Blog Vrbanj

Puti kroz Varbonj i oko Varbanja pri 1934 g.

     Od Pajiza do Jese je još od rimskega doba bi inkunjon put. Od njega se je put odvojo za Varbonj. Put je u Pajizu počinja kod sv. Petra, pasovo kroz Dubce i ispod sv. Jeline pud Varbanja. Na zapadu put iz Pajiza je hodi uz sv. Mihovil, nimo Lučetove, priko Vira pok uz Bigvira do na Pjacu. Ispod sv. Mihovila put je nastavija pud Jese. Pasovo je povar crikve sv.Kuzme, ispod Orihovišća, kroz Frekovice, Dolce i onda kroz Žminj dolac Sviraški i Vrisniški i izahodi u Pelinje iznad igrališta. Na ti put Vrisničani su izahodili od svoje crikve nistarmo pok priko potoka a kad ni bilo vode u potoku i Varbanjani i Svirčani i Vrisničani su u Jesu hodili kraćin puten do u Polonde kroz potok. Iz Vrisnika je bi i put za Svirče koji je izahodi ispod Sviraških grebih i oza grebe se spojo na put iz Svirač za Varbonj. Ti put danas izahodi na cestu pri proširenja Za Gorice. Na pol puta se je odvojo do današnjeg zavoja navar mosta i daje se spojo skupa sa Vrisniškin puten na put za Jesu. Most je skupa sa današnjon ceston sagrodjen oko 1934 g. Glovni put iz Svirač do Varbanja bi je priko barda nimo sv.Liberot i on je bi širok i inkunjon. Nojkraći put za u Svirče bi je priko Gračišća. Počinja je kod Morkota Kotinega a izahodi u Svirče kod Žigerinovih (malo povar crikve). Za u Dol se je iz Varbanja hodilo kroz Stronu priko Prismena a na ti put se je spojo i put iz Svirač za Dol koji je hodi od sv. Liberota povar Lojcih i Ravoncih. Glovni put iz Varboske hodi je od varbovačkih grebih priko ceste na zopod, spojo se na današnju storu cestu i na Križicima se je odvojo za Varbonj. Dil tega puta je proširen u cestu tridesetih pasonega vika. Drugi put za Varbosku hodi je kroz potok a na njega se je izahodilo iz Gorice kroz Dolajca. Ti potok je kupi vode iz Dolcih, Dolajcih i današnjih Donjih borih. Put za Varbosku koji su duperali Svirčani i Vrisničani odvojo se je od glovnega puta za Jesu iza Varbanja, pasovo priko današnjega raskršća iznad Varboske na novon cesti te se kod grebih spojo sa glovnin puten iz Varbanja. U Varbosku se je dohodilo puten povar grebih i onda do fortice a postoja je i uski putić uz konol na početku vale di je dohodi potok koji je teka iz Vira i u Blatima se, pasovajuć od Češminicih ispod zemje, ulivo u veći potok koji je kupi vode iz Blatih.

     Od Pjace glovni put je hodi nimo crikvu Sv.Duha, današnjin puten za nove grebe i nedohodeć do grebih skrećo je desno i spojo se sa puten koji je hodi iz Gorice kroz Stranicu i kroz Korica.

     Ceste ispod storih grebih ni bilo a Straničani su do na Pjacu hodili kroz Mola vrota od Šimatorija pok priko Šimatorija kroz Vela vrota ili priko Pod Dolca uz Pločine. Mola vrota su bila i vrota za Goričane. Na put iz Pajiza za Jesu iz Gorice se je izahodilo kroz Dolajca, Dolce i Orihovišća. Moglo se je poć u Jesu i kroz Sviraški potok. Od puta za Stranicu nimo našu i Šćepotovu kuću, put za Svirče i Jesu je hodi priko današnjih tribinih na igralištu i spojo se kod proširenja na uski putić trason današnje ceste do navar mosta i daje kroz potok ili na glovni put. Put priko “tribinih” je inače služi za poć u Kruševja.

     Od naše kuće u Gorici put za Pjacu je hodi ispod zoga od balotih (koji je napravjen 1972 a do tad se je na balote igralo nojveće na Ravnici), nimo sv.Roka pok priko Klepala, Podmurvice, uz Pločine ( a put uz Pločine bi je inkunjon). Di je današnja cesta ispod Klepala bili su vartli. Na pod Dolac put se je odvojo za pud crikve. Pasovo je između meštre Marije kuće i vartla i izahodi na Mola vrota od Šimatorija. Od Tripetovih pok do crikve bili su vartli a ne put. Ni bilo ni puta od crikve do Glavice nego su Glavičani hodili u crikvu priko Pjace.

