Blog Vrbanj

Slatki šipki! 

Bome svi vi malo stariji se spominjete ča nan je u ovo doba godišća znači slatki šipak. Spominjete se kako smo ih hodili brat u Vrisnik ispod pekare, u Dol u tete Sonje po morkloj noći priko Prismena. Spominjete se i beštimih od judih kojima bismo bili obrali šipke ali ne somo obrali za izist nego i činili šćetu jer nismo mogli sve izist koliko bi obrali pok bi ih bili hitali ali eto vajalo je poć krast šipke. Jedon u Vrisnik ispod pekare je imo kruto lipe šipke i uvik ih je čuvo do kasna u noć ma mi bi išli kasnije kad ide leć. Ali jedon put on je izgosi letriku u kuhinji i uškuro nas čeka. Mi se popeli a on izoša sa šćopon i poče vikat. Koje je to bilo tarkonje, do Svirač nismo fremali. A dičina bome od desetak godišć. Bili bi išli priko Mihovilovega vartla uz skalinice kod kapelice sv. Mikule i barba Miletu obrali priko kina kad je on bi na ulazu kida korte. Žbaralotovi su imali lipe slatke ali non je bilo neugodno poć ih brat radi Ivota koji je bi s nami u kumpanjiji pok bi Ivo doma svoje zabravo sa ničin na radiju ili nikon drugon gluposti tako da ne izojdedu vonka dok ih mi beremo. I Ivo je onda od gušta ji svoje šipke a moga ih je doma som ubrat ma ni to bi gušt. A ka dica mi smo mislili da nas nikor ne čuje kako se "šuljamo" po noći a bili bi nas čuli u Glavici dok smo bili u Gorici kako smo vikali ono....mučte, mučte da nas ne čuju  Jo san voli i mazdrenjake još veće nego slatke a oni zriju pri. I tako bit ću imo desetak godišć a baš i manje odluči jo poć ukrast Briškulinima mazdrenjak kod gustirne usrid dona. Oni su kako je još bilo teplo sidili isprid kuće niti 10m od gustirne i bome sigurno su me vidili i smijali se kako se jo pognuto šuljan priko zidića i gustirne, beren šipak i cili sritan da me nisu vidili uteka niz put doma ga izist onako zarna izmišana sa cukron u terinici ili pjatiću od late. Imali su lipi mazdrenjak i Albertinovi navar vartla prima Ravnici ali njega je bilo lako obrat jer barba Jure ni puno haja za vikat na dicu pok onda ni bi gušt poć njima brat. I tako san jo kad san poče lavurat novu kuću uz somu cestu usodi tri slatka šipka da dica moredu ubrat a jo ih gledat po noći i smijat se. Ma vrimena su se prominila i nikad nijedno dite ni ubralo šipak. I znote da san tužan radi tega. Ali danas oni imadu svega a non su šipki i murve bile sve. Danas mi padadu po klehu i gnjiju a nima ih ko taštat ni po donu a kamoli obrat po noći