Blog Vrbanj

Zima 1961/62 ili 1962/63

Danas su zime blage ali nikad pri ni bilo tako. Snig je pada svaku zimu i po veće putih, ledi su bili veliki i lokve su znale bit toko zaladenivene da smo mogli hodit po njima. Jedno godišće je i Vir bi zaledi a mosuri su po cilu zimu visili sa krovih i bilo je šajeto da se ne otkinu i podu na glavu ka ča se je bilo mojon materi dogodilo u Rozovon koli pok ih je otac iz skalih od maslinih razbijo sa kopišćima od ostijuh. Veće putih nan se je dogodilo da bi varč u kojemu bi donili u kuću vode za se napit po noći puka od leda jer bi bi cili zaledi na unutarnjen pragu od ponistre di je sto. Ali posebno joka zima je bila 1961/62 ili 1962/63, sad ne pontin točno jeson bi treći ili četvorti razred. To godišće don Ante je čini Betlem na Gospinemu oltoru, parvi na livu bondu, koji je napravjen od darva i poslo nas je da nojdemo ploču leda za učinit jezeriće u Betlemu. Pontin da je bilo sunčano oko 11 pri podne i da smo tu ploču nošli u Bulinovon kamenici na Korica. Tad ni bilo najlonih nego je kurot ledenu ploču debelu 10-ak cm stavi na bili tavajol. U to doba puno svita je hodilo u crikvu, bonki su uvik bili puni, bile su i češće mise i jutarnje i večernje a pogotovo u štajun do karšćenja Isusovega i bilo je dosta vope i tepline od disanja ma kad smo po dobu od Božića, po 11.01. razormali Betlem tu ploču smo skoro iste debjine razbili isprid crikve, tavajol na kojemu je bila je bi somo malo mokar a do darva od oltora ni bilo promoklo. Znači da svih tih 20-ak don se prosječna temperatura u crikvi ni dizala iznad nule. A kad već spominjen zimu 1962 na 08.03 je bi po toki snig da san ka dite u Dolcu ispod Gašperinovega zidića di je vitar bi doni veće sniga bi upo do pasa u snig. Toko ga je bilo napalo.
(Na slici Jaslice u crikvi 2016 koje se danas činidu na parvemu oltoru desno)

Inače zodnja velika zima koju mi pontimo je bila 1987. Na 03.01. san nali ploču na kući i sutradon je zahlodilo tako da dvi šetemone gore u Rozovih nismo imali vode jer su se cijevi bile zaledile a isto se je ponovilo i na karnovol to godišće. Karnovol je bi na 03.03 a činilo se je fraju u mojon kući u Gorici koja još ni bila prišićena i ložilo u dva voža ma ni se moglo zimu pridobit a apena je popustila za desetak don drugi petak kad je bi sprovod Andriji Ercegovemu a svo to vrime opet radi leda u cijevima ni bilo vode u Rozovih. Obe te hladnoće san prileža, parvu radi fibre a drugu radi škinih koja su me stisla u nediju pri karnovala kad san ravno zemju  isprid kuće da se more intrat. A godišće pri u vejači kad san lavuro temelje do 10-e ure ritko kad smo imali vode za počet lavurat jer bi se voda u gomi od Šćepota do nos priko noći zaledila  a jo bi bi večer pri natoči vož od 200l da se more počet lavurat dok se led u gomi ne otopi ma po donu bi bilo teplo. Posli je još bilo zima nikoliko don oko 03.01.1993 kad je bi bi veliki snig i odtad tu i tamo po koji don ma ništa od durode da se more pontit da su pucali areloji od vode i blokovi od motorih radi leda. Bilo je 2017 početkon jenora isto šetemonu don dobrega leda a temperature izjutra i do -5.

Varbovački kroničar pokojni Keko je zapiso: 

-Zima u Varbuoskoj 6. jenora 1938: Danas osvanuo dan sa deset stupnjeva Reomira ispod ništice (-12,5°C). Sva se luka smrzla do "Vlaške" i "Mirnoggreba". Djeca su kamenjem razbijala po moru led. Takve studeni se ne spominje narod. Zelje uništeno!

-Na 11. jenora 1940.: Tri su već dana da neprestano pada snijeg. Reomir 5 stupanja ispod nule (malo ispo -6°C). Nestalo je, jer uništeno, svake zeleni. Studen je trajala do 20. veljače.