Blog Vrbanj

Doba 60-ih prošlog stoljeća bilo je u cijelom svijetu najbolje doba, doba u kojem su djelovale najbolje glazbene grupe, nastale najbolje pjesme, pojavilo se hippy mirovni pokret, radost mlade generacije rođene nakon ww2 je polako potiskivala ružna ratna sjećanja, osjećao se je zanos u cijelom svijetu, neka sreća je lebdila u zraku svugdje oko nas, neki nevidljivi duh nas je i pored neimaštine ispunjavao zadovoljstvom jer smo svi u svijetu osjećali da je danas bolje nego jučer a da će sutra biti bolje nego danas. U to doba i male stvari su pričinjavale veliko zadovoljstvo. Nije trebalo imati Stratocastera već je bila dovoljna i Melodija gitara, nije trebao skupi stereo gramofon već je bio dovoljan i onaj mali koji se je spajao na radio a na kojeg se je stavljalo na ručku kutiju šibica da igla ne preskače. Takve male a za nas velike stvari su bile i seoski plesovi i danas već zaboravljeni običaji.

Dražba na toncima u Varbanju

Na slici je bubanj koji je bi kupjen za svirit na toncima a u njega je tuka Miko Ivejin. Danas ga još čuva i ove slike je slika njegov sin Dinko. Gledajuć ovo uspomene naviru, ditinjstvo se vroća i vidin sebe kako sidin na rubu od pozornice a u kantunu uz mola vrota na dvo stola od stolnega tenisa Miko, Vlade i Dinko Briškulin sviridu. I onda naš Miketina udre jedon TUŠ a Antun Škandeja se popne na pozornicu da ga se boje vidi sa butilijon prošeka u jednon ruki a turton u drugon i viče.....A sad slijedi dražba. Dražba traje tri minuta a ples deset minuta. Butiliju bi stavi na kleh ali turtu šoldo u ariju i gleda na areloj i broji minute dok su se bumbizovale cine jer bome da ti furešti dignu dražbu ni bila bravura nego ako se je niko stvarno ozbiljno ludi u Varbonj i digla njegova kumpanjija dražbu da on more zatoncat i onda ono...... u prvoj....drugoj ....iiiiiiii....trećoooj......Dražba je gotova! E sad će se vidit ko koga amo. Pronoštikama se je radi dražbe isplotilo doć na tonce za vidit ko će koju izvest i onda nakon tonca poć u bufet izist turtu. E ma ne izist nego svoju feticu zamotat u facolet za odnit doma da se zno da je mamina divnjica toncala dražbu dokle je mama sideć na bonku doržala kapot u ruke  Ni već odovna dražbih, ni već odovna ni mamih a one divnjice su već none i volile bi one baren jedonput vidit svoje unuke kako toncadu dražbu i sa feticon turte u facoletu tarčidu zapihane od sriće iz bufeta. A ni nego za provat vrotit škvere od vrimena nose. Ako di ima za kupit taki areloj jo san za

Trajtamenat
E ma kad bi se već niko zaozbiljno ludi za divnjon i kad bi tonca sa njon kumpanjija in je znala poslat trajtamenat za ih počastit. A trajtamenat je za ono doba bila za divnjicu nika ćikolotica iz bufeta kako ova mlična ćikolota Zvečevo i liker u žmuliću, kruškovac ili kako smo ga mi zvoli ružulin, šeri brendi(Cherry Brandy) ili ajerkonjak a za muškega bome čogod žešćega, niki badelov vinjak. To bi in obično šankist iz bufeta doni priko tonca u solu na gvanćerici i onda bi oni malo fremali toncat, popili piće a divnjica stavila ćikoloticu u žep za doma ili poslala da joj se do materi na bonku da je čuva. Nikad nison voli toncat i nikad nison bi tako trajton pok i ne znan ti osjećaj ma divnjice koje ovo budu štit će se sponit i bit će in drogo. Eeeee, bila su to gruba i siromašna vrimena kad nismo ničega imali i ova ćikolotica je bila velika stvor ali smo imali ništo drugo, ništo neobjašnjivo lipo ča je bilo u ariji svukud oko nos, ča nas je činilo sritnima veće nego bilo koje današnje Milka ćikolote i sve skupe materijalne stvori. Sritan san da san proživi ditinjstvo u to doba

