Blog Vrbanj

Komin, iznad komina pod krovon od ploč od stine od dima čorne grede, na njima visidu komoštre, na komoštrima kočul a na kočulu bronzin sa provislon. None podtakniju ogonj ložen od odlomjenih grančic od ogrizinih za kozu a ogrizine stojidu iza bančića na kojemu store none sididu. Od dima čorni zidi a u kantunu su i stora žorna za mlit framentun za peć kruh framentunjaču. Debondu na kominu vož sa provislon u kojem je voda da se smloči za razmutit malo mekinih za koze. Mahrama na glovi koju nisu skalovalale otkad je parvi stariji u muža fameji umar, od 30-e uvik sa čornon mahramon. Stora kuhinja puna dima ali dima koji ni peka tad za oči. Sad pečedu oči od suz koje some naviru zbog uspomenih koje ova slika vroća na odovna prohujalo ditinjstvo i nikad već ponovjeno doba. Doba velikog siromaštva ali i doba velike jubavi judih izmeju sebe. Doba velikega truda a ničega na pjatu osim malo zeja skuhanega u bronzinu i kojega kompira zaprećanega u tepli lug da se ispeče. Doba kad je puno putih obid bi malo kruha od šetemonu don smočenega u uje sa malo soli a večera malo na gradikulima popraženega storega kruha namočenog u čorno vino i uje. Doba kad je u ponarici stola butilijica sa ujen, kvasinon, škatula Divke, malo soli i cukra a u ormariću bocunić sa malo maravana da se zdravo vino ne trati nego čuva za prodat i butilijica sa malo prošeka za ulit vodnega dici u koru od jaja kad ga na veliku muku izidu da se napijedu ili za u njemu zamutit sirovo joje i malo cukra za kripost. Doba kad ni bilo špine nego je u kantunu na kočulu visi sić vode i potić od late za se napit a ispod ponistre lavel od stine sa rapon kroz zid da voda oteče vonka. Doba kad je na skanciji stolo nikoliko pjatićih od late a i ingleških aluminijskih iz rata. Peruni i žice od aluminija su stole u škafetiću rasklimanega stola uz banket sa bokun muke i maništre ispod pokriva na koji bi didi i unuci sidali  za jist a none su jile sideć na bančiću iz pjatića na krilu opasane traveson sa žepon u kojemu je uvik bi umendul, suka smokva ili orih za unuke. Doba kad je zimi bura probijala kroz buže ispod ploč, ispod rasklimanih vrotih na storima bartvelima i učesto razbijene koje laštre na teleru zaminjene sa malo kartuna ali je isto kuhinja bila tepla od jubavi koje je bila puna. Doba grubo i teško ali doba u koje bi se isto opet vroti.