Blog Vrbanj

Marko Budrovića, zelandur i kačadur, ma veće zelandur!

Zelandur i kačadur pod punon "ratnon opremon". Kojbe sa rećamima pokrivene da tići budu u škurici, kojbe za ulovjene tiće, nose na škinima navišćone palice za na baketinu, puška u ruke, karner priko ramena. Moj barba, Morko Budrovića   Baketun ( u nikima mistima zovu jarbolet) je obično bila grona od umendula, oskoruše a na nju bi se stavile baketine. Baketine su bile palice od koromača koje bi se malo rasiklo i u njih uvuklo palice od martine navišćone višćen. Palice su bile malo tanje i do 20cm daleke. A višć je bilo ustvari ljepilo na koje su se tići zalipivali i već ne bi mogli uteć. Čini se je od one bile sirove gome rastopjene u benzini, a to ljepilo se je duperalo i za lipit buvele od bicikle. Ruke šporke od višća bi se prolo maslinovin ujen ili ako je već bi štajun od maslinih bi se ubralo maslinu, izgnječilo je i protarlo sa tin ruke. Baketun se je stavija na zemju ili na gomilu a ispod kojba sa rećamon, tićen koji bi bi pokriven u kojbi i tek kad bi ga se otkrilo i kad bi vidi svitlo poče bi kantat i privukuva druge tiće. Kad bi se tići koje bi rećom privuka spustili na baketun zalipili bi se za palice i od težine palice ne bi mogli odletit pok bi se veselo torkalo ćapat ih, skalat in palicu i stavit ih u kojbu. Inače su zelanduri stoli malo daje u potpunon tišini da ne strašidu tiće a kako san jo bi nemiran ni barba ni otac me nisu baš volili vodit sa sobon na zelondu pok i nison posto ljubitelj zelonde. Mi Rozovi smo nojveće na zelondu hodili u Lojca kasnije popodne i u Češminicu izjutra rano a barba Morko nojveće u Priloge i na Jurića.
Na slici Marko Fredotović Budrovića, brat od moje matere.

Antun Vodanović donji, Jure Buratović Kražinov i Antun Vidošević Škandejin na zelondi u Opuzenu 1977.  Oko 400 tićih su prstenovali i pustili a oko 50 donili doma a uglavnom verdune. Jure Kražina je inače bi član ornitološkog saveza.