Bironje Krajice

Tonci su se u moje ditinjstvo činili somo u doba od Karnovala, od sv. Stipana do zodnjega torija Karnovala koji se je i zvo Karnovol. Doba Karnovala je trajalo od godišća do godišća pet do devet šetemonih, zavisno kad je bi Uskars. Obično bi bilo nikoliko svečanih toncih a činili su ih lovci, NK Partizon, omladinska organizacija i na tin toncima bile bi i lutrije, razne društvene igre a na jednemu od svečanih bi se birala Krajica plesa za to godišće. Nika kumpanjija, obično generacijska bi odlučila učinit jednu žensku za Krajicu a obično se je gledalo da to bude simpatija nikega člana kumpanjije koga bi se odlučilo učinit krojen. Pri nego se na to odluči pitalo bi se žensku da li pristaje bit Krajica i da li želi da ti dikmon koga je kumpanjija izabrala  i bude sa njon Kroj. Ako ne pristane pitalo bi se drugu ma uglavnom bi se to već sve bilo i don pri dogovorilo pok ni bilo problemih. Za učinit Kroja i krajicu bilo bi se organizatoru toncih plotilo ma to nisu bili niki veliki šoldi. E, ali bome imena su se doržala u tajnosti dok ne dojde moment bironja Krajice koji bi se naglasi bubnjarskin tušen i izvikivonjen nikoga od organizatorih toncih. Mužika bi počela svirit i to obično valcer a Kroj bi se diga i iša izvest za tanac dogovorenu Krajicu plesa. Normalno da bi svit okolo sa bonkih zapleska i onda bi oni malo somi toncali pok bi se razdvojili i išli izvest ona nikega iz te kumpanjije koja ju je učinila Krajicon a on niku njejinu prijatejicu a to bi u toncu oni već rekli jedno drugemu koga će izvest. Malo bi se zavartili i onda bi daje izvodili njejine prijatejice i članove kumpanjije a svoje partnere (partnerice) bi pripuštali onima sa kin su do sad toncali. I tako dok se ne izvedu za tanac svi muški iz kumpanjije Kroja a onda bi se Krajica opet vrotila Kroju i sa njin odtoncala tanac do kraja. Nakon tonca bi oni koji su toncali išli u bufet na čašicu, popit koji liker, izist malo turte od Krajice i opet bi se vrotili. Nakon bironja Krajice obično bi bila dražba koji bi digla kumpanjija od Kroja i na njon bi toncali oni koji su toncali tanac od Krajice. Ni bi običaj divnju i mladića koji su bili u ozbiljnon, iako za javnost tajnon, vezi birat za Kroja i Krajicu. Obično su to bile onako simpatije. Bila je čast bit Kroj ma to se je već manje gledalo ali bit Krajica plesa je bila velika čast za mlodu divnjicu i o temu bi se provjalo do drugega karnovala. U nikima boje stojećin famejima bi se sutradon, a to bi obično bila nedija, čini i trajtamenat za počastit prijateje i prijatejice ako in je ćer bila izabrana za Krajicu plesa. Ti običaj je traja kroz cilo moje ditinjstvo a fremo je polovicon 80-ih kad su se i seoski tonci ka nojveći vid zabave u mistu pomalo počeli gosit. Ali o svemu temu veće u napisu na ovemu blogu "Varbonj mojega ditinjstva"

.

