VARBONj MOJEGA DITINjSTVA

( Od kolijevke pa do groba, najljepše je đačko doba!-Branko Radičević )

Krajem 60-ih i početkom 70-ih život u selima hvarske ravnice počinje se mjenjati da bi do 80-ih dobio značajke koje ima i danas. Uzroci za to su višestruki. Patvorenje vina krajem 60-ih donijelo je naglo veću količinu novca što je omogućilo preuređenje kuća u današnji oblik i to dogradnjom modernih WC-a, kupatila te smještanjem kuhinja u kuću. Počelo je ubrzano kupovanje automobila i teretnih traktora što je smanjivalo potrebu za živinom. Razvojem turizma počinje naglo zapošljavanje što žene odvodi od klasičnih kućnih poslova a radeći u hotelima mladosti se otvaraju novi načini ljetne zabave. Otvaranjem srednje škole u Jelsi školska populacija /naročito ženska/ napušta ustaljeni način života, odlazi svakodnevno iz mjesta u školu dobijajući nove prilike za druženje i upoznavanje. Sve to utječe da stari životni običaji te načini zabave polako odlaze a zamjenjuje ih i do polovine 80-ih sasvim će ih zamjeniti današnji način života. Namjera mi je da za mlađa pokoljenja ukratko opišem način života, zabave svih generacija u moje đačko doba. Da bi bio bliži izvornom životu pisati ću Varbonskin nariječjem.

Počet ću od PRIMALIĆA kako početka života u svakemu godišću. I u primaliću je još znalo bit zime jer su u storo doba obično u morču puhale tri morčanske bure, po virovanju na 7, 17, i 27 morča, a stori judi su znali govorit da i u mažu smarče zebu.19.03. je sv. Osib. Počinju pojski posli; koponje, raskopovonje. Za dikmančiće je nojlišje bilo zagnjojonje. Još su bili moli da bi nosili teške vriće gnjoja i partili jih ali su već mogli gonit ča bi stariji napartili. Svaka fameja je imala baren dvoje živega, jedno veće i jedno tovorsko. Ali isto je jedna fameja pomogala drugon gonit da bi se sa veće živega pri sagnalo. Pud doma bi se guštalo paletat na živemu kako i kauboji ili indijanci ča ih se je gledalo u pasonemu filmu. Stori su beštimali da se tako lomi živo ali ni bilo koristi. A na živo se je u kući gledalo veće nego na čovika, tarlo ga se kad se spoti da se ne razboli, dovalo mekine, somo da lašnje izduro gonjenje gnjoja ili jematvu. Žene ili none bi skuhale obid za jude u poju a dica bi od gušta pitali u skuli da ih pustidu kako bi odnili u bronziniću obid upoje. U poje se je ritko kad hodilo somo. Uvik bi se nošlo uz put kumpanjije. Pozdravijalo se je uz put jude u poju sa "evala, pomalo ili zdravi bili". A za obid bi se skupili susidi u poju i skupa izili, zahumali, pok motiku u ruke i tako do u som sut. Mi dica bi išli doma učit ili u Lojca, u Hum ili Donje bore igrat se na kauboje i indijance, činit luke, strile, kopja, mačeve, grodit kućice, tvrđave, do u somu noć. Ako se ni uspilo napisat domaći ujutro bi se uranilo i pripisalo.

