Blog Vrbanj

Budin se i vidin vonka lipi sunčani don, malo ohladno ali ne puno, taman toko da ohladna večer dočora sutrašnji Bodnji don. Još da je barenko malo oblačno i da umisto bure puše levantora di ćeš boje jer o snigu i ne moremo mislit. Na ovi don san uvik sa didon Perkoton hodi ubrat gronu od umendula za Bodnjak. Did je bi Križonoša i poštivo je sve običaje ali crikvu i kurote ni amo i ni hodi u crikvu nego na Božić, Veli četvortak i Veli petak. Poštivo je i Badnjak dok smo bili u storon kuhinji koja je ionako bila sva čorna od dima. Vrotica od storega špahera su ionako bila uvik otvorena da se more stavijat ogrizine i did bi na Bodnji don večer stavi ti komad Bodnjaka kroz vrotica, kako je gori pomalo ga tira unutra a svaku malo otvoro kolačiće od pokriva na ploči i kroz to polivo Bodnjak sa čornin vinon i ujen. Dimilo se je ma bili bi otvorili ponistricu prima Tutejinon kući i dolo se je izdurat ali Bodnjak je vajalo da izgori. Kad smo se prihitili u novu lipje uređenu kuhinju već ni imalo smisla dimit je i onda se je u Rozovih ti običaj pomalo ugosi. U mojih Straničarih bi je komin i tote ni bilo problema sa dimon a običaj je bi isti pok je poduro i posli kad su se i oni prihitili u novu kuhinju. I ne znan jel radi običaja ili radi čega drugega ali somo je muška glova kuće stavijala Bodnjak, micala ga pomalo kako je gori i polivala čornin vinon i ujen. Dimilo se je i u Stranici ali neasetona vrota store kuhinje i ponistrica sa pokojon napuknuton laštron, a bome i buže ispod pločih su ti dim tirali vonka. Dim je peka za oči ali ni bilo dičjega plača nego jedno tiho veselje i unutrašnja radost. Bi bi sritan iša leć uz dida i nonu na posteju jer bi oba dida, i Ivon i Perko, uvik meni doli da jedonput i jo malo maknen Bodnjak i polijen ga vinon i ujen i onda san se som sebi čini kruto velik i važan. Voli san svirit armonigu ali te done did Perko mi to ni do. Bi bi reka da do Božića ni red ni kantat ni svirit. Teta (druga nona) Bona u Rozovih a teta Morica i nona Vica u Budrovićih bi somo potiho sebi u brodu marmošale molitvice i to je bilo sve. Jedino su mene učile ne kantat nego somo riči od Božićnih pismicih. Nike san zaponti a nike ne ma sve je to u meni ostavilo kruto lipi trag. Nison ni jo od crikve kako ni oba dida ali volin te običaje ka dil tradicije mojega noroda i dok budem se ufa ću ih se doržat jer sve lipo iz ditinjstva vezano je za take i slične običaje. Pišen ovo danas jer Bodnji don želin provest bez velikih ričih na drugi nočin.