DIčji tanac i stori tanac

Za dicu od petega do osmega razreda koja još nisu izahodili večer vonka obično bi se činili tonci od nedije popodne po uru, dvi vrimena. Ali dohodila su dica i večer na tonce i odma na početku tanoc, tamo drugi, treći tanac bi se najovilo dičji tanac. Inače tanac  je bi set od 5-6 pismih koji je obično počinja valceron a zavaršiva polkon nakon koje se je umorno hodilo sest. Dica bi odtoncala svoj tanac i onda su ova malo manja mogla doma a kojima se ni spolo bi još ostali. A tamo oko 10 urih bi se najovilo "Stori tanac". E, starije ženske su sidile na bonkima uz zid od molih vrot a stariji muški ispod balkona. I onda bi se za njih odsvirilo čogod iz njihovega doba, šaltin, polka ingliš valcer, mažurka, tango. Stori (ali to su tad bili judim u nojbojima godišćima i mlaji od 50 ma za nos su bili stori) bi odtoncali svoj tanac i tad je on komu se spolo moga poć doma. Nisu uvik toncali muž i žena nego tako bi zatoncali sa nikin ko voli toncat a i zno toncat da publika uživa gledajuć ih. Puno putih je to bi stariji muški sa mlajon ženskon koja lipo tonca a i sa ćeron. Za moje doba na glosu ka nojboji tancadur je bi Ive Drojčin otac Katice, Maje, Nade i Ivota, i svi su čekali da on zatonca tango ili ingliš valcer za ga guštat gledat.  Nakon tega su se nastavijali normalni tonci koji su obično trajali do između ure i dvi popol noći a svečani i do posli tri ure. Ma ako je bila nedija ili nika fešta priko šetemone ni nikoga otac ujutro pito kad je lega posli tanoc. U sunac istok vajalo je da je altret  za upoje  

Mlaje ženske su sidile na bonkima ispod pozornice i ispod ponistrih  a tonci su se ugovorali "na mote". Ono, bi bis gleda u niku žensku dok ne vidiš da i ona tebe gleda i onda bis sa ispruženin parston okrenutin prima dole učini nikoliko krugih i to je bi ka upit za idući tanac i ona bi klimajuć glovon potvordila ili odmohnula glovon kako za ne jer je već zauzeta. I čin bi se udrili parvi  taktovi muški koji su stoli nanoge nasrid sole su torkali prima ženskima ma ako je ko drugi doša pri tebe do ženske sa kojon si na mote dogovori tanac ona je vajalo da ide toncat sa njin. I bilo bi digod došlo do barufe jer bi se oni sa kojin je dogovorila tanac osjeti i malo kako uvriđen pok, ako je već malo i popi, počelo bi nagurovonje  ma nikad ni bilo grubih tučih jer bi drugi muški ove ugrijanih glov na silu izveli vonka da se malo smiridu. Inače ženske nisu smile nikoga odbit za tanac jer su imale besplatan ulaz a muški je imo niko nepisano pravo dat joj i žlipu ako "dobije korpu" ma ne spominjen se takih scenih. Inače ulaz su ploćali somo furešti a na blagajni je obično sto jedom ozbiljniji čovik. U naše doba mi smo uvik molili za na blagajnu Mikota Stipišić Picolinega jer je imo ugled među judima. A domoći su ploćali paušalno "kumpanjiju" ka ulaznicu za sve tonce u karnovalu. Još o toncima je zapisano u objavi "Varbonj mojega ditinjstva".

Publika na plesu u plesnoj sali Doma Matij Ivanic Vrbanj. Muški livo na noge je Marko Lušić Mihovilov (pitur). Desno od njega u sivon vešti Danka Tutejina, do nje Marica Bonina (Mihovilova) pa Vitorija Pelina. Livo od djevojke u bilemu je Zorka Gašperinova a skroz desno Rajka Špirotova , mat Antice i Duške i žena pok. Perota Fredotovic meštre Marije a livo od nje sestra joj Mondica Špirotova.

Plakat za tonce iz 1978 kad su se tonci već činili i pri karnovala, posli jematve pok do Adventa.