     Iz Vele Bonde, Ceretorija, u poje pod sv.Kuzmu, Povatovo, Češminice i daje se je moglo poć osim nimo crikvu i kroz Kotinu kolu, kroz Sela, puten na zopod od novih grebih i oza Rake doć na put iz Stranice. Kod sv. Osiba počinja je put niz Karnjenu gomilu za do na Libojevice, Carevce a daje se je produživa sve do mora. Ispod sv. Mihovila se je, pasovajuć stori put za Pajiz, kroz Podhume, Igrališća, Ivončeve njive, Rašnike isto dohodilo do mora.

     Polovicon tridesetih pasonog vika probijena je Nova cesta od Pajiza do Jese (to je današnja Stora cesta, jer je današnja Nova cesta probijena polovicon 80-ih). Ta cesta je pasala kroz Varbonj otvorajuć nove pute kroz misto. Spojila je Vir sa crikvon a Gorici otvorila put za u crikvu na Vela vrota. No dosta posli rata, još i u moje ditinjstvo, Glavičani i većina koji su stoli oko Vira i na Stagni su iz navike hodili u crikvu priko Pjace. I puno sprovodih je išlo ne ceston nego priko Pjace radi običaja da se čovika sprovede onin puten kojin je, dokli je bi živ, hodi u crikvu. No ti običaj se je pomalo povarga jer su mlaji u crikvu počeli hodit ceston kako lišjin puten, ali su se znali radi kumpanjije vroćat iz Crikve priko Pjace, fremat na Pjaci malo porazgovorit i onda poć na obid. Put od pjace pok niz Bigvira bi je inkunjon a na kantunu uz Zamotela kuću i uz Ivejinu bile su skalinice za sest i za uzjahat. Goričani nisu imali ti običaj nego bi iz crikve išli dreto u Goricu i pri obida malo proćakulali na Podmurvici ili na Klepalu koje je i do dona današnjega ostalo glovno misto di se Goričani skupjadu, za rozliku od drugih dilih Varbanja iz kojih se judi pridvečer ili u drugo doba skupjadu na Pjaci.

     Kad već spominjen pute za Pajiz i Jesu red je spomenut da se je hodilo u ta mista nanoge ili na živemu. U Pajizu se je živo vezivalo isprid svete Lucije a pojilo na gustirni kod Vinarije. U Jesi se je živo vezivalo na mistu di je danas benzinska pumpa. Kad se je probila „stora“ cesta iz navik se je još i u moje ditinjstvo hodilo u Jesu nanoge kroz Sviraški potok a uspinjalo se je na cestu kod Velega vajala ili na Molo vajalo. Bilo bi se vazelo store postole za hodit puten a prid Jesu bi se bilo probuklo novije postole. Za u Pajiz bi se isto dosta hodilo storin puten ispod svetega Mihovila, kroz Za Hum, Parhnišća i izahodilo na cestu kod svete Jeline. Za poć ujutro na vapor bilo bi se pasovalo nimo svetega Petra i onda priko Tvardoja ili kroz Jurjevac do na rivu. Kad je poče vozit autobus on je pasovo priko rive do vapora koji je kuštovo na Novoj rivi ispod općine. Imali smo sva čuda od autobusih. Molih kojima su se bagaji stavijali na krov penjuć se po skalicima a pačenko je niko vrime vozi i Londonac na dvo poda. Ali ako je vajalo nosit na vapor veće bagajih hodilo se je u bližju Varbosku di je Ješonski vapor noći jer u Jesi ni bi sigur porat. Kako je ti vapor partivo uru pri Pajzonskega to se je sa njin hodilo somo iz veće potribe. U moje ditinjstvo Pajzonski vapor je do Splita takovo Stomorsku, Nečujam i Rogoč na Šolti a Ješonski Bol i Milnu na Broču.

Napisano 06. Siječnja 2002 g.

Mapa Varbanja iz 1834 na kojoj se pripoznaju stori puti

Satelitski snimak današnjega Varbanja

Razvojne faze jelšanske luke. U moje djetinjstvo dolazilo se je na živini u Jelsu a konje, magarce i ostalu živinu vezivalo se je na mjestu nekadašnje pumpne stanice, na donjoj karti na početku štraduna sa desne (južne) strane gdje je bilo i pojilo.