Blog Vrbanj

Stavit zimurada u rakiju u jednu bocu i da po običaju stoji, ako more na suncu, 40 don i onda procidit i nalit u caklenu bočicu koju vajo dobro začepat da alokohol ne vitri i doržat u škurici. Kad imate zamorene oči pok van i svitlo smeta sa bumbokon dobro umasirat malo te tekućine u kapke i sve oko očiju ali vajo da malo ide i u oči. To peče malo vrimena ali odma paso. Jo bi to onako dvo do tri puta na dan malo umasiro ali ne puno don. Dosta je tri dona i baš odmori oči. Naravno ako ni stvor kojega oboljenja onda bome neće pomoć ali ako je stvor somo zamorenosti od npr. svitla kompjutera, jokega sunca ili neadekvatnih oćolih dosta ublaži. Meni bočica od tri deca traje evo već 10g jer se tega stavi na bumbok somo malo. Uje od zimurada koje zovemo kvatišencija je dobro za ublažit upalu sinusih. Sa kvatišencijon dobro utart površine sinusih a to je sve oko očijuh i misto na čelu  iznad nosa. Nojboje pri sponja i onda se dobro pokrit da u teplini boje diluje.