Blog Vrbanj

Vanilija kiflići po riceti moje tete, Lučice Buratović.
Ovakve kifliće koji me vroćadu u ditinjstvo je činila i moja mat i slala mi u Split dok san bi u sridnjon skuli da iman za se poslodit ali ih ni posipala sa cukron. Mogle su puno stot meke.

30dkg muke (brašna), 20dkg maslaca, 10dkg mlivenih orihih, 8dkg cukra, 1 kesica vanilin cukra

Umisit tisto od ovih sastojaka i, iako ga niki imadu običaj stavit u frižider jednu uru, odma od tista formirat kifliće.

Sve oko tista lavurat sa hlodnima rukami pok ako su ruke prirodno teple malo ih rashlodit hlodnon vodon ali ne smidu bit mokre. Boje nego da su ruke teple da se tisto ne slipje po rukami. Maslac isto neka bude hlodan.

Posložit u rašćeru i stavit u pećnicu zagrijanu na 160° i peć dok ne počnu malo rumenit ali da ne zagoridu. Obično se peču 8-10 minutih.

Nakon tega još vruće kifliće uvojat u cukar u prohu. Ali more se ih jist i bez da ih se uvojedu u cukar a tako ih je volila činit moja mat.

Na slici je moja teta Lučica, materina sestra.