Blog Vrbanj

Moja Stranica, dil Varbanja di san prove nojlišje done ditinjstva pomalo se prozni. Osim dvo rođaka svi moji Budrovići i Gašperinovi pomalo nestaju. Još se daržidu Bulinovi i Remetini. Eto porti si i ti Mile, porti si kod matere, oca i tri borbe. Pozdrav Margaritu i Antuna a Morkotu, Motetu i Slavotu rec da nisu zaboravjeni u svojemu rodnom mistu, da ih i vode Sutjeske i šume Vučeva i Zelengore još pontidu. Pontin i jo naše igre iz ditinjstva. Pontin zajedničko bronje murvih kad bi ti kako malo stariji bro non manjima iz gron koje mi nismo mogli doseć, kad bi nan bro šipke mazdrenjake na Budrovića lokvi priko koje mi nismo mogli, kad si nas doržo vezane konopon da nas moreš izvuć ako propodemo kroz led kad smo hodili priko lokve. Pontin oni visoki čempriš ča ga je borba Morko posika jer smo se penjali navar da vidimo kad će doć Goričani se igrat a i da gore di se je manje brolo nojdemo lišje grone za napravit luk za strilice. Pontin i martinu na Barbasovemu koju je borba čuvo za palice za vorše i za bobice za u rakiju a mi je svu očepušali za strilice. Pontin i oni potočić ča bi zimi kupi vodu koja je kroz Donkićev dolac padala priko puta u kaniželu i teka ispod Budrovića borih a mi sidili uz njega i zamišjali da smo na velikon riki. Pontin "velike" gusarske brode od korke sa kojima smo u temu potočiću vodili svoje zamišljene dičje bitke. Pontin sprovode tićima koji su krepali u kojbima a ti bi bi kurot. Pontin kako si me uči dilat štrakje i napinjat pločice za tiće ispod Budrovića kalobera. Pontin i kad si se kako malo stariji bi ubuka u maškare i mene straši na kominu i sad se tega sa sjeton sitin. Pontin kućicu koju smo bili napravili od gron u Donjin borima i tamo se sakrivali a ti bi glovni meštar grojbe. Pontin dičje igre Nad Basinu na Jurića, zajedničko spušćonje do Basine i kuponje a ti kako malo stariji si nos dicu čuvo. Pontin i kad smo već kako muškardini hodili liti kaićen na tonce na Borak u Bolu. Pontin i ozbiljne razgovore kad smo već bili stariji a znon da to pontiš i ti. Prijateju moj ostaj mi pozdravjen a onde di smo finili nastavit ćemo tamo di si ti sad kad se jedonput sastanemo.

Napisano 22.12.2017 na dan pogreba Pavičić Mileta Gašperinovega rođenog 1948, otac Antun a majka Margarita rođena Šurjak iz Dola, Damira Šurjak od oca Mateta sestra. Do Mileta je u coloru Ivica Gašperinov. Mile nije bio oženjen. Sestra Antica udana je u Dol za Mirko Radonić i ima dvije kćeri, Meri udana za Silić Marko i Tadijana udana za Franetović Jurica oba iz Staroga Grada. Očeva braća Marko, Mate i Slavo poginuli su kao partizani u 2.sv.ratu. Mate i Slavo na Sutjesci 1943 a Marko 1944. Otac Antuna, Markota, Mateta i Slavota je bio Mihovil Pavičić a njegova majka, Mileta prabaka,  bila je iz porodice moje majke, sestra mog pradjeda Marka Fredotović Budrović.