ponćenje. Uvik smo se dizali rano i onda suputnicon do Basine, na vesla do vonka Basine (posli je i barba nabavi pentu). Obično bi sunce apena isticalo iza Bijakove a mi bi već bili na pošti od vorših. Kako je bilo lipo ujutro na moru u ono tišine dok sunce ističe. Rozovi su imalo malo pletenih vorših i veće smo koristili one na sarce gvozdene sa mrižon a barba Morko je skoro sve imo pletene koje je hita vezane po nikoliko sa konopon i onda je bilo puno lašnje zadit ih rančikon jer je bilo dosta bilo di konop zadit. Obično ih je hita dvo sinjola, jedon na sarbunjačinu iza punte od Rosohotnice a drugi blizu Zečeva. Kad bi digli oba sinjola vorših i vrotili ih nose obavezno bi se iskarcali na Zečevo i ubrali ono suho plavkasto cviće ča puno duro i ima ga somo na Zečevu. U darvene vorše se ni hita abrum nego somo u gvozdene a posli je i barba Marko nabavi i gozdenih ali one okrugle sa dvo saćca. Na gvozdenima voršima su bila vrotica vezana žicon kroz koja bi se riba istresla a na pletenima voršak zatvoren čepon od grančic gluhoča i fremon spicon kroz voršak i kroz njega. Kroz ti voršak bi se riba istresla u bokun sićica sa malo mora. Jedino je vajalo stot atento ako je bi koji pauk i imat sa sobon oštru britvu i odma mu oni rogaj ča bode osić da te ne ubode dok repa po siću jer je bi otrovan i ruka bi pomodrila i natekla donima posli. I tako oko osme ure bili bi već u Basini, ostavili ordenje u Cvitića konobu i nanoge na Jurića. Posli je i barba ugrodi kućicu uz more ali tad san već bi veli i nison nikad u njon prispa. Na Jurića ni vajalo iskat živo jer je bilo zatvoreno u dvoriću trima i moglo se je učas parićat za partencu. Ribu bi se stavilo u vrićicu, ubralo i koju pomidoru i pomalo pud Varbanja. I drugi iz Basine su imali običaj poć na Velu misu pok je usput bilo dosta svita na živemu ( a bome i ovde stariji na sedlo a mlaji na guzicu). Ni did ni borba nisu imali veliki običaj hodit u crikvu ali bi se probukli i izošli do crikve malo se vidit sa sviton pri i priko mise a did Ivon bi digod mene odve na misu ma i to ritko jer ni bi pacjenat stot na mistu u crikvi. I tako posli mise bi obidvali ča su nona, teta i teta Lina parićali i jo bi pomalo partivo doma u Velu bondu. Nona i teta bi obično hodile na Večernju a jo sa ocen Za Gorice u šetnju. Pasovali bi udaj di mi je sad kuća i gledali Kapitonov balkon pun cvića. Ti balkon se je vidi i iz Stranice iz kamare none i dida a kako san malo bi po Gorici to mi se je činilo čudo.....balkon u selu! Nison moga ni promislit tad da ću ti balkon gledat svaki don po cili don a ne somo od nedije popodne.

Na slikama ispod su dvor, kućica i kuhinja iz teksta. Slikano 2005 dok još korov nije prikri dvor a sad je već nemoguće intrat u dvor. Veća zgrada je kućica za sponje a manja kuhinja sa kominom. Između nih je gustirna. Isprid kuhinje se vidi skalina od stine ali ploče stola već ni. Iznad stola je bi tabor od gronih bora za hlod. 

ž

Petromas na petrolij kojega bi se večer bilo takalo da se vidi. Ovi na sliki je novije izrade i koristi plin.

Basina mojega ditinjstva, slikano pri 1965

Budrovića kuća u Basini. Na slici se vidi lijevo mala kuća koja je prva sagrađena, do nje desno nova trokatnica. Ovo je snimka iz 2007. Postoji iznad ovih kuća još jedna dvokatnica koja je sagrađena 2014.

Ja i barba Marko slikani u našoj kuhinji 2006, te did Ivan Budrovića i barba Marko. Did Ivan rođen je 1868 a umro početkom jeseni 1967a barba Marko je rođen 02.05.1929 a umro je 11.08.2014.