Blog Vrbanj

Kad jedon put portin,

a portit ću svakako,

govorit će stariji o meni kako i za drugima

i ovako i onako.

Niki će reć bi je bidan dobar,

niki će reć bi je tavnjok,

Niki će reć bi je pizda od čovika

ma to mi neće smetat

jer san se i kroz ovi život na to već navika.

Ali voli bi čut ča će o meni govorit današnji mlodi,

Kad budu imat godišć kako jo sad,

kad počne prvenstvo FNL,

i budu pasovat na utakmicu nimo moju kuću,

po  jematvi kad malo zahlodi.

Hoćedul pitat jedon drugega:

ma kako se je ono zvo oni stori ča je ovde sto?

Ča nan je sviri na dičje tonce,

slikovo nas ka dicu,

ma čudo jedno da san zaboravi i kako se je zvo!

E, i meni je ime navar jazika, reć će drugi,

ali mi već ni u višti ka stariji,

nikad ni izahodi u kafić ni po donu

a kamoli po Zdravoj Mariji.

I tako će razgovorajuć doklencat do igrališta

ma nećedu se spontit imena,

nego će pri nego počne utakmica zabeštimat na sebe,

ma jebenti mene rebambivenega,

vajat će isto pitat kojega starijega!

A jo ću ih baž odozgore i gledat i smijat in se.

I kad bi moga reka bi in tad:

A ča mislite da san jo bi boji od vos

kad san bi mlod kako vi ?

Ni jo tadašnjin storima nison ni imena

ni fameju ponti

i sve to,

pok i nemoć in se ni imena spontit

san i jo paso.