Blog Vrbanj

Škripovnice barba Cvitana Markinega!

Ej, jel se ko od vos spominje škripovnicih? Jel van ih ko čini kad ste bili dica? Meni je jedon drogi susid i eto da ni bilo škripovnice ne bin ga baš ni zaponti da je postoja. Barba Cviton Markin bi kad san bi puro dite kad je bilo ovako darževo kako danas dohodi kod dida na lambik malo ćakulat i ogrijat se a kako ih je uvik bilo nikoliko hitit i na korte. Rakiju nisu nikad niti taštovali nego bi somo kad bi did kad je bi lambik već pri kraju hiti malo rakije u plamen po boji plameni rekli ...e Perko ovi je gotov, moreš ga isproznit. Kad je još bila rakija žestoka plamen bi bi plavkasti ali čin je plamen od rakije poče hitat na čarnjeno znači da već teče flema i da se more napunit novi.

A kad ni bilo nikoga barba Cviton je uvik imo u žepu prijatejicu, oštru britvicu sa kojon bi dila. Ako je bi koji komad debje korke bi bi mi načini brod od korke, izduba ga, učini sidije u njemu i jorbol i odma bi ga se provalo u kamenici za živemu lokat. A kad je bi koji lipi meki komad borovine bi bi Cviton pomalo sa povnjon ga isika, učini jazikić unutra u dašćici, udila zupčanik, stavi ga na spicu i sve provuka kroz rape na tilu škripovnice, zavarti je i kad bi zaškripala zvo me da dojden i reka.....evo ti još jedna ali za ovu ćeš mi dat jednega kunca. Jo san to misli ozbiljno pok san jedonput kad je did iša obidvat bi i ćapo molega kunca i doni ga barba Cvitanu a on se je nasmijo i reka da drugi put jer da mu danas nima čo u Markinih da jist perke je dorž i ni bi u kiće. I tako san zaponti barba Cvitana koji je sve dila i sve te rape, zupčanike, osovine čini somo sa britvicon. I eto ta jubav prima darvu mu se je prinila na unuka Cviteta Matković koji je marangun. Barba Cvitane fola za škripovnice a i za lipe uspomene iz ditinjstva kod lambika u Velon Bondi u Rozovemu dvoru.