Blog Vrbanj

Prošek i kako ga napravit !

Prošek se obično čini od bile bogdanuše kojon se more dodat malo čornega molega plavca tako da boja prošeka more bit od žute do boje meda. Ali ako ni bogdanuše čini se je i od kuča. Po starinsku bi se one moti pune zdravega grožja ostavile ča veće na suncu, baren šetemonu don nakon ča se drugo obere, da grožje boje sazrije i da se smanji količina vode u zarnima, nakon tega se to grožje dobro izgnječi i ulije u sud da vre. Prošek na kraju vrenja ima nojmanje 15% alkohola i visoki postotak sladora. Obično se konto da je nojboje da ima slador oko 27.
Ali obično se je prošek čini na malo drugačiji nočin uz dodovonje cukra. Dobro bi se u većen sudu, a doma u maštilu ili vridici, izgnječilo bilo grožje koje se je imalo. Ako je bogdanuša dobro je ma gnječilo se je i kuč. Kogod bi doda i malo čornega kojega je imo da prošek ne bude žućkast nego malo kafen. Kad bi ga se dobro izgnječilo odlilo bi se sok i procidilo ga kroz gušće sito da pinke od grožja ne gredu u sok za prošek. I onda bi se u to soka dodovalo cukar i mišalo da se cukar dobro otopi. Mirilo se je slador sa provinon za slador i kad bi došlo na 26,5 bi se fremalo dodovat cukar jer kad se otopi cili cukar ča se mišonjen ni uspi otopit slador bi naresa na 27 do nojveće 27,5 i to se konto ka nojboja mira za slador prošeka. Nakon tega se je ti prošek ulivo u sud koji se ni zatvoro dok ne fini vrenje nego bi se somo čogod stavilo na rapu da koja beštija ne upode unutra. Nakon i misec don kad vrenje fini  i talog od masta pode na dno se gotovi prošek pritoči u demejone u kojima će stot ili u manji karatilac. Vajo stot atento da se kod pritokonja sud u kojemu je prošek ne hmuta da se talog ne izmiša sa prošekon. Jo san obično čini manje prošeka, tako do 20l, i to bi parvo bi uli u demejonu koju bi stavi na povišeno misto da lašnje povuče kroz pumpin kad počen pritokat a koja ni bila opletena da boje vidin dokle je feca  i onda bi pritoko sa pumpinon ali ga nikad nison stavi duboko nego baren parst iznad fece da pri kraju ne usisa fecu. Niki su stavijali nika sredstva za bistrenje prošeka ma jo nison ništa stavija. Prošek se je pritoko kroz gustu peču u obliku saćca tako da su i nojmanje čestice taloga ostavale u temu saćcu a obično se je rukami čistilo talog sa dna saćca da prošek more točit. Tako pritočen prošek se je ostavijalo dvo, tri miseca da skroz izbistri i onda bi ga se tamo u jenoru još jedon put pritočilo na isti nočin i to je bilo sve. Već ga se ni pritokalo. Doržo se je za piće u obično ukrašenim caklenim bocama u veltrini tinela a pi iz molih žmulićih i sa njin se je častilo goste uz koji domoći kolačić ili uz pašurate. Za kripost bi se sirovo joje sa još malo cukra zamutilo u žmulu sa prošekon i pilo. Često se je pi i razvodnjen a dici se je imalo običaj za nagradu kad izidu joje u koru od jaja ulit malo vodnega prošeka da se napiju. Dodovo se je i u nike spize kako npr. u brujet ma to oko kuhanja su već stvori u koje se ne kapin.