Blog Vrbanj

Sveti Stipan 1965, mokre noge, fibra i lipi libar!

Bila je 1965, nedija i sveti Stipan, vrime ovako kako i danas, oblačno, mokro po klehu i prid dorž a jo u šesti razred. Poza obida san se probuka i kako još ni bilo nikoga po Pjaci iša malo do Stranice do Remetinih provižitat našu tvrđavu ča smo na Remetinemu bili od stinja ugrodili jo, Marko, Dinko Bulin i Dinko Remetin. Trefilo se je da Markota ni bilo doma i jo san sritan izvadi iz "tvrđave", koja je imala i provi krov od ploč, brodić ča nan ga je bi Zane pomoga napravit i napokon som ga iša provozit po Moškovon lokvi (danas je nasuta a bila je odma priko puta Moškovih vrot sa druge bonde Remetine kole). Kako su stine bilo mokre okliza san se i po u lokvu do kolin. I tako mokar iša san odma ne doma nego na Pjacu čekajuć da se smarkne da me mat ne vidi da dohodin doma mokrih nog jer bi bilo odma repekete a baž i po guzici palicon. Bit će se judi čudili ča tako mokar stojin po Pjaci ma jo na to nison penso i apena kad je zaškurilo sa iša doma, probuka se a postole i to mokrih goć zgutoli i hiti pod posteju misleć da ih mat neće vidit i da će se osušit dok ih ona vidi pok da će sve pasat lišo. Ali ne more se ništa sakrit jer mene je ujutro ćapala fibra i mat je onda doznala radi čega je fibra ma kako me pod fibron ni itila kaštigat sve je isto pasalo dobro. Još je išla do skule opravdat me i vazest mi za čitat Betty Zane od Zane Grey-a i jo san dokle su se drugi grijali uz štuvu u razredu sve te done do po Mlodemu litu tepli se u posteji i čita. Nakon tri dona fibra je pala i moga san poć još dvo dona u skulu do novogodišnjih praznicih ma bilo je šćeta fremat čitanje i jo san, po već ustaljenon običaju kad san imo koji interesantan libar za čitat, paso upoljenin hurminon ispod provina i on je od tepline pokozo 38, jo san osto na poštedi i uživo čitat o herojstvu djevojke Betty koja je iz opkoljene tvrđavice Henry pod strilicima Delaware indijancih uspila poć do sela i donit bačvicu baruta koja je sposila tvrđavicu i jude u njoj od "zločestih" indijancih kojima su dobri doseljenici upravo otimali zemju na kojoj su vjekovima živili. I tako, ni svako zlo za zlo osim ča san jedonput tako doržo upoljen hurnim ispod provina malo veće vrimena i provin je puka a ni ga bilo lako tad kupit pok niko vrime nison moga imat fibru kad san jo iti i kad mi je okurivalo. A Stipe Rozov je uvik imo lipih crtanih kaubojskih romanih i ni bilo lako čekat popodne posli skule, napisat domaći i naučit i apena onda roman uruke do sponja