Blog Vrbanj

Govori je meni did "kad ti budeš veli a jo moli onda ćeš se ti s menon igrat". Tad nison kapi kako će on to opet bit moli a sad kad san u njegovin godišćima kad mi je to govori kapin. Vroćan se na ditinjstvo. Sve o čemu mi stariji znomo govorit je kako je bilo pri, kako smo se igrali ka dica, koje smo filmove gledali 60 i nike, ko je igro za Hajduka 66, ko je do gole protiv Vardara za parvi kup, kako smo mi Varbanjani tamo 70 i nike bili dobili For u balunu kad je Veljko Ćurin bi do gol, koje smo baraškode činili meštrima u skuli a ne spominjemo se kad idemo u butigu ča smo došli kupit isto ka i dite kad ga pošjedu u butigu pok dojde i zaboravi zoč ga je mat poslala. Ma neka, i drugo ditinjstvo je lipo, lipo se je spontit onih "dole ispod crikve" kojih veće poznajemo nego ovih iznad crikve. Lipo je malo odlutat nose, spontit se dičjih igrih i bit opet baren dokli provjemo ono molo dite. Nison se nikad straši starosti a i sad pod starost ne osjećan ni jid ni nemoć nego niko blago opuštanje, niku smirenost duha i ča se bliži ultima partenca ni stroha u čoviku od tega. Stroh je somo od moguće nemoći. Govoridu da je grubo ostarit a još gore ne ostarit ma jo se s tin ne složen baš posve. Lipo je ostarit a grubo je onima kojima ni bilo suđeno da upoznodu ča je to starost. Njih ćemo se spontit ove done oko Mortvega dona i kroz gončice o njima i baren, ako smo ih i zaboravili, kroz već izblidjene slike na storima grebima. Lipo, kruto lipo je doškat starost a još ako je u zdrovju di ćeš boje želit sebi i drugima