Ženskice bi popodne hodile sa beštijima u pašu, manje radi beštijih a veće radi kortejonja pok bi se i koze znale izgubit. U primaliće su veliki doni, judi bi se nalavurali, umorili i rano išli leć a sutra u osvit dona nanoge, uzjahat i pud poja, motiku u ruke i do noći udri po zemji. Osim za obidvat fremovalo se je somo za ogribon očistit motiku, za se napit i za zavit španjulet. Didi su prećali motičicon po krajima koliko su mogli a none su doma čuvale dicu, ašeštile beštijima i pekle kruh. Kroz primaliće bi cila fameja skupa sa dicon pomogala trunit, podvezivat, nosit vodu za polivonje i čekala sv. Ivana litnjega jer se posli njega ni hodilo u lozje. Pri tega bi je parvi Maja. Večer pri bi se pucale rakete iz tarace od skule, polili kaštilci na Bardu i na Humu a Parvega ujutro bi varbonjska mužika obošla misto i zasvirila na Pjaci, na Viru, kod crikve i na Poddocu. Navečer bi mi dica odigrali predstavu u domu (prestave smo dovali i za 29.XI-dan Republike i za Novu godinu). Kaštilci su se takovali i na Morkovu /25. travnja/ za blagoslov poja i to po mistu i po bardima. Dvo dona pri (23.04) je Jurkova i fešta u Brusju. Zimi se je alavija umivalo somo kad je vajalo poć u likora i to bi se bilo steplilo u pot vode i opralo u kajinu ali za Morkovu bi se dobro opralo noge, ubuklo krotke gaće, svuklo postole i već ih se ni ni ubukovalo nego za u skulu ili za se probuć od nedije ili od sveca i tako bi bosi hodili sve do jematve. Kroz peti misec još bi vajalo odtorkat štafetu a zodnje nedije okitit misto sa slavolucima spletenim od gron martine, a njih se je obično obisivalo po Domu i priko puta od crikve do Doma, te napravit proslavu Matije Ivanića. Nikako u to doba su i Duhovi i u parvidon na žežin Duhovih bi se kralo cviće u famejih koje su imale divnjice i sa tin cvićen okitilo šimatorij i zide oko njega a digod se je kojigod piter zno stavit i na nojgornji ordin od kampanela. Za Duhove dohodi je barba Duje sa feron pok bi se u njega na bonku nošla i koja igračkica za nos dicu /svirak, balunčić na laštiki, zarcaliće …/ a iz Jese bi sa koliciman bi doša i pašticer prodovat sladoled i šćapice od cukra. Kad bi zateplilo u poje se je hodilo ranije i već oko desete stariji bi sidili na Pjaci, u hlodu ispod Jurondetove kuće. Poza obida malo prileć, do pridnoć opet u poje i posli poja opet na pjacu do večere ali sad uz Stipećov vartal. Stariji, motiku na rame i pomalo bi doklencali do Varbanja ali mlaji su torkali pud doma jer ako bi zakasnili nebi ćapali misto za zaigrat na balun priko pjace ili prid Domon. Stariji su vikali i pritili da će britvicima iskidat balun a to bi bila velika šćeta jer provih fuzbanih ni bilo za kupit nego se je bilo zadovojno i sa plastičnin balunon kojega je vajalo malo ispuhat da ne prašći i da manje odžbancoje. Svaku malo je, uz uzvik "živooo", vajalo fermat kad bi ko sa živin pasovo priko pjace iz poja pud doma. Nakon ča bi pasali barba Jure Govčev i barba Kruno Meštrejurjev moglo se je igrat bez fermovonja jer su oni zodnji dohodili iz poja. Na balun se je igralo i u donje bore, na Kruševju, a igralo se je i na betuniću isprid crikve di su branke bile mola vrota za u crikvu pok se iz jedne branke ni moglo drugu ni vidit. Uz grebe se je igralo na "Vitoriju" ili pucalo penale a branka je bila izmeju dvo čempriša uz zid od grebih. Velika starina u Ivejinin Selima je služila kako igrališće di se je čini i tjelesni sa skulon a i slet za Dan mladosti. Na svetega Antonija(13. lipnja) ženskice bi nosile polme za suside i svojtu ča bi bili napravili polmu i doli njin da nosidu za njih. U polmi je vajalo bit trinaste vorstih cvića i to uglavnom pojskega ali se je stavijalo i domoće za popunit broj. 15. lipnja. skula je fermovala. Još deset don produžnih i ko paso paso, ko ne dolita ponovo i tako bi došlo LITO.

