Blog Vrbanj

Sok, liker i slatko od višnjih!
Ukusi ditinjstva

U caklenu bocu sa širokin vorhon se stavidu višnje i cukar i boca stavi na sunce. Mira je da na kilo višanj gre i kilo cukra. Po običaju to stoji na suncu 40 don. Svaki don se miša pajkon dok se cukar skroz ne rastopi. Nakon 40 don kad je sok dozri se sok odlije u butilije i stavi u hlodno u konobu. Sok se je muti sa vodon za piće. Na one višnje ča su ostale se more u bocu nalit rakija od drofa, pustit niko vrime da rakija ćapo gušt i tako dobit liker od višnje /cherry-brandy/. To je did imo običaj učinit rakiju od višnjih za sebi ujutro oprat justa posli sna ali mat  bi te višnje koje su bile slatke stavijala u mole caklene boce i onda bi ih guštali jist kako slatko od višnjih. Vajalo je da stojidu u hlodo, posli kad su počeli frižideri doržali smo ih u frižideru u dnu, da se ne usplisnavidu.