Blog Vrbanj

Sveti Antonij na didovemu komu

Otkad znom za sebe u storon kući u Velon bondi na didovemu komu je sto kip sv. Antonija a ti kip je u kući otkad se je kuća ugrodila tamo početkon XX vika. Evo jedva san po internetu noša sliku baš tega starinskega kipa somo našemu je jadnemu bila malo ispod lokta pukla desna ruka u kojon darži cvit. Isto je ovako pituron u kafenu mantiju ali su boje već izblidile. Kad je did porti i komo se odnilo kip je stavjen u veltrinu na soli i odtad je tote. Već odovna je sv. Antonij jedini stanovnik kuće i njejin jedini čuvor. Svega je on u ton kući vidi i ču u toko godišć, i lipega i grubega i kad bi moga provjat svega bi isprovjo. Sigurno se spominje ne somo mene i sestre nego i tetih i oca kad su bili dica, spominje se on i none i pranone i pradida. Spominje se pune kuće, spominje se smiha i plača, didovih batudih, vonja lišća od tabaka na komu oko njega i vonja nonine kafe, ratne tuge i stroha, plamena koji bi kuću i njega bi izgori 03.01.1943 da dobri judi nisu izgosili, poratnega gloda i nevoje, spominje se i mene kad bi iša u njegovu i didovu kamaru na miru čitat libre, kad bi sidi kod tete Bone za darževa vrimena i sluša gončice oba Fefli, spominje se on i mojih i sestrinih dičjih bolećicih, prijatejih koji bi liti došli u nos i prispali u ton kamari a mi vonka na surolu. Svega se spominje i sigurno je tužan ča tega već ni ali eto još stoji u kući i čuva je od zla. Kako je ta kuća odovna na prodaju uvik san razmišljo ča učinit sa njin ako bi kojin slučajen kuću proda. Znon da on mene voli i da bi se prikvito i u novon kući a isto znon da je on u svojon kući i da bi nojveće voli tote ostat. I onda san ovako propenso: pito bi čovika jel mu sv. Antonij smeta i hoćel ga čuvat ili hitit u smeće. Ako bi reka da će ga čuvat ostavi bi ga u njegovon kući di je oduvik a ako mu ne bi bilo briga za ti kipić sa juskon dušon prini bi ga u Goricu. I danas na tvoj imendan moj Antoniju ti samuješ u Rozovemu dvoru kako nojstariji njegov stanovnik. A taka ti je sudbina. Čuvaj mi kuću, notoj digod sve ča se spominješ, ako u vašemu svitu ima koji fejs napiš i na njega čogod da se i u temu svitu niko sponti da ni kuća oduvik bila prozna. Nismo se vidili već 12 godišć ali ostaje vrimena. Antoniju moj bud pozdravjen i do vidova.