Blog Vrbanj

Moj dida i ja, prijatelja dva  

Moj najveći prijatelji i uzor u životu, moj dide Perko Rozov.

Sve ča znon o poju, ribašćini, brodima, kako meškon izmečit grožje i kako vezat mihe sa tartajunon, kako napartit živo i vezat vriće na sedlo, kako jahat na živemu bez sedla i kako mu zvižjat na Lokvici da slaje loče, kako lambikat i smokve i fecu i drof, sve o lavuru sa maston u konobi, kako popravit obruč od bačve, kako zaminit dugu na karatilu i popravit bišavo dno, kako bi sritan i kuntenat i sa molin stvorima, kako se juski ponošat sa svakin onin i ko ti čini zlo i ko ti čini dobro, kako ne marzit nikoga koje vire bi da bi i s nikin ne bit svađen......sve, sve me je moj prijatej Perko nauči ali ni uspi dvi stvori zbog kojih je bi uvik malo tužan. Ni uspi svojega Perića naučit humat i napit se vina. Did Perko ni bi pjančina nego veliki radnik ali svako jutro je našće sorca bi parvo žmulić rakije, po donu baren dvi litre čorne bevonde a humo je pipu ka Turčin. Sva zabiokovska Hercegovina ga je znala jer su mu svi nosili kila i kila tabaka, ča u listima ča rizanega. Kad bi doša večer u čitovnicu na televiziju bi bi kako vapor zadimi sa pipon cilu prostoriju. I kupi meni did još u sedmemu razredu novu miću na benzinu, kupi mi i cigarete da se počnen pomalo učit humat ma kako san jo iša na Stranišku racu nikako meni ti tabak ni pasa. Onda mi je bi noša u osmi razred niki lagani HB ma ni to mi ni hodilo. Ali isto bi digod liti kad bi išli skupa na kančenicu bi onako na veliku muku zahumo jednega a on bi kuntenat doša u valu i pofoli se našon teti Boni kako je Perić zahumo. Za obid bi mi natoči bevondu ma meni je i vino smardilo i to ga je kruto mučilo da mu unuk, njegovo ime, niti humo niti pije vina. Ali posli se je moj Perko na to navika i još se je foli drugima kako jo nison baraba jer eto niti pijen niti humon nego somo svirin u tamburu i kanton 

Did Perko i njegov lambik. Slikano u Bulićevih a uz njega je Marko Pavičić Landerov

Fotografija iz ljeta 1976 snimljena u Oskorušici ispred kućice uz more, danas vlasništvo Leko Željko.