Blog Vrbanj

KUHARICA NONE NEDE

Kobasice i fažol

Skuhat kobasice u čistoj vodi

Zafriga: Stavit uje na tavicu i malo muke i sa pajkon mišat na laganen ognju da zažuti i onda ulit dil juhe u kojon je kuhan fažol i to uz mišonje kuhat da se zgusne.Kad se zgusne dodo se u teću u kojon se je kuha fažol a u koju su se već već pri dodale kuhane kobasice da vredu skupa sa fažolon.Onda neka učini somo dvo glogoja sve skupa . Na kraju se more dodat malo papra, soli ili vegete po žeji.

Fažol se stavi močit u veli sud u kojen je duplo baren duplo veće vode nego fažola (ili slanutka). Ujutro ga se stavi kuhat lešo. U vodu se more odma staviti malo suhega špeka tako da se kuha odma sa fažolon. Za dvoje stavit fažol kuhat u teću od tri litre da komodno kuha a ne da gre priko i da kuha dok se ne raspada.

Goveđi gulaš-kupovni

U tećicu stavit uja da pokrije dno, pol kapule izrizat na manje komade i stavit da malo omekša na uju. Na to se hiti kompire izrižene na komadiće i to½ kg do 1 kg na veli gulaš. To se malo volto tako da kompiri ćapodu uje. Kad se to malo zapraži ulije se vrile vode (8dl do 1l) stavi se malo vegete, konšerve, malo soli, papra, slatke paprike mlivene ,more i malo petrusimula i to se stavi da kuha na lagano da se kompiri počnu raspadat sa perunon. Onda se dodo gulaš iz konzerve i darži da dobro provre na laganijen ognju.

Gulaš od mesa

Uje i kapulu šufigat. Na to stavit komadiće mesa (meko meso npr. teletinu da lašnje skuha). To se dinsta na lagano a u to se more stavit malo konšerve,soli, vegete, petrusimula, mrkve, nožicu luka, ulije se po malo vruće vode i lagano miša dok meso ćapo malo gušt od začinih ( baren 5 min.). Onda se ulije potribno vode da kuha skupa. Kad je meso napol kuhano onda se dodo kompire i neka daje kuha skupa dok se kompiri skuhadu.

Folša juha

U 2/5 litre vode stavit 2 žice sojinega uja, malo konšerve ili pomidor tek da začarnjeni, žicu vegete, 1-2 kompira izrižena na sitno tako da juha bude gušća, jednu mrkvu, malo šelena, jednu molu papriku i to sve skupa da kuha na lagano oko jednu uru. Kad bude gotovo stavi se unutra maništra (pinete, šubijote-dakle debju maništru). Kad se složi maništra stavit pol goveđe kocke. Pri nego se stavi maništra more se juha procidit ali Neda je ne procidije. To se kuha 15-20 minutih.

Blitva

U baren 3l vode stavi se oko dvi žice soli i stavi da vre u veliki sud. Blitvu se istribi, isiče na komade ( list na dvo kusa ) i stavi močit u niku teču. Kad voda uzovre stavi se u vodu malo šode garbunade na vorh od kućarina (oko pol kućarina) i onda se složi blitva da kuha na glogoju 15-20 min. Kompire isičene na manje komade se stavi kuhat skupa sa blitvon. Ako su veći komadi kompira stavi ga se kuhat u vodu pri blitve jer se kompir teže kuha. Kad omekšodu kompiri procidi se na pašabrod ( cidilo ) i onda se začini sa malo uja i soli.

Broskva

U teću stavit uja da pokrije dno, špeka (boje suhega jer do veći gušt), 1-2 nožice luka i jednu manju kapulu i to se malo šufigo. Opere se broskva u teplon vodi, dobro se je ocidi i hiti u teću da se dinsta sa onin ča se je već malo šufigalo. Kad se to malo dinsta tako da se 5-6 putih volto na uju ulije se malo teple vode ili juhe od mesa, stavi se kućarin vegete i kuha oko pol ure ali se dolije voda ili juha da ne zagori i stalno miša.

Tikvice

 U dvi litre vode stavi se malo soli (1-2 žice) i kad to uzovre staviti se malo šode garbunade na vorh od kućarina i stavi se skupa tikvice i kompire da kuha. Ako se voli veće kuse kompira ili ako su tikvice mlode stavi se kompir malo pri jer se tikvica lašnje skuha. Kad se procidi, dok je teplo začini se sa malo uja i soli, a i nožicon luka ko voli.

Kokoš, teletina i drugo meso u rašćeri

Kokoš se opere, posoli. U laštru se stavi uja ,postivo se kokoš (ili drugo meso) a more se je isić i na komade i polije ujen. Kompire izrižene na četiri komada i pri posoljene se nastivo u laštru. Po mesu se namaže pinku senfa. Užeže se pećnicu na 200 i stavi se peć i neka se peče uru i po do dvi. Začini se salota sa ujen, kvasinon i malo soli.

Juha na mesu

Opereno meso se stavi u vodu da kuha. Stavi se dvi do tri litre vode, manju kapulu, karotu, malo šelena, malo konšerve, žicu soli, žicu vegete. To kuha dok se meso ne skuha a to se provo perunon. Kuha se na ognju sridnje jačine da ne gre vonka. Kad se juhu procidi stavi se maništra da prokuha petnajestak minutih.