Običaj je bi da se na žežin od svetega Ivana litnjega (25. lipnja kad je fešta u Pojica) goridu ognji po selu a mlađarija bi priskokala priko ognja. Počinja je kris i već se u lozje ni hodilo. 29. lipnja je sv.Petar i Paval kad je did Perko slavi imendan i rođendan (ali bi je rojen na Gospu od dva Luja). Levonde u moje ditinjstvo ni bilo puno i učas bi se požanjala (ali bi isto niko vrime početkon luja miseca cilo misto vonjalo po levondi). Osim levonde bilo je dosta višnjih koje se je brolo i dovalo na otkup u Zadrugu. Višnje su se primale u molen podrumu ispod pozornice Doma. Kako su u ti štajun veliki doni ni se brolo višnje ni žanjalo levondu po cili don nego bi se usrid dneva odmoralo. U mistu bi poza obida stariji išli pospat a mi dica je vajalo da se igramo daje od kuće da jih ne budimo. Mi koji smo stoli oko Pjace bi u hlodu ispod Jurondetove kuće na skalini za sidit komadon kupe nacrtali poje za igrat na triliju ili na vuke i ovce i umučeć igrali a popodne digod išli i u poje pomoć. Ako je poje bilo daje od mista ni se ni hodilo doma nego bi se usrida dneva pospalo u hlodu ispod koje smokve, višnje ili umendula. Nakon tih poslih Varbonj bi opusti. Ko je imo bilo kakovu kućicu po valima, ili po Rudinami daje od mora, seli je tamo sve do Vele Gospe. I beštije se je vodilo sa sobon. Jedino se je hodilo u selo radi kokoš i za umisit i ispeć kruh. Iz Rudin stariji bi išli do poja ubrat čogod verdure, kojugod dinjicu, milunić, pomidoru. Išli bi i maškinat ili gorit japjenice. Mi dica bi se kupali po vas don. Kad smo već bili dikmančići pridvečer bi išli noć živo i odvest ga napojit. Ča je i normalno, sramota je tad bilo jahat na sedlu kad su i Indijanci u nediju u kinu jahali na golemu živemu. Vazelo bi se oglav, po zvuku zvončića nošlo živo, uzjahalo i kroz Puntu onako bez sedla paletalo do na Lokvicu napojit ga. Kako i stariji zvižjali bi živemu da slaje loče. Večer bi se takalo citalene, slušalo muziku priko konola iz Bola, slušalo radijo i čekalo splitski festival ili Sanremo. Osim mužike iz tih festivolih u Varbanju su puno popularne bile meksikonske pisme. Kad bi se prispalo išlo bi se leć ma ritko kad u posteju. Obično bi se pod koji bor ili gluhoč okrenulo sedlo tako da se glova more stavit na blazinjicu, podkladu pod sebe, sukonce na sebe i uz mužiku zvončićih od živega slotko zaspalo dok nas ujutro parvo sunce ne bi probudilo. Ustali bi se, pomogli dignut mriže, vorše, marendali i pud mora. I tako cilu šetemonu sve do nedije. U nediju ujutro hodilo se je u Varbonj za na misu. Dikmančići bi već vazimali somi živo a kako su inače jahali iza starijih, iza sedla na guzici, ovo je bila prilika za se malo činjat. Uzjahalo bi se sa nogon priko luka od sedla i izošlo na put di se je znalo da bi kojagod divnjica mogla izoć za pud Varbanja. Ponudilo bi joj se da uzjaše na guzicu iza tebe. Kad bi koja radi priše i uzjahala - ko veći, ko stariji od tebe? Nikakav motor ili auto danas ne