Blog Vrbanj

Zovnoć u Punti!

Subota je, sveti Ivon i još je poslih od poja a dohodi i levonda i ni se još stolo u valima ali bi otac ili did bili rekli: Periću hoćemol večeras zovnoć u Puntu. A Perić bi to jedva dočeka. Uzbuđenje u meni još pri obida. Odma po obidu bi se osedlalo živo, vazelo u vriću malo spize za večeru ako u voršima koje su ostale od pasone nedije u moru ne bude ribe, malo kruha i oko 3 ure pokret. Did ili otac na sedlo a jo na guzicu konja. Obično se je u Puntu hodilo puten priko Križica i kroz Medoja. Čin bi došli do Šaltura kućice već bi sarce počelo živje kucat a kad bi došli do Stipećovega i otvori se pogled na konol i valu Basine ogromna srića bi ispunila dušu. Vidili smo mi more i iz kuće u Varbanju ali to nismo nikor doživljavali ka pogled na more ali ovo, pogled na Primorje i koji brodić kako jidri po meštrolu e to je bilo ono dičjemu oku drogo. Fremali bi na Jurića da iz trima od materine fameje vazmemo malo abruma za u vorše ča smo ga donili iz fabrike u Varboski. A abrum su bile posoljene glove od sardelih ča su ostavale nakon čišćenja sardelih za pakovanje u sardine. I onda uz put ako je tamo bi ko od Budrovićih i Gašperinovih progovorit koju rič i introje se u istočna vrota od Punte. Kako se je hodilo bližje moru uzbuđenje je reslo a kad bi se otvori pogled na Bročki konol i Bol eto sriće i čudnega uzbuđenja koje bi žbrufalo kad bi vidi dvo reda kup navar krova naše kućice. Kad bi došli do dvorića oko kućice, raspartili bi živo, unili stvori u kućicu, doli živemu lokat, sapeli ga u parvu i zodnju da teže uteče i pokret u valu. Ako je bi otac on bi vaze pentu na rame ali didu je to bilo teško i radije je dupero vesla. Čin bi se malo skalali, a do mora u Oskorušici je bilo oko 150m, i vidili Bočac na bondu od Givnika eto veselje i srića. Uvik mi je posli kad san bi već veliki bi gušt slušat Olivera i pismu "Rojena valo, lipo moj živote". I onda pomalo skočit u kajić, unit vesla i rančik i to abruma i poć dignut vorše ča su ostale u moru od pasone nedije. Uvik bi bilo ribe u voršima (mriž još nismo imali) ali je znala bit usmardivena ako je već koliko don krepana jer bi veće ribe u vorši izile manje. Vorše smo za ušate i ciple hitali u Bočac, ispod našega na puntu od Mole Oskorušice di su u moru bili ostaci jednega potonulega broda iz rata su bili lipi škripi za ušate. Malo daje prima vonka na ploče se je hitalo vorše za trije jer je tote bila sarbunjačina. Daje prima punti od Pelegrina se je u valici ča smo je zvoli Muletova vala hitalo za kojega škarpunića a prima vanije je već bilo duboko i ni se hitalo vorše. Na punti od Givnika je bilo dosta pliće i hitalo se je vorše za hlape, jastoge, grancigule, u Pikovon vali za pice i šorge a ispod Givnika, onako po sridi ispod rumenih stin za pirke, sonjače i kneze. Za čarnjeje je bilo nojboje misto odma u vali di nan je sto vezan brod jer in je tote bilo kotilo a i za babe i porapnjake se je hitalo na sarbunjačinu Mole Oskorušice. E ma ni to bilo somo tako izvadit voršu. Did ili otac bi gledali kroz caklo u more i sa rančikon uz koji bi bila vezana stina sa anelon da boje tone pokušovali zadit voršu a jo bi sto na vesla. I onda beštimih...šija malo livin, sad šija desnin, sad voga na desno, sad voga dreto, pok opet šija.....uffff beštimodu otac ili did a meni vajo mučat i slušat kumonde. Ma kad se zadije vorša i vidi kako se cakli riba unutra cili jid se zaboravi. Onda hitit po rukovet abruma u vorše i opet s njima u more za ujutro, vrotit se u valu, vezat brod da ne tuče u kroj ako hiti bura, očistit ribu i pomalo nanoge uzbardo. Već bi se puno putih bilo i smarknulo ali bi takali citalenu za svitlo, takali tranzistor da malo sviri a ako su već bili počeli tonci na Borak slušali bi mužiku priko konola. Naložilo bi se ogonj, ispeklo malo za večeru ili skuhalo lešo i onda za mene gre oni nojslaji dil. Gledali bi po noći svićarice pod Broč ili pod Bijakovu, gledali svitla Bola i Murvice, čuli bi i glose judih po rivi u Bolu ako je bi burinac, gledali prima bondi di je For ako bi vidili svitlo kojega tad ritkega auta da gre za For, gledali zvizde i provjali dok se pomalo son nebi privoli na oči. Tad bi stavili podkladu na zemju ispod bora, sedlo okrenuli na bondu i blazinjica od sedla bi bila kušin za glavu, pokrili se sukoncen i slotko zaspali dok bi fratrići kantali na boru. Ni bi gušt spat u kućici nego ako je baš bila bura kako noćas. Ujutro bi se stariji digli u sunac istok i išli dignit somi vorše a jo bi spo dok me sunce ne razbudi. Oni bi se već vrotili i onda bi se ispeklo frišku ribu za marendu i put podnoge i opet u Oskorušicu. Ako je već bilo teplo i ako su u Velon Oskorušici bili Bujolovi Ivo, Mario, Andrica i Žbaralotovi, Sibe, Ivo i Nikša iša bi se kod njih skupa kupat a ako ne okupo bi se som na žaliću iza njihovega mulića, opet bi se išlo dignut vorše, hitit abrum za drugu subotu i odma poza podne zvolo bi se živo, napartilo stvori i partivalo u Varbonj da oni doma moredu obidvat ribe. Digod se živo i ne bi somo vrotilo jer bi nošlo kumpanjiju pok ga je vajalo poći iskat ma ritko kad. Bilo je stotine zvončićih ali svaki je imo svoj zvuk i svak je poznava svoje živo po zvončiću pok bi se popelo na krov i slušalo di će se čut zvončić i išlo po živo. I opet stori na sedlo a jo na guzicu ali sad bi u većini hodili doma nimo Lokvicu, Žbaralotovu i Pihurničevu kućicu na zopodna vrota od Punte i onda puten kroz Rašnik pasat nimo Ivončevu njivu ubrat koju pomidoru i eto nas doma za dvi popodne. Odma bi se na prišu parićo obid, did i otac bi se umili, otac u bufet, did na balote na Ravnicu a jo po Pjaci i jedva čeka da se požanje ono malo levonde i da idemo stot u Oskorušicu do Vele Gospe. Tamo bi bila cila fameja, rođaci Mikula i Ivica, rodice Ecija, Dijana, Silvana, sestra Miljana tako da je bilo kumpanjije za sve vorsti igrih a bome dohodila je i druga rodbina i ta lita u Oskorušici su ništo nojlišje ča san paso u životu. Ali imo san jo i drugo misto za zovnoć a to je Na Jurića i Basina od materine fameje ma o temu drugi put.

Kućica iz teksta navar Pelegrina, danas već skoro u raspadnutom stanju krova  

Valica Bočac u Oskorušici na bondi od Givnika

Vela Oskorušica i Bujolovi mulići. U moje ditinjstvo bi je somo desni mul iza kojega je su stoli Bujolov kajić i batana Zoneta Gutinega a od njega skala u moru i navar skale motovilo za izvukuvat brod po skali.

Pogled na valu Oskorušica. 

Satelitska snimka Oskorušice i pozicija kućice iz teksta