Šniceli na tavicu

Natuče se šnicele , stavi se po njima somo malo soli i malo senfa. U tavicu se stavi malo sojinega uja. Kad se uje malo stepli nastivo se šnicele a more se uz to i malo paprike, pokrije se pokrivon i friga na lagano. More se zalit sa pinku vode ma bude malo šuga. Gotovo je kad šniceli omekjodu a to isto traje 15-20 minutih. Nevaja pustit da se šniceli osušidu. More se šnicele i malo uvojat u muku pri friganja.

Lignje na tavicu

U teplo uje na tavici posloži se lignje i poduši. Pri kroj se more stavit somo malo papra i soli jer ni lignja ni sipa i hubotnica ne volidu sol jer utvardidu. More se lignje isić na kolutiće,uvojat u muku i onda frigat u teplemu uju ali onda jih se ne podušije nego somo malo okriće da ne izgoridu.

Oparene masline

Čorne, zdrave ali ne puno velike masline prokuhat 2-3 min u uzovretoj vodi u koju je na oko 3l vode dodona manja rukovet krupnije morske soli, dok voda ne počorni. Tako oparene masline se uspu u cidilo i kad sva voda oteče pospu se sa malo soli, protresu tako da sol dojde na sve masline i posložidu na veću gvanćeru ili čogod sličnega da se osušidu. Za ih očuvat desetak don dosta ih je stavit u frižider posložene na gvanćeru ma za veće vrimena vajo ih čuvat u ledenici u kojongod plastičnon škatuli.

  Panoda

 U litru hlodne vode stavi se komad starijega kruha i pusti da se razmoči pok se ispešto. Dodo se žičicu maslinovega uja, malo konšerve ili u litnji štajun pomidorih i soli po voji, malo luka a more i list javora. Debondu se skuha malo rizih i onda dodo u to. To se sve promiša i stavi se uz mišonje šufigovat, ma ne na velemu ognju, dok se ne zgusne. Nojlišje je jist mloko                                         

  Poliveni kruh

 Stariji ali ne već suhi kruh, a nojboji je domoći iz peći, izriže se na manje tanke fetice i posloži u terinicu. Isiče se luka, onako nožicu dvi ( a sve po guštu) na ne skroz mole komadiće i posloži po kruhu. To se zalije sa malo maslinovega uju i stavi malo soli, ali sve umireno. Debondu se uzovre voda i sa vrilon vodon se prilije to u terini tako da pokrije vorh i pokrije pokrivon. Pusti se niko vrime onako pokriveno da se kruh razbumbo i da luk zavonjo i onda se ji onako mloko.

  Leća

Parvo leću proprat da  šporkica ispliva na škrup i onda to šporkice odnit. U drugon vodi malo prokuhat leću, procidit je i prominit vodu. Stavit obilatije vode da ne zagori. Nakon tega dodat zočinih po guštu, sojinega uja, soli, vegete, mrkve, češoj luka, malo kapule, more i list javora i stavit kuhat. More se prid kroj kuhanja dodat operenih rizih, ali kad leća već bude napol kuhana jer bi se rizi prikuhale. Kuhat na slabijemu ognju uz mišonje pajkon da ne zagori, a to more trajat i jednu uru.. Za dvojicu stavit ćikaru i po od bile kafe leće i ćikaricu od čorne kafe rizih.

 Sok od metvice

10 dkg metvice

1 kg cukra

1 dkg limunske kiseline

1 l vode

Uzavrit vodu i otopit cukar u njoj. Kad se ohlodi dodat opranu metvicu i limunsku kiselinu. Neka stoji 24 ure i kad i kad promišat. Onda procidit i pit. !

 Punjene lignje

-Lignje očistit, oprat i dobro ocidit .

-Kroke i sitne lignje, sitno isić i zapražit na vrilemu uju .

-Kad malo porumenidu dodat začine.

-.Zapražit još somo malo i na kraju dodat potrebnu količinu prezle.

-Punit lignje pripremljenom smjesom, zatvorit ih sa čačkalicom, posložit u malo nauljenu rašćeru i peć  dvodesetak minutih.

-Izvadit iz peći, zalit sa 1 dcl vina, zatvorit aluminijskon folijom i vrotit u peć još 5 min, izvadit i poslužit teplo !

-Lignje se more ukrasit debjim feticama limuna i naronče a more se  u svaku lignju ili somo u niku stavit napose  kuhane kroke.

Tribuje: 10 liganj sridnje veličine(oko 1,5 kg), 1 glavica luka, 1 šaka kaparih, uje, sol, petrusimul, prezla, 1 dcl bilega  vina...

Frigane pomidore sa jojima

Na maslinovemu uju šufigon kapulu isičenu na sitno, isičen na sitno pomidore onako sa koron. I kad kapula malo samre  hitin pomidore u tavicu, stavin i malo cukra pok u to kad to sve malo se šufigo hitin joje i razmutin ga perunon onako u pomidori. Ko voli gušću šošu more stavit dvo joja. To sve mišat dok se ne zgusne i stot atento da ne zagori. Za dvojicu stavin tri vele pomidore i dvo joja. Ko voli da ni puno gusto more u šošu ulit i malo vode dok se miša.

Nona Neda Pavičić i njena unuka a moja kćer Maja. Slikano u Dolu oko 1995. Neda je rođena Dulčić 1933 a umrla je 28.11.2020.