moredu to zaminit ; noga priko luka a divnjica iza tebe do pod Varbonj. Onda bi se skalala i nanoge doma. Posli obida sva Varbonska mladost na autobus ili /ako je ko imo/ bicikle i u Jesu ispod"Genexa"(danas"Fontana") na kuponje. Tamo bi činili žmorfije, skokali, polivali sebe i svit okolo, ludirali se dokli ne bi počela koja utakmica na Soline ili dok nebi bilo vrime za poć u Varbonj za Gorice na šetnju. Tamo bi šetali u početku do Proširenja a kasnije do Mosta i Velega vojala. Muški skupa a ženske skupa. Ako je ko imo tranzistor slušalo se je utakmicu, išlo večerat i navečer u kino. Ujutro na živo i pud Rudine. Na 02.07. hodilo se je na Gospu u Dol sv. Marije, na svetu Mandalinu (22.07.) hodilo se je na feštu u Svirče, na svetega Jakova ( 25.07 ). u Pitve a na sv.Onu ( 26.07.) u Dol sv.One. Za Gospu od sniga( 05.08 ) svakako je vajalo poć na feru u Bol, stariji na pazor od živega a mi mlaji okupat se na Zlotni rot. Pri nego bi hiti meštrol vajalo se je vrotit u vale a mužiku iz Borika naveče bi doni burinac. Na 10. 08. hodilo se je na feštu svetega Lovrinca u Varbosku, na 16.08. na svetega Roka u Pajiz Ako se radi štajuna od poslih ni moglo veće boravit po Rudinami išlo bi se od subote zovnoć i to obično u kumpanjiji. Puno putih, kad je vajalo pud doma, ni se moglo noć živo pok bi ga vajalo iskat. Popelo bi se na koju gomilu i oslišalo hoćel se di čut zvonac. Koliko god je bilo živega svaki zvonac je na niki nočin drugačije zvoni pok se je po zvoncu moglo iz daleka poznat svoje živo. A znalo je živo i pri gospodora somo doć doma. O Veloj Gospi (15.08 kad je fešta u Jesi počinjalo je vroćonje u selo. Stariji su zamokali sude i parićovali se za jematvu. Ko je imo popravni vajalo mu je malo ponovit a mi druzi smo kupovali, zamotovali libre i parićovali se za skulu koja je onda počinjala na parvi devetega. Borzo je počinjala jematva a sa njon bi došla i JESEN.

Život u jesen i zimu more se opisat skupa jer čini jednu cilinu. Jesen je počinjala sa fešton sv. Kuzme i Damjana (26.09) u Velemu Grobju a nikako u to doba je počinjala i jematva. Od ranega jutra čuli su se zvonci po mistu. Svak ko je moga hodi je u poje pomoć da se ča pri otarga i svak je imo svoj posol. Ženske su natargivale, stariji mečili meškon u koci, ispuvali šešulon mast u mihe, namotovali tartajune, veživali mihe, beštimali ako je tartajun bi ukrivo namoton ili ako se je zalilo niz mih i sa tako parićonin mihima čekali gonjoča. Gonjoč ni moga bit svak. Vajalo je bit velik i jok da se teške mihe more doma som raspartit i uznit ih uza skale do navar baje ili depozita. A vajalo je i moć na putu raspartit i opet zapartit ako se živo koje je bilo slabo zaparćeno iskrene. Ali na putu je uvik bilo svita koji bi ti skoči pomoć. Nojteže je bilo gonit na tovorskemu živemu, jer ako je tovor zakapi da neće daje moga si ga ubit ali on bi se ukopo na mistu a puno putih i hoteć bi se izvornu sa pizon. Živo je somo znalo put do u poje a nojžešće je hodilo pud doma prid večer kad je ćutilo da će ga se rasedlat, napojit i pustit da se odmori. Posli skule i dica su hodili u poje i za pomoć ali i za to da ne budedu somi doma. Ako bi poče dorž išlo bi se u koju kućicu ili trim dok ne pristrihne ali se doma ni hodilo do noći. A navečer po konobima bi se turnalo, privarguvalo drof, pritokalo vino u bačve a krajen 60-ih na veliko nosilo cukar, vodu i "mutilo". Po veće od misec don cili Varbonj je vonjo po mastu. U "Tutejinemu dvoru" je zadružna presa klapatala do kasno u noć a ujutro rano opet bi se poli dizeloš, pozojmjen u maranguna meštre Tihota, koji je okrića presu. Sa krajen jematve počinjalo je vrime od drugih poslih. Ženske, i starije i mlaje, bi hodile u pašu, muški bi po bušku broli takje, usput bi nabrali i donili doma brime kića za beštije a i kojugod manjigu za dicu. Na Mortvi don ujutro bi se išlo posli mise Zornice obavit blagoslov grebih, posli doma prigledalo vino i ako je fremalo vrit , a obično je, zabulalo bačve a onda vazelo skale na rame i odnilo u poje sve orte za počet brat masline ali se ne bi na Mortvi don brolo nego bi se vrotili doma za na Večernju misu za mortve. Znalo jih se je brat i do pol Jenora. Jesen je i doba od svakih bolećicih. Od četvortka dohodi je u Varbonj likor i onda bi se išlo vizitat se ili po koju recetu za dicu ili starije. Ambulanta je usparvu bila u većoj kamari od Zamotela kuće (onon od Gutine bonde) a posli u sobici u dnu čitovnice. U druge done hodilo se je u likora pri misto i to Straničari i Goričani većinon u Jesu a drugi u Pajiz. A dica ko dica, nisu mogli stot doma ni po darževemu, vajalo je obahodit sakriveno oružje i bit parićon za ratove između Glavičanih, Velebanjanih, Goričanih ili drugih zavisno ko je s kin bi na ratnoj nozi. Svaki novi film donosi je i nove izazove. Vajalo je naučit hodit na visokin štakama, pravit praćke i hitalice/ča ni isto/, činit nove mačeve, pištole, naučit tirat kolo od barilca i okrićat botun na debjen koncu. Pištole bi se pilicon ispilalo od komada šperploče ča bi se izmotalo u meštre Tihota a nojboje nacrte za pištol čini je Antun Ercegov pok bi se njegovu sliku pištola priko kojega storega komada indiga prikopiralo na šperploču. Isprid doma se je igralo na venje, ispod lože na trule kobile ili sa balunon na penale, po pjaci na "maška izila", na "kaču", na "morske pase", na " bare", na "sakrivonice", po lokvima i po potoku (ča je teka od Vira nimo svetega Kuzmu pok kroz Česminice sve do u Blata) se je pušćalo brode izdubjene u komadu korke a po bušku se je igralo na njemce i partizane ili kauboje i indijance zavisno koji se je film zodnje gledalo. Puno putih bi se smočilo i nastinulo. To ni bila šćeta jer se je doma ležalo u teplu i čitalo crtane ili čogod drugo jer osim čitanja druge zabave ni bilo. U jesen se je i lambikalo drof i po cile done bi stariji, ako je bilo darževo, sidili u teplu uz lambik, provjali, igrali na korte, ispekli kad kad malo prajčevine i zakantali. Kad su bila lipa vrimena išlo se je rizat. Jesen je bila i vrime kad bi u Varbonj ispod skule u "Ogradicu" di je sad Markova kuća arivali Cigani. Digli bi šatore i popravijali lumbrele ili stanjovali rapave pote i teće. To su bili miroljubivi judi koji se u nikoga nisu dirali ali se je isto dicu, ako su bila tavna, znalo strašit da ćedu ih Cigani odnit. Tako je jesen pomalo pasovala a mlaji dikmani i divnje a i dica čekali su nojlišje doba a to je ZIMA

Zimskega ugođaja nan ni falilo jer su snigi, velike bure i ledi sa velikin mosurima bili redoviti a potok je teka sve do kasnega primalića. U kasnu jesen i početkon zime počinjali su kolendanja. Sv.Kota (25.11), Sv.Andrija (30.11), sv.Mikula(06.12), sv. Lucija(13.12.) a nojvažniji sv. Stipan(26. 12.) i sv. Ivon (27.12) i to zato ča je tad počinjalo doba karnovala a sa njin i tonci. Tonci su bili nojveći društveni događaj u selu, jedina prilika da se u javno muški i ženske viditu i upoznodu. Za u sakreto su služile paše i škuribonde. Pri rata, a i posli rata sve dok se ni izgrodi Dom, toncalo se je u novogrodjenin i još ne prišićenin privatnim kućima. Komunisti su dugo godišć činili tonce u gornjih Klapotovih. Nakon rata već se ni toncalo podiljeno po politici nego cila mladost skupa u Ivejinih, Blaćetovih, Donkićevih u selima a nojveće u Briškulinon kući. Inače važna prostorija u kući je bila predsoblje iliti sola. Kuhinje su bile odvojene od kućih i u kamare se je hodilo somo za spat ili ako si bi bolestan. Uz kuhinju bi je obavezan i tinel u kojen se je služilo jiće kad se je imalo veće gostih/za fešte/. A zahodi u našin kućima su bili većinon u kućican od beštij. Za to bi služila jedna bija u kantunu ili kako ništo finije daska sa rapon stavjena na iskopanu jamu i malo odignuta od kleha sa zidićen od betuna. Dvori su bili puni gnjoja od beštij, vode je bilo malo i čuvala se je za važnije stvori od umijonja pok su i zaraze bile česte. No da se vrotin na tonce. Nakon grojbe Doma kulture"Matij Ivanić" tonci su se prihitili u solu od Doma. Priko šetemone nojveći događaj bi je poć prid noć "na autobus" vidit ko je doša iz Splita. Nakon tega bi se intralo u poštu i čekalo da teta Ljepa Mihovilova otvori vriću sa pošton, pročita ko je dobi koju poštu i odma je razdili. Posli večere muški su išli u buffet prorazgovorit se ili zaigrat na korte. Išlo se je i u čitovnicu gledat televiziju a tamo je znalo bit i po sto svita. Kino je bilo tri puta na šetemonu i to sridon jedon film a suboton i nedijoj drugi. Dvorana je mogla primit oko 250 svita za sest ma bila je uvik karcata i mi dica smo sidili po klehu isprid ekrana. U zodnje rede su sidili oni ča su se ludili, svak sa svojon divnjon. A i na balkonu je bilo oko 40 mist za sest. Na ulazu su lavurali judi ča su bili zaposleni u zadrugi pok su nas dokle smo bili dica posli žurnola pušćali bez korte. Mlaje ženske su stole doma i čekale tonce da mogu izoć vonka. 

Tonci su od sv.Stipana bili svake subote i nedije, svaki svetac (a pogotovo na svetega Jeneroža na 4.Vejače kad bi pri večere bili i dičji tonci) a i Novu godinu se je čekalo skupa u soli od Doma. Za svaki karnovol se je birala uprava tanoc koja je organizirala tonce i o svemu se pensala. Dvo, tri dona pri subote na vrota od podruma ispod skule i na caklo od butige stavijali su se rukon napravjeni plakati sa kojima se je pozivalo na Svečani ples. A tonce je činila mužika, klub “Partizon”, lovci, omladina….. I uvik je pisalo bogati bufet ,“Svira dobar jazz”(.a nojveće su svirili Miketina Ivejin na bubnju, Vlade Bulićev sa armonigon i Dinko Briškulin sa trubon i oni su bili ti “dobar jazz”. Ako je na toncima bila lutrija darovi su se obično dovali u butigu mješovite robe i stavijali se u izlog. U subotu popodne se je redilo, probukovalo i u osan urih sola je već bila puna. Svak bi vaze svoje misto, šinjaduri na pozornici ili na stolima, mame sa ćerinin kapotima na bonkima uz mola vrota, divnje na bonkima ispod ponistrih, dica ispod pozornice, dikmani usrid sole nanoge, stariji muški koji nisu volili toncat u bufetu a oni ča su volili tonce na bonkima ispod balkona. Još somo da šinjaduri zašuškadu i nojveći događaj šetemone će počet. Kortu su ploćali somo furešti a domoći muški su ploćali "kumpanjiju" tj. paušalno za cili karnovol. Oni su i onako hodili u Varbonj na tonce jer osim ako se je ko ludi u drugo misto bila je sramota poć indi na tonce. Jedina već zimska fešta kad se je hodili na tonce vonka mista je sv.Antonij u Vrisniku (17.01.) Judi iz uprave tanoc, radi truda koji su ulogali oko tanoc, nisu ploćali kumpanjiju. Ženske nisu ništa ploćale ali su bile obavezne doć na tonce da bi privukovale mladiće iz drugih mist. Nisu smile nikoga odbit ako ih zamoli za tanac a ako bi to učinile muški koji je dobi "korpu" po nepisanemu zokonu moga joj je dat pjusku. Ako su divnje bile zaručene nisu bile obavezne toncat sa svakin. Da bi na vrime došli do ženske za tanac, jer je sa parvin taktovima nastajala tarka prima ženskima, muški su znali na mote ugovorit idući tanac. Ali svejedno, ako je drugi pri zamoli žensku za tanac ona je vajalo da ide toncat sa onin koji je pri doša do nje jer bi mogla dobit pjusku i onda eto ti barufe. Skočili bi prijateji, zamela bi se gužva ali sve je pasovalo somo sa modricima. A take barufe su bile česte ali u Varbanju su furešti uvik izvukovali debji kroj jer je tad bilo puno mlodih i jokih Varbanjanih a i stariji bi se znali uplest u barufu. Radi čestih tučih na toncima Varbonj su zvoli Texas. Ali i divnjice su imale priliku pokozat ko jin je drog jer bi se svaku večer oko pol toncih udrilo u bubanj i najovilo “a sada Dame biraju”. Oko jednaste urih bi se udrilo “stori tanac” da stariji zatoncadu rašpu, šaltin, ingliš valcer i kad se malo izvojidu idedu leć. Dičji tanac bi se odsviri odma na početku večeri. Tonci su trajali obično do ure posli pol noći a "svečani ples" do dvi, tri ure. Na jednemu od svečanih birala se je i "Krajica" za to godišće. U stvori nju niko ni biro već bi se organizatoru toncih ploćalo zato da određena divnja bude proglošena krajicon. Šolde bi skupila kojagod kumpanjija ako je znala da se ko iz te kupanjije ludi za ton ženskon. Organizator je unaprid obavjestiva buduću krajicu ko je ploti za nju i koga ona vajo da izabere za" kroja". I tako bi ona na početku" tonca za krajicu" izvela dogovorenog kroja, odtoncala sa njin pol pisme i onda su oni daje izvodili njegove prijateje i njejine prijatejice. Posli tonca išlo bi se u Bufet počastit. Tad se je u bufetu moglo pit somo likere (arkonjak, mentol, ružulin, pelinkovac..). Bit krajica je bila velika čost pok su sutradon, a to je bila nedija, njejini doma činili trajtamenat za počastit čestitare. Druga važna stvor na toncima su bile "dražbe". Na dražbu se je obično dovalo slatka turta i boca prošeka. Bila je bravura dignut dražbu iako se je za nju tad znalo dignut cinu i do današnjih 15-ak žurnotih. Dražba je obično počinjala povikom"dražba traje tri minuta a ples pet minuta" ali je trajala i veće sve dok se ni izošla dobra cina a nojboji izvikivoči dražbe su bili Miko Picolin a posli od (tad) mlajih Antun Škandejin. Kumpanjija koja je digla dražbu ti je tanac imala pravo izvest divnje koje god hoće i soma toncat cili tanac. Mame su dobro gledale ko jin je ćeri izve za tanac od dražbe jer se je izvodilo somo simpatije. Posli tonca bi se išlo u bufet izist turtu ali bi divnje svoj komad obično zamotale u facolet i nosile doma za se sutra pofolit. Često se je zno u salu odnit i "trajtamenat". To bi bila dvo bićerina likera i ćikolotica za žensku i bilo bi se priko tonca na gvanćeri odnilo u solu i počastilo prijateja koji je tonca i njegovu balarinu. Posli toncih, kad bi ženske koje su mame već otpratile doma išle leć znalo se je poć i u serenadu. Kako se je bliži kroj karnovala sve češće se je dohodilo na tonce ubučeno u maškare. Na zodnji četvortak karnovala ( tusti četvortak) čini se je veliki maskenbal i birale nojboje maske. Kad bi nestalo struje (a to je bilo svaki put kad malo zagarmi) takalo bi se aide ili petromase i udri daje. Armonigi, trubi i bubnju struja ni ni tribovala. I tako bi se pomalo dovuka i kroj karnovala. U zodnji torij karnovala (a 1913 g. se je potrefilo da je karnovol bi na sv. Jenerož pok je kurot reka da se do podne slavi sv. Jenerož a popodne neka bude karnovol) skupile bi se sve kumpanjije da uz jiće i veće putih neprilično pića učinidu fraju. Posli obida hodilo se je u povorkama po mistu omaškarono kako je ko zno a znali se je na živemu poć do Varboske ili Svirač. Svaka kumpanjija je činila i nosila svojega Jureta Karnovala. Pri večere svi su dohodili u solu, pokazali svak svojega Karnovala i nakon čitanja "tastamenta" isprid doma ih izgorili. Pri večere na tonce se je dovodilo i dicu obučenu u maškare. Na tonce posli večere obično se na karnovol ni vodilo molu dicu jer bi bilo dosta pjanih. Na karnovol tonci su finivali u pol noći jer sutradon je Čista srida i počinje Korizma kad se po običaju ne veseli niti ženi i čini pire ili tonce. Na ti don se je postilo a spizu ča je ostala od torija izilo bi se u četvortak. Ako se je ko imo voju počet ženit zaruke su već obavjene u karnovalu. Sad se je vajalo odmorit, čekat četvortak na pol Korizme za, iz običaja, kogagod na ti don čogod za tarok privarit a onda se vroćamo na početak ove gončice jer dohodi PRIMALIĆE.

     I tako sve iznova dok promjene u 70-ima nisu ove običaje pomalo počele bacati u zaborav. Svakodnevni susreti mladosti pred školom u Jelsi, kafići Gringo i Neptun, Bobis, ljetni plesovi u Parku u Jelsi, na Heliosu i na Gradskom u Starom Gradu, kupnja auta, učinili su svoje. Plesovi kao mjesto druženja u zatvorenoj seoskoj sredini postali su suvišni a običaji poput biranja Krajice i Dražbe pomalo i smiješni tako da su se počeli gasiti i početkom 80-ih skroz su prestali. No kako svako vrijeme nosi svoje i današnji običaji nekada će nekome bit smiješni i zastarjeli ali isto bi bilo lijepo zapisati ih. Tek toliko da se ne zaboravi.—

Vrbanj 50-ih

Prid podne na skalini pod Jurondetovu kuću

Težočki alot, motika i zavojke, simbol mojega ditinjstva. 

Ogrib

Pripuvonje. Na fotografiji su Pavičić Ivo, Dužević Marinko, Radonić Marijo, Carić Luka svi